چکوال(نمائندہ خصوصی)دفتر ضلعی آفیسر زراعت(توسیع) چکوال میں تحصیل چکوال و کلرکہار کے زرعی (توسیع) کارکنان کا ایک تربیتی اجلاس منعقد کیا گیا۔ جس میں تمام زراعت افسران ، زراعت انسپکٹر اور فیلڈ اسسٹنٹ شامل ہوئے۔ اجلاس کی صدارت تحصیل چکوال و کلرکہار کے نئے ڈپٹی ڈسٹرکٹ آفیسر زراعت خالد جاوید ملک نے کی یہ ریفریشر کورس ڈائریکٹر جنرل زراعت(توسیع و اڈاپٹو ریسرچ) پنجاب ، لاہور اور ایگزیکٹو ڈسٹرکٹ آفیسر ایگریکلچر چکوال کے احکامات کے تحت ضلع چکوال کی ہر تحصیل میں ماہانہ ایک دن موجودہ خریف سیزن کے دوران جاری رہے گی۔ اس پروگرام کا مقصد زرعی(توسیع) کارکنان کو جدید زراعت کے بارے میں تازہ ترین معلومات اور آگاہی فراہم کرنا ہے اجلاس میں ڈاکٹر محمد خالد زراعت آفیسر(ٹیکنیکل) چکوال نے خریف فصلات کی جڑی بوٹیوں کا عملی تعارف کرایا۔ ان سے فصلات کو ہونیوالے نقصانات سے آگاہ کیا اور تدارک کے زرعی اور کیمیائی طریقوں کے بارے میں مفصل معلومات فراہم کیں۔ ڈاکٹر محمد عارف اللہ زراعت آفیسر(توسیع) چکوال نے باغات اور سبزیات کی بیماریوں اور ان کو نقصان پہنچانے والے حشرات کا تعارف کرایا۔ اور تدارک کے بارے میں تفصیلاً آگاہی فراہم کی اور شرکاء کے سوالات کے جوابات دئیے۔ تقریب کے صدر خالد جاوید ملک نے تمام فیلڈ سٹاف کو ہدایت کی کہ وہ زمینداران و کاشتکاران سے موثر رابطہ رکھیں اور انہیں جدید زرعی ٹیکنالوجی کے بارے میں معلومات اور تربیت فراہم کریں۔ انہوں نے تنبیہ کی کہ اس ذمہ داری کی انجام دہی میں کسی قسم کی کوتاہی ناقابل برداشت ہوگی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شہریوں کو پانی کی یقینی فراہمی کے لیے ٹیوب ویلوں اور جنریٹر نصب کرنے کا حکم دیدیا۔
چکوال(نمائندہ خصوصی)ڈی سی او چکوال یاور حسین نے اسسٹنٹ کمشنرز اور ٹی ایم اوز کو بجلی کے تعطل کی صورت میں شہریوں کو پانی کی یقینی فراہمی کے لیے ٹیوب ویلوں اور جنریٹر نصب کرنے کا حکم دیدیا۔ یہ حکم انہوں نے آج یہاں ڈسٹرکٹ لوڈ مینجمنٹ کمیٹی اجلاس کی صدارت کرتے ہوئے دیا۔ انہوں نے کہا کہ اس شدید گرمی کے موسم میں شہری غیر اعلانیہ لوڈ شیڈنگ کی وجہ سے پہلے ہی بہت تنگ ہیں۔ ان کو ضلعی انتظامیہ کی طرف سے ریلیف پہنچانا وقت کی اہم ضرورت ہے انہوں نے ٹی ایم اوز کو واضح ہدایات دیتے ہوئے کہا کہ صبح اور شام کے اوقات میں شہریوں کوخصوصی طور پر پانی کی فراہمی کو یقینی بنایا جائے۔ اور اس سلسلے میں کسی بھی گھر محلے یا علاقے سے پانی کی عدم دستیابی کی شکایت نہیں آنی چاہئے انہوں نے انتظامی افسران کو توانائی پالیسی کے مطابق عمارتوں ، سی این جی سٹیشنوں ، پٹرول پمپوں ، شادی ہالوں، ہوٹلز، ریسٹورنٹ، فوڈ پوائنٹ پر سخت نگرانی کرنے اور بجلی کے استعمال میں پچاس فیصد بدچت پر عملدرآمد یقینی بنانے کے لیے خود ان جگہوں پر دورے کر کے ہفتہ وار رپورٹ پیش کرنے کی بھی ہدایت کی ڈی سی او نے واپڈا حکام سے کہا کہ وہ اپنے ایس ای آئیسکو کو مطلع کریں کہ وہ ڈسٹرکٹ لوڈ مینجمنٹ کمیٹی کے اجلاسوں میں شرکت کو یقینی بنائیں ڈی سی او نے کہا کہ عوام الناس کی سہولت کے لیے واپڈا اپنا لوڈ شیڈنگ کا شیڈول میڈیا میں تشہیر کریں۔ جبکہ اے سی صاحبان واپڈا حکام اور دیگر متعلقین کے ساتھ مل کر بجلی کے بحران سے نبٹنے کے لیے اپنے دفاتر میں اجلاسوں کا انعقاد کریں۔ قبل ازیں اے سی صاحبان نے ڈی سی او کو بجلی کی لوڈ شیڈنگ کے حوالے سے اپنے اپنے علاقوں کی رپورٹ پیش کی۔ اجلاس میں ضلعی افسران واپڈا ، پولیس ، عوامی اور تاجر نمائندوں نے شرکت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جنڈیال محمود میں مسلم لیگ ن کو ووٹ نہ دینے پر گائوں کی اکلوتی سڑک بلڈوز کر دی گئی
چکوال(اعجازبٹ)حلقہ پی پی اکیس کے علاقے جنڈیال محمود میں مسلم لیگ ن کو ووٹ نہ دینے پر گائوں کی اکلوتی سڑک بلڈوز کر دی گئی۔ مسلم لیگ ن کے کرتائوں دھرتائوں نے تحریک انصاف کو کامیابی دلوانے پر سڑک اکھیڑ کر گائوں کا داخلی راستہ بند کر دیا۔ اہلیان گائوں کا شدید احتجاج ، مسلم لیگ ن کے خلاف نعرہ بازی،ملہال مغلاں کے قریب واقع گائوں جنڈیال محمود میں حالیہ قومی انتخابات میں مسلم لیگ ن کو شکست ہوئی تھی اور تحریک انصاف نے بھاری اکثریت سے کامیابی حاصل کی تھی۔ جس کا مسلم لیگ ن کی مقامی شخصیات کو اس کا رنج پہنچا اور گزشتہ روز افتخار احمد،آفتاب احمد، نثار احمد ،وغیرہ نے ٹریکٹر چلا کر گائوں کی اکلوتی سڑک کو بلڈوز کر دیا۔جبکہ مین نالہ بھی توڑ ڈالا۔ مذکورہ سڑک ملک تنویر اسلم سیتھی کی پندرہ لاکھ روپے کی گرانٹ سے ڈیڑھ سال قبل تعمیر کی گئی تھی مگر حالیہ انتخابات میں اہلیان گائوں نے تحریک انصاف کو ووٹ دئیے جس پر افتخار احمد وغیرہ نے گائوں کی سڑک کو ٹریکٹر چلا کر توڑ پھوڑ ڈالا۔ ماسٹر منشائ، راجہ قربان حسین،
ملک توفیق ، محمد ریاض ، خالد محمود ، حاجی صبح صادق ، محمد صدیق ، محمد عزیز ، محمد وسم ، عامر، اور یاسر وغیرہ نے اعلیٰ حکام سے نہ صرف نوٹس لینے کا مطالبہ کیا ہے بلکہ ٹی ایم اے کی منظور شدہ سڑک جو کہ سرکاری گرانٹ سے ہی تعمیر ہوئی تھی پر کاروائی کا مطالبہ کیا ہے۔ اہلیان گائوں کا کہنا ہے کہ سیاسی انتقامی کاروائیاں مسلم لیگ ن کو زیب نہیں دیتیں اورجن لوگوں نے گائوں کی سڑک توڑی ہے وہی مسلم لیگ ن کی ناکامی کے ذمہ دار ہیں اوران کے منفی رویے کی وجہ سے اہلیان گائوں میں سخت نفرت پائی جاتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پنجاب کی ہدایات پر ایکسائز اینڈ ٹیکسیشن ڈپارٹمنٹ اور ٹریفک پولیس چکوال کی مشترکہ ٹیمیں تشکیل دی گئی ہیں
چکوال(نمائندہ خصوصی)حکومت پنجاب کی ہدایات پر ایکسائز اینڈ ٹیکسیشن ڈپارٹمنٹ اور ٹریفک پولیس چکوال کی مشترکہ ٹیمیں تشکیل دی گئی ہیں۔ جو کہ اپلائیڈ فار موٹر سائیکلوں ،ناقص سی این جی کٹ رکھنے والی گاڑیوں کے خلاف کاروائی کرینگی۔ جمعرات کے روز آپریشن کا آغاز کیا گیا۔ ایکسائز اینڈ ٹیکسیشن ڈپارٹمنٹ کی طرف سے انسپکٹر چوہدری ذوالفقار اور ٹریفک پولیس کے ایم ایم پی آئی انسپکٹر سید غیور شاہ نے مشترکہ آپریشن کے دوران 77موٹرسائیکلوں کو اپلائیڈ فار اور بغیر سائلنسر ہونے کی وجہ سے بند کیا جبکہ 44 گاڑیوں کے خلاف ناقص سی این جی کٹس استعمال کرنے پر کاروائی کی گئی آپریشن ایک ہفتہ جاری رہے گا۔ اور حکومت پنجاب نے بغیر کسی تفریق کے کاروائی کے احکامات جاری کیے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکوال میں دو نوجوانوں کو موٹر سائیکل پر ویلنگ کرتے ہوئے گرفتار کرلیاگیا۔
چکوال(نمائندہ خصوصی)بھون چوک چکوال میں دو نوجوانوں کو موٹر سائیکل پر ویلنگ کرتے ہوئے گرفتار کرلیا گیا۔ محمد عادل اور بلال حسین سکنائے مہروپیلو موٹر سائیکل پر ویلنگ کر رہے تھے کہ ٹریفک پولیس کے سارجنٹ تنویر ثقلین نے پکڑ لیا اور تھانہ سٹی بند کر دیا۔ جہاں پر دونوں کے خلاف مقدمہ درج کرلیاگیاہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکوال کے ایمرجنسی گیٹ سے ہنڈا سی ڈی70موٹر سائیکل چوری کرلیاگیا۔
چکوال(نمائندہ خصوصی)ڈسٹرکٹ ہیڈ کوارٹر ہسپتال چکوال کے ایمرجنسی گیٹ سے ہنڈا سی ڈی 70موٹر سائیکل چوری کرلیاگیا۔ جمیل مسیح اپنا موٹر سائیکل کھڑا کر کے گیا جسے ادریس ولد مسکین ، اصغر اور یوسف ساکن سمن آباد نے چوری کرلیا۔ پولیس نے مقدمہ درج کر کے تفتیش شروع کر دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسلم لیگ ن کے کارکنان بجلی چوری کرتے رنگے ہاتھوں پکڑے گئے۔
چکوال(نمائندہ خصوصی)لیٹی میں مسلم لیگ ن کے کارکنان بجلی چوری کرتے رنگے
ہاتھوں پکڑے گئے۔ واپڈا اہلکاروں کو تشدد کا نشانہ بنا ڈالا۔ میٹر ریڈر محمد طاہر اور
لائن مین سردار خان نے لیٹی داخلی ڈھوک جمال میں الطاف حسین کو بجلی چوری کرتے ہوئے پکڑ لیا۔اسی دوران ریاض، نور خان ، امیر ، اور دیگر سوٹیاں لے کر پہنچ گئے اور دونوں اہلکاروں پر حملہ کر دیا۔ ٹمن پولیس نے مقدمہ درج کر کے تفتیش شروع کر دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چکوال شہر میں خواجہ سرائوں کے دو گروپوں میں ٹھن گئی
چکوال(نمائندہ خصوصی)چکوال شہر میں خواجہ سرائوں کے دو گروپوں میں ٹھن گئی اور دونوں گروپوں نے ایک دوسرے کے خلاف لنگوٹ کس لیے۔ ایک گروپ کے چھ خواجہ سرائوں نے حملہ کرکے مخالف گروپ کے تین خواجہ سرائوں کو شدید زخمی کر دیا۔مضروب گروپ انصاف کے حصول کے لیے سیشن جج کی عدالت پہنچ گیا۔ سیشن جج کے حکم پر صدر پولیس نے چھ خواجہ سرائوں کے خلاف مقدمہ درج کرلیا۔ نسیم اقبال خواجہ سرا گروپ اور عاشی و ببلی گروپ کے درمیان ٹھن گئی ،عاشی خواجہ سراء کی قیادت میں ببلی ،عاشق ، شمع ، فہیم اور اکبر نے ڈنڈوں سے حملہ کر کے نسیم اقبال کے چیلوں شانی ، عاشی ، اور گوری کو ڈنڈوں کے وارکر کے شدید زخمی کر دیا۔ پولیس کو درخواست دی گئی مگر عاشی گروپ کے بااثر ہونی کی وجہ سے کوئی کاروائی نہ ہوئی جس پر نسیم اقبال نے ڈسٹرکٹ اینڈ سیشن جج چکوال کی عدالت میں پٹیشن دائر کر دی۔ اور فاضل جج کے حکم پر صدر پولیس چکوال نے عاشی و ببلی گروپ کے چھ خواجہ سرائوں کے خلاف مقدمہ درج کر کے ان کی گرفتاری کے لیے چھاپے مارنے شروع کر دئیے ہیں۔
