توڑ دو بت

September 9, 2014 0 1 min read

انقلاب اور آزادی مارچ کو اسلام آباد میں دھرنا دیئے مہینہ پورا ہونے میں ایک یا دو دن باقی ہیں۔گزشتہ 27روز سے دھرنے کے ساتھ حکومت،اپوزیشن،عمران خان اور علامہ طاہرالقادری کے درمیان مذاکرات بھی جاری ہیں جن میں چیف آف آرمی سٹاف جناب روحیل شریف نے بھی کردار ادا کیا۔اس دوران درجنوں افراد ہلاک اور سینکڑوں زخمی ہوچکے ہیں ۔سربراہ تحریک انصاف عمران خاں نے سول نافرمانی تحریک چلانے کا اعلان بھی کیا جو بُری طرح ناکام ہوگئی ۔تاجربرادری سمیت دیگر عوامی حلقوں نے سول نافرمانی تحریک کے آپشن کو رد کردیا۔راقم نے سول نافرمانی تحریک کے بری طرح ناکام ہونے کے بعدیہ نتیجہ اخذ کیا ہے کہ عوام اس وقت آزادی اور انقلاب مارچ کیلئے تیار نہیں ہیں یا آزادی اور انقلاب مارچ والوں نے عوام کو اپنے خیالات سے اچھی طرح آگاہ نہیں کیا یاپھر عوام کی اکثریت ان کے خیالات کے ساتھ متفق نہیں ہے۔

چند ہزار یا چند لاکھ لوگوں کو ساتھ لے کرآزادی ااور انقلاب کی باتیں کرنے والے شاید یہ بات بھول گئے ہوں گے کہ آزادی یا انقلاب تب آتے ہیں جب پوری قوم تیار ہو۔قائدین کا یہ فرض بنتا ہے کہ پوری قوم کو ملکی آئین اور قانون کے متعلق معلومات فراہم کریں اور سب سے پہلے قوم کا ہر فرد ملکی آئین و قانون کواپنی ذات پر لاگوکرے۔کیا آزادی اور انقلاب مارچ کے ساتھ اسلام آباد میں دھرنا دینے والوں نے قوم کو اپنے اغراض و مقاصد سے آگاہی فراہم کی ؟راقم پوری قوم کی طرف سے تو جواب دینے کی پوزیشن میں نہیں لیکن اتنا ضرور کہہ سکتا ہوں کہ کم از کم مجھے تو اس سلسلہ میں کسی قسم کی آگاہی فراہم نہیں کی گئی۔

مخالف جماعتوں کی جانب سے حکومت مخالف بیانات تو قوم ہمیشہ سے سنتے آرہی ہے ۔بد قسمتی سے آج تک کسی سیاسی یا مذہبی قائد نے عوام میں شعور بیدار کرنے کی کوشش نہیں کی جس کی وجہ سے آج حالت یہ ہے کہ راقم سمیت پاکستان کے 90سے95فیصد شہری یہ نہیں جانتے کہ با حیثیت شہری اُن کے حقوق کیا ہیں اور فرائض کیا ہیں۔اس حقیقت کا اندازہ آپ عمران خان کے اعلان تحریک سول نافرمانی کے بعد پیدا ہونے والے سوالات سے بھی لگا سکتے ہیں ۔عوام کی اکثریت سول نافرمانی تحریک سے ناواقف نکلی ۔راقم کے نزدیک یہی ناواقفیت سول نافرمانی تحریک کی ناکامی کی بڑی وجہ بنی ورنہ عوام جس قدر پریشان ہیں عمران خان کے اعلان کرتے ہی عوام سول نافرمانی کی تحریک کامیاب بناکر اب تک اپنے مقاصد حاصل کرچکے ہوتے ۔

