اضلاع کی خبریں 04.10.2013

امریکی شٹ ڈائون امریکی تباہی کا پیش خیمہ ہے، پروفیسر سعید کلیروی
گوجرانوالہ(جی پی آئی)مسلمانوں کی دنیا بھر میں ذلت و رسوائی کا سبب دین اسلام کی تعلیمات سے روگردانی اور دوری ہے۔عالم کفر کی ظاہری ترقی کی چکا چوند کے پیچھے لگ کر امت مسلمہ نے اپنا وقار گنوایا ہے،مگر یہ بات ایک مسلمہ حقیقت ہے کہ دنیا بھر میں انسانی بقاء و تحفظ کی ضمانت صرف اور صرف اسلام ہی دے سکتا ہے۔ ان خیالات کاا ظہار مرکزی جمعیت اہلحدیث گوجرنوالہ کے امیر علامہ سعید کلیروی نے کارکنان کے ایک اجلاس سے خطاب کرتے ہوئے کیا، انہوںنے کہا کہ دنیا میں ساری مصنوعی اور انسانی ساختہ نظاموں کو پٹتے ہوئے ہم اپنی آنکھوں سے دیکھ رہے ہیں۔ روس کی تباہی کے ساتھ سوشلزم اور کیمیونزم کے فلسفے اپنی موت آپ مرے اب امریکہ تباہی کے دھانے پر کھڑا ہے، اور اس کے ساتھ ہی سرمایہ دارانہ نظام بھی پیوند خاک ہو نے والا ہے۔انہوں نے کہا کہ امریکہ میں معاشی شٹ ڈائون امریکی تباہی کا پیش خیمہ ہے،ٹریلینز ہنڈرڈ ڈالر کا مقروض امریکہ کس طرح دنیا کی قیادت کر سکتا ہے اور ان شاء اللہ عنقریب روس کی طرح اس کے پرخچے اڑتے ہوئے بھی دنیا دیکھے گی۔ان حالات میں امت مسلمہ کو صف بندی کر نی چاہئے، کیونکہ مستقبل اسلام کا ہے، ایک ایک سال میں یورپ و امریکہ میں ہزاروں مردو خواتین کا اسلام کے دامن میں آنا اس کی واضح دلیل ہے۔علامہ سعید کلیروی نے حکومت کی طرف سے بجلی کی قیمتوں میں اضافے کا نوٹیفیکیشن واپس لینے کے فیصلے کو سراہتے ہوئے گیس کی قیمتوں میں ضافے کے فیصلے کو بھی واپس لینے کا مطالبہ کیا ہے۔اس موقع پر ناظم اعلیٰ سٹی حافظ محمد عمران عریف بھی موجود تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سینئر صحافیوں نے پریس کلب کے تمام عہدیداران کو کلب کی تزین وآرائش دو روز میں مکمل کر کے پریس کلب ممبر شپ فارم کا اجراء کرنے کا حکم دیدیا
گوجرانوالہ(جی پی آئی) سینئر صحافیوں نے پریس کلب کے تمام عہدیداران کو کلب کی تزین وآرائش دو روز میں مکمل کر کے پریس کلب ممبر شپ فارم کا اجراء کرنے کا حکم دیدیا ۔یہ احکامات انہوںنے پریس کلب کے ایک ہنگامی اجلاس میں دیئے ۔سینئر صحافی ملک محمد اکرم،محمد اعظم بٹ ،طارق منیر بٹ ،کریم اللہ گوندل نے پریس کلب کے عہدیداران سے کہا کہ جلدسے جلد کلب کے اندر آفس کو فعال کیا جائے ۔اجلاس میں صدر پریس کلب حافظ شاہدمنیر ،سینئر نائب صدر ڈاکٹر عمر نصیر،نائب صدر محمد عمر بٹ ،جنرل سیکرٹری شفقت عمران،جوائنٹ سیکرٹر ی مظہر ملک ،فنانس سیکرٹری قاری اشرف شاکر نے شرکت کی ۔پریس کلب کے سینئر ایگزیکٹو ممبران نے کہا کہ منگل کے روز وہ از خود پریس کلب کا دورہ کریں گے اور اسی روز ہی کلب کی ممبرشپ فارم کی اجراء کاافتتاح کیا جائے گا۔ دریں اثناء پریس کلب کے نومنتخب عہدیداران کو سیاسی سماجی سرکاری حلقوں کی طرف سے مبارک بادیں دیں جاتی رہیں جس میں ڈسٹرکٹ بار ایسوسی ایشن کے صدر عرفان سعید،جنرل سیکرٹری رانا وقاص ،سابق جنرل سیکرٹری خرم شوکت ،ڈائریکٹر جنرل پنجاب یونیورسٹی گوجرانوالہ پروفیسر ڈاکٹر احسان الحق ملک،ہائیڈروالیکٹرک یونین کے صدر اقبال ڈار،جنرل سیکرٹری ولی الرحمن،موبائل ایسوسی ایشن کے صدر ملک سلیم اور دیگر شامل ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بلدیاتی الیکشن میں حکمت عملی کا مظاہرہ کرینگے: خواجہ طارق جاوید نائیک
گوجرانوالہ( جی پی آئی) راہنما پاکستان مسلم لیگ (ن) وسابقہ ڈپٹی میئر خواجہ طارق جاوید نائیک نے کہا ہے کہ وزیرا عظم میاں نواز شریف وزیراعلیٰ میاں شہباز شریف خداد اد صلاحیتوں اور ملک وقوم کیلئے خدمات کا اعتراف ہے پورے ملک اور عوام میں انکی مقبولیت میں روز بروز اضافہ ہو رہا ہے ۔ان خیالات کااظہار انہوںنے اپنے دفتر میں صحافیوں سے ایک خصوصی ملاقات کے دوران بیان میں کیا۔انہوںنے کہاکہ وزیراعلیٰ میاں شہباز شریف نے عوام کی بھرپور نمائندہ کی اور اپنی قیادت کا پیغام گھر گھر پہنچایا۔جسکی وجہ سے مسلم لیگ ن کو الیکشن میں عظیم کامیابی نصیب ہو ئی۔انہوںنے کہا کہ عوامی منشور ہی کامیابی کی ضمانت ہوتا ہے۔انہوں نے الیکشن کے حوالہ سے بات چیت کرتے ہوئے کہاکہ وزیراعظم میاں نواز شریف انشاء اللہ بلدیاتی الیکشن پر موثر حکمت عملی کا مظاہرہ کرینگے جس میں نوجوان قیادت بھرپور طریقے سے حصہ لے گی اور جس پر نوجوان قیادت ملک وقوم کی ترقی وخوشحالی کے فروغ پر نمائندہ حاصل کر سکیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گوجرانوالہ ملک عاصم نے بلدیاتی انتخابات میں UC16/52سیٹلائٹ ٹاون سے چیرمین کے الیکشن کا فیصلہ کرلیا
گوجرانوالہ (جی پی آئی) گوجرانوالہ ملک عاصم نے بلدیاتی انتخابات میں UC16/52سیٹلائٹ ٹاون سے چیرمین کے الیکشن کا فیصلہ کرلیا ۔ یہ فیصلہ انہوں نے حلقے کے اہل محلہ اور برادریوںکے اصرار پر کیا ۔ ملک عاصم نے اس موقع پر کہا کہ وہ عوام کی خدمت کے لئے ہر وقت دستیاب ہے اور حلقے کی برادریوں نے مجھ پر اعتماد کیا اور میں ان کے اعتماد پر پورا اترو گا ۔ اس موقع پر ندیم، نجم بٹ ، منصور قاضی اور علی شبیر مہر، منسور قاضی ، اظہر خان اور دیگر نے بھی خطاب کیا ۔ انہے یقین دلایا کہ وہ ہر حال میں ملک عاصم کا ساتھ دیں گے۔اور ملک عاصم کی حمایت کا علان کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جمعیت علماء اسلام (س) کے مرکزی ڈپٹی سیکرٹری جنرل مولانا صفدر گھمن قاسمی نے کہا ہے کہ مسلم لیگ ن کی حکومت غریب عوام کا خون چوسنا شروع ہو گئی
گوجرانوالہ (جی پی آئی)جمعیت علماء اسلام (س) کے مرکزی ڈپٹی سیکرٹری جنرل مولانا صفدر گھمن قاسمی نے کہا ہے کہ مسلم لیگ ن کی حکومت غریب عوام کا خون چوسنا شروع ہو گئی،بجلی اور پٹرولیم مصنوعات میں ظالمانہ اضافہ مرے کو مارے شاہ مدار کے مترادف ہے، الیکشن کے دوران غریب عوام کی تقدیر بدلنے کے دعوے کرنے والے اقتدار ملتے ہی فرعون بن جاتے ہیں، عوام کو کڑوی گولی نگلنے کی دھمکی دینے والے وفاقی وزیر اطلاعات کو شرم آنی چاہئے۔ ان خیالات کا اظہار انہوں نے تلونڈی کھجور والی میںکارکنوں کے اجتماع سے خطاب کرتے ہوئے کیا۔مولانا صفدر گھمن قاسمی کا کہنا تھا کہ الیکشن میں مسلم لیگ ن مہنگائی کو 1999ء کے دور میں واپس لے جانے کے دعوے کرتی تھی۔ انہوں نے مطالبہ کیا کہ حکومت فوری طور پر بجلی اور پٹرولیم مصنوعات کی قیمتوں میں حالیہ اضافہ فوری واپس لے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسلم لیگ ن کے ممبر صوبائی اسمبلی حاجی نواز چوہان نے کہا ہے کہ مسلم لیگ ن بلدیاتی انتخابات میں کلین سویپ کریگی
گوجرانوالہ (جی پی آئی) مسلم لیگ ن کے ممبر صوبائی اسمبلی حاجی نواز چوہان نے کہا ہے کہ مسلم لیگ ن بلدیاتی انتخابات میں کلین سویپ کریگی، عوامی خدمت کا جذبہ لئے میاں برادران کی پوری ٹیم ملک کو بحرانوں کی دلدل سے نکالنے میں کوشاں ہیں، سابقہ حکمرانوں نے ذاتی مفادات کی خاطر تمام ادارے تباہ کردیئے، انشاء اللہ مسلم لیگ ن عوام کے تعاون سے بحرانوں پر ضرور قابو پا لے گی۔ ان خیالات کا اظہار انہوں نے حافظ آباد روڈ پر کارکنوں کے اجتماع اور میڈیا سے گفتگو کرتے ہوئے کیا۔ چودھری نواز چوہان کا کہنا تھا کہ وزیراعظم میاں نواز شریف کی جانب سے نواجونوں کے لیے اربوں روپے کی سکیموں کا اعلان انتخابی وعدوں کی تکمیل اور خدمت کا ایجنڈا پوراکرنے کی جانب بڑا قدم ہے۔ ان کا کہنا تھا کہ بلدیاتی انتخابات میں مسلم لیگ ن کے کارکنان بھرپور کامیابی حاصل کر کے گلی اور محلہ کی سطح پر عوامی خدمات کے ایک نئے دور کا آغاز کریں گے۔ اس موقع پر تقریب سے بیرسٹر عمر نواز چوہان، عبدالحفیظ چٹھہ ودیگر نے بھی خطاب کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
7 اکتوبر کو ضمنی انتخابات کے پیش نظر فیصل آباد اور ڈی جی خان میں مقامی تعطیل ہو گی
لاہور(جی پی آئی) حکومت پنجاب نے 7 اکتوبر بروز سوموار کو ضمنی انتخابات کے پیش نظر فیصل آباد اور ڈی جی خان میں مقامی تعطیل کا اعلان کیا ہے تاکہ ووٹرز آسانی سے اپنا حق رائے دہی استعمال کر سکیں۔ حکومت نے اس سلسلے میں ضروری نوٹیفکیشن جاری کر دیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شریف برادران کا مشن ذاتی مفادات نہیں قوم کی تقدیر سنوارنا ہے:ملک احسان گنجیال
لاہور (جی پی آئی) مسلم لیگ ن کے رہنما چیئرمین امن کمیٹی پنجاب ملک احسان گنجیال فرسٹ ایڈ جنرل پر یکٹیشنرز پنجاب کے صدر بلدیاتی امیدوار برائے چیئرمین یونین کو نسل 136 ڈاکٹر ندیم اشرف نے کہا ہے کہ شریف برادران کا مشن ذاتی مفادات نہیں بلکہ ملک و قوم کی تقدیر سنوارنا ہے مسلم لیگ ن کی منزل کبھی اقتدار نہیں رہی بلکہ اقتدار میں آکر غریب عوام کی خدمت و پاکستان کی بقاء و سلامتی و ترقی اور خوشحالی کیلئے اقدامات کئے ہیں یہی وجہ ہے کہ عوام نے مسلم لیگ ن کو بھاری مینڈیٹ دیا ہے ان خیالات کا اظہار یونین کونسل 136 بینک سٹاپ میں بلدیاتی الیکشن کے سلسلہ میں معززین علاقہ و تاجر برادری کی کارنر میٹنگ سے خطاب کر تے ہو ئے کیا انہوں نے کہا کہ پاکستان کو درپیش مسائل کو فوری طور پر حل کر کے عوام کو حقیقی ریلیف کی فراہمی کو یقینی بنایا جائیگا اگر سابقہ حکمرانوں نے ذاتی مفادات کی بجائے ملکی مفادات پر کام کیا ہو تا تو آج ہم خوشحال زند گیا ں گزار رہے ہوتے سابق حکمرانوں نے5 برسوں میں صرف تجوریاں بھریںاندھیروں اور قرضوں میں ڈوبے پاکستان کی یہ حالت زرداریوں کے ہاتھوں ہوئی ہے پیپلزپارٹی اور اس کی اتحادی جماعتوں نے انتخابات میں شکست کے بعد عوام کو گمراہ کرنے کا حلف اٹھایا ہے صدرانجمن تاجران بینک سٹاپ امیدوار برائے چیئرمین ڈاکٹر ندیم اشرف نے حلقہ و تاجر برادری کے مسائل کا ذکر کر تے ہو ئے کہا کہ یونین کونسل نمبر 136 بینک سٹاپ میں بلدیاتی اداروں کی جانب سے گزشتہ کئی برسوں سے کوئی ترقیاتی کام نہیں ہوا تاہم علاقے سے منتخب رکن قومی اسمبلی و صوبائی کے فنڈز سے گلیوں اور سڑکوں کی کارپیٹنگ اور سیوریج کی نئی لائن ڈالی گئی ہے ۔اتحاد پارک یونین کو نسل 136 کے مارکیٹوں میں سٹریٹ لائٹ خراب ہو نے کی وجہ سے بینک سٹاپ مارکیٹ قبرستان کا منظر پیش کر رہا ہے ۔بازار ،سڑکوں اور گلیوں میں اندھیرے کا فائدہ اٹھا کر جرائم پیشہ عناصر شہریوں کو موبائل فون، نقدی اور قیمتی اشیا سے محروم کر دیتے ہیں روڈ جگہ جگہ سے ٹوٹ پھوٹ کا شکار ہے اور اس پر مختلف مقامات پر بڑے بڑے گڑھے پڑے ہوئے ہیں۔ اندھیرے میں سڑک پر پڑے گڑھوں کی وجہ سے کئی حادثات بھی ہوچکے ہیں۔ مکینوں نے متعلقہ انتظامیہ سے مطالبہ کیا ہے کہ فوری طور پر سڑکوں کی مرمت کروائی جائے تاکہ شہری آئے روز کے حادثات سے بچ سکیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بجلی اور پٹرولیم مصنوعات کی قیمتوں میں اضافے کے خلا ف جماعت اسلامی کے لاہور بھر میں مظاہرے ،قیمتوں میں اضافہ واپس لینے کا مطالبہ
لاہور (جی پی آئی) امیر جماعت اسلامی پا کستان سید منو ر حسن کی ہدایت پر جما عت اسلامی لا ہورکے زیر اہتما م لاہور کے مختلف علا قوں میں مہنگائی کے خلا ف مظاہرے کیے گئے ۔این اے 128کے زیر اہتما م بڑا مظاہرہ منصورہ ملتان روڈ پر ہو ا ،جس سے جماعت اسلامی پا کستان کے سیکرٹرجنر ل لیا قت بلوچ اورذکراللہ مجا ہد نے خطاب کیا ۔مسجد شہداء ،شاہدرہ ،سمن آباد اور دیگر علا قوں میں کا رکنا ن جما عت اسلا می نے نما ز جمعہ کے بعد احتجا جی مظاہرے کیے اور بجلی اور پٹرولیم کی مصنو عا ت میں بے پنا ہ اضافے کی شدید مذمت کر تے ہوئے نعرہ با زی کی ۔مظاہرین نے ہا تھو ں میں پلے کا رڈ ز اور بینرز اٹھا رکھے تھے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیر اعلی شہباز شریف کا فیصل آباد میں ایم پی اے اور ٹریفک وارڈن کے جھگڑے کا نوٹس، رپورٹ طلب
لاہور(جی پی آئی)وزیر اعلی پنجاب محمد شہباز شریف نے فیصل آباد میں ایم پی اے اور ٹریفک وارڈن کے درمیان جھگڑے کے واقعے کانوٹس لیتے ہوئے آرپی او فیصل آباد سے فوری رپورٹ طلب کر لی ہے ــوزیر اعلی نے ہدایت کی کہ رپورٹ میں واقعہ کے تمام حقائق کو سامنے لایا جائے ـ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
وزیر اعلی شہباز شریف کا معروف صنعت کار حاجی بشیر احمد کے انتقال پر اظہار تعزیت
لاہور(جی پی آئی)وزیر اعلی پنجاب محمد شہباز شریف نے معروف صنعت کار حاجی بشیر احمد کے انتقال پر گہرے دکھ اور افسوس کا اظہار کیا ہے ـ وزیر اعلی نے اپنے تعزیتی پیغام میں دعا کی کہ اللہ تعالی مرحوم کی روح کو جوار رحمت میں جگہ عطا فرمائے اور پسماندگان کو یہ صدمہ صبر و حوصلہ سے برداشت کرنے کی توفیق دے ـ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سربراہ پاکستان سُنی تحریک انجینئر محمدثروت اعجازقادری کی اپیل پر بجلی اورپٹرول کی قیمتوں میں ہوشربااضافے کیخلاف ملک گیریوