اسلم شہید خدمات پر اِنہیں سلام پیش کرتے ہیں آج تک تو میری سمجھ میں یہ بات نہیں آئی ہے کہ ہمارے یہاں مسندِ اقتدار پر قدم رکھتے ہی حکمرانوں کی خرمستیاں قابو سے باہر کیوں ہوجاتی ہیں؟ یعنی اقتدارمیں آنے کے بعدجب دیکھو جب اپنے مفادات کے لئے حکمرانوں سے ایسی ایسی انہونیاں ہونے لگتی ہیں جنہیں دیکھ کر ایسا لگنے لگتا ہے کہ جیسے یہ حکمران ہی ایسا ویسا اور کیسا کرنے اور اِن کی تکمیل ہی کے لئے بنے ہیں اور ایسے میں بیچارے عوام تواپنے دانتوں تلے انگلیاں دباکر ہی رہ جاتے ہیں، یوں اِن کے حصے میں تو سِوائے حیرانگی اور پریشانی کے کچھ بھی نہیں آتاہے۔ کہ ہمارے یہاں جو بھی شخص مسندِ حکمرانی پر قابض ہوا ہے، اِس نے سب سے پہلے آئین شکنی کی ہے یااپنے مفادات کے خاطرآئینی ترامیم کو اپنامشغلہ بنایااور جب یہ اپنے اِس مشن سے فارغ ہوا تو پھر اِس نے اِسی بنیاد پر مُلک اور قوم کو ایسے ایسے نقصانات سے دو چار کیا ہے کہ آج تک قوم اِس کا خمیاز ہ بھگت رہی ہے۔
میرے خیال میں ایسا لگتا ہے کہ ہمارے یہاں جو بھی حکمران جب بھی اور جیسے بھی مسندِ اقتدار پر قابض ہوا ہے، اِس نے پہلے اپنے مفادات کا خیال کیا ہے اور اِس کے بعد جب اِسے کبھی مُلک و عوام کا خیال آیا تو اِس نے عوام کو آٹے میں نمک جتنی ریلیف دے کر یہ سمجھ لیا کہ اِس نے عوام کے لئے بہت کچھ کر دیا ہے، اور یوں اِس کی حکمرانی کا ادا ہو گیا ہے، اَب اِس کی لائین صاف ہے، اَب یہ جس طرح سے چاہئے، اپنے مفادات کے لئے مُلک اور قو م کو نچوڑ کر رکھ سکتا ہے، اَب اِس کے نہ آگے کوئی بولنے والاہے اور نہ ہی پیچھے کوئی چیخنے اور چلانے والاہے، اَب سارے ہی حمام میں صرف ایک یہی ننگاہے، اَب جس طرح سے یہ چاہئے حمام کو استعمال کرے۔
ایسے میں اَب یہاں مجھے یہ کہنے دیجئے کہ موجودہ ن لیگ کی حکومت بھی اِن دِنوں ایساہی کچھ کر رہی ہے، حالانکہ اِس حکومت نے ابھی نہ تو مُلک کی بہتری کے لئے کچھ کیا ہے اور نہ ہی عوام کو بجلی و گیس کے بحرانوں سمیت مہنگائی کے اژدھے سے نجات دلانے کے لئے کوئی دیرپا قدم اُٹھایا ہے مگر اِن ساری باتوں کے باوجود بھی ہماری موجودہ حکومت کے وزیراعظم آفس کے اندھوں نے اپنے چاہیتے گریڈ 22 کے افسروں کو اَب تک 236 پلاٹس سیکٹرڈی 12، جی 13 اور آئی ایٹ اسلام آباد میں انتہائی تزک و احتشام سے الاٹ کرچکے ہیں اور اِس بابت اطلاع یہ ہے کہ یہ اِن سارے الاٹمنٹ کا عمل فیڈرل گورنمنٹ ایمپلائز ہاوسنگ فاونڈیشن نے کیا ہے۔ اِس سے کسی کو کوئی سروکار نہیں ہے کہ حکومت نے گریڈ 22 کے اپنے چاہیتے افسران کو پلاٹس کیوں دیئے ہیں مگراپنے حکمرانوں سے عوام یہ تو پوچھ سکتے ہیں کہ صرف گریڈ 22 کے افسران (جن کے پہلے ہی کئی کئی پلاٹس و بنگلے اور گھرہوتے ہیں) ہی کے لئے اتنی مہربانیاں کیوں ہیں؟ کیا مُلک میں اور کوئی نچلے گریڈ کا حکومتی ملازم بے گھر نہیں ہے..؟یا حکومت نے اپنے سارے ملازمین کو پلاٹس الاٹ کر دیئے ہیں ..؟اور جو اَب حکومت اپنے گریڈ 22 کے چاہیتے حکمرانوں کو اسلام آباد کے مہنگے ترین علاقوں میں دو، دوپلاٹس الاٹ کر رہے ہیں۔
جبکہ یہاں افسوس ناک امر یہ ہے کہ اطلاعات کے مطابق مُلک اور قوم کی قسمت بدلنے کی دعویدارجماعت پاکستان مُسلم لیگ (ن) کے سربراہ اور مُلک کے موجودہ وزیراعظم میاں محمد نواز شریف نے اقتدار کے مسندپر اپنے قدم رنجا فرمانے کے فوراََ بعد ہی واضح طور پر یہ اعلان کیا تھا کہ آمر جنرل (ر) پرویز مشرف کی حکومت کے سابق وزیراعظم شوکت عزیز کے دور میں 2006 میں گریڈ 22 کے افسروں کے لئے شروع کی گئی خصوصی پلاٹس اسکیم کو ختم کر دیا گیا ہے، جس کے تحت اِنہیں اسلام آباد میں دوسرے رہائشی پلاٹ کا حقدار قرار دیا گیا ہے، مگر آج وزیراعظم میاں نواز شریف کے اِس اعلان کے باوجود بھی جب وزیراعظم آفس نے اِس خصوصی اسکیم کو کرنے کے لئے کوئی باضابطہ حکم ابھی تک جاری نہیں کیا تو فاؤنڈیشن نے یہ کام کیا، یعنی یہ اسکیم جوں کی توں ابھی بھی موجود ہے اور وزیراعظم آفس نے اپنی یہ ذمہ داری اِنتہائی خوش اسلوبی سے انجام دے کر کئی افسروں کو نواز دیا ہے، اور ایسا لگتا ہے کہ وزیراعظم آفس نے یہ بھی عزم کرلیاہوگااور آئندہ بھی یہ ایسے کارنامے انجام دیتارہے گا، ایسے میں ہمیں یہ اُمید ہے کہ وزیراعظم آفس جہاں گریڈ 22 کے افسروں کو پلاٹس کی باٹنے میں پیش پیش ہے کاش کہ وزیراعظم آفس اِسی طرح مُلک کے اُن غریبوں کے لئے بھی کسی پلاٹ کی الاٹمنٹ کا اجراء کرا دے جو ایک عرصے سے ایک پلاٹ اور اپنی اِسی چند گز کی زمین پر اپنے ایک چھوٹے سے گھر کا خواب دیکھ رہے ہیں، وزیراعظم آفس ایسے غریبوں کے لئے بھی وزیراعظم کو قائل کرے کہ وزیراعظم اسلام آباد سمیت مُلک کے ہر کونے میں غریبوں کے لئے بھی زیادہ نہیں تو صرف ایک پلاٹ کا اعلان کرا کر اِن غریبوں کو بھی جلد اِن کے پلاٹ کی الاٹمنٹ جاری کرا دے اور اِسی طرح گزشتہ دِنوں کراچی کے علاقے عیسیٰ نگری کے قبرستان کے قریب میں پیش آئے دھماکے کے نتیجے میں آہ..! CID,SP چوہدری اسلم کو شہید کر دیا گیا اِس شہید ہونے والے بہادر CID,SP چوہدری اسلم شہید کو پیشہ وارانہ خدمات پر خراج عقیدت پیش کرتے ہوئے حکومت اور عوا م اِنہیں سلام پیش کرتے ہیں اور عوام وزیراعظم میاں محمد نواز شریف سے پُرزور مطالبہ کرتے ہیں کہ وہ اِن کے اہلِ خانہ کے لئے بھی اسلام آباد کے اِس ہی علاقے میں دوپلاٹس دیں جہاں وزیراعظم میاں محمد نواز شریف اور وزیراعظم آفس والے گریڈ 22 کے افسروں کو پلاٹس کی الاٹمنٹ جاری کر رہے ہیں۔
تحریر: محمداعظم عظیم اعظم
azamazimazam@gmail.com
فون نمبر: 03312233463