آپ سوچیں ایسے حالات میں آزادی اور انقلاب کی بات ایسے ہی ہے جیسے کہ بھینس کے آگے بین بجانا۔سربراہ تحریک انصاف اور علامہ طاہرالقادری بھی اسلام آباد میں پچھلے 27.28دن سے کچھ اسی قسم کی بین بجا رہے ہیں ۔گھر بیٹھے نیوز چینل پر اُن کی تقریریں سننے والوں کی سنجیدگی کا اندازہ دھرنے میں شریک پی ٹی آئی کے کارکنان کی غیر سنجیدہ حرکات کودیکھ کر باخوبی لگایا جاسکتاہے۔ مارے تکلیف کے گھر سے باہر سڑکوں پراحتجاج کرنے والے روز رات کو میوزک لگا کر ایسے جشن مناتے ہیں جیسے کسی رشتہ دار کی مہندی کی تقریب میں شامل ہوں۔کوئی ان سے پوچھے کہ اگر اتنے ہی خوش ہوتو پھر احتجاج کس بات کا؟آزادی اور انقلاب والوں سے معذرت کے ساتھ کہ عوام کو ابھی تک صرف یہی سمجھ آیا ہے کہ دھرنا دینے والے ن لیگ کی حکومت ختم کرکے خود حکمران بننے کے خواہش مند ہیں۔دوسری طرف عوام کے سامنے یہ حقیقت بھی کھل کر آگئی ہے کہ پیپلزپارٹی اور ن لیگ میں باریاں لگا کر حکومت کرنے کا فارمولا طے پاچکا ہے ۔پیپلزپارٹی کے دور حکومت میں سابق صدر آصف زردای کو جمہوریت کیلئے خطرہ اور عوام دشمن کہنے والی ن لیگی قیادت آج اپنی حکومت بچانے کیلئے ناصرف سابق صدر سے مدد مانگ رہی ہے، اُن کوجمہوریت دوست قرار دے رہی ہے بلکہ سڑکوں پر گھسیٹنے کے وعدے بھول کرسر آنکھوں پر بیٹھائے پھرتی ہے ۔کاش جمہوریت بچانے کیلئے متحد ہونے والے ملک کو سیلاب سے بچانے کیلئے بھی متحد ہوجائیں ۔

ہر سال سیلاب کاپانی ہزاروں افراد کو نگل جاتا ہے،لاکھوں ایکڑ ز پر کھڑی فصلوں کو بہا لے جاتاہے، لاکھوں افراد کو بے گھر کرکے بے یارو مد گار چھوڑ جاتا ہے۔حکمران سارا سال یہ رونا روتے رہتے ہیں کہ بارشیں کم ہوئیں جسکی وجہ سے پانی کی قلت نے بجلی کی پیداوار متاثر کردی ہے۔عوام دُعا کریں کہ بارشیں ہوں تاکہ پانی کی کمی پوری ہوجائے ۔افسوس کہ جب بارشیں ہوتی ہیں تو ہمارے پاس پانی کو ذخیرہ کرنے کیلئے ڈیمز نا ہونے کے برابرہیں۔وہی پانی جو ہمیں سال بھر بجلی فراہم کرسکتا ہے ،ہمارے کھیتوں کو سیراب کرسکتاہے،ہماری جان کا دشمن بن جاتاہے۔ موجودہ حالات کو دیکھتے ہوئے راقم کی وزیراعظم پاکستان میاں محمد نوازشریف سے اپیل ہے کہ یہ لُکا چھپی کے مذاکرات کو چھوڑ کروہ خود دھرنے والوں کے پاس جائیں اور اُن کو پاکستان کے بہتر اور روشن مستقبل کی خاطر ناراضگی ختم کرنے کی درخواست کریں کیونکہ دھرنے والے کوئی غیرنہیں بلکہ اپنے ہی ہیں ۔اس طرح جناب کی شان کم نہیں ہوگی بلکہ اوربڑھ جائے گی ۔

دھرنے والوں کے تمام جائز مطالبات پورے کریں اور دھرنے والوں سے بھی اپیل ہے کہ وہ بھی رویے میں کچھ لچک پیدا کرنے کی کوشش کریں ،یوں سڑکوں پر معاملات حل نہیں ہونگے ۔ملک بہت سے بحرانوں کا شکار ہے ۔ہم وطنوں خُداراتوڑ دو بت انا کے ،توڑ دو بت خودغرضی کے،توڑ دو بت حکومت پرستی کے،توڑ دو بت اقربا پروری کے، ۔نکل آؤ خود پرستی کے خول سے باہراور ملک و قوم کے حال پہ رحم کرتے ہوئے اپنی اپنی ضد چھوڑ سب مل کر انسانیت کی خدمت کریں تاکہ وطن عزیز کو جلد از جلد بحرانوں سے نکال کر اخلاقی اور اقتصادی ترقی و خوشحالی کی طرف گامزن کیا جاسکے ۔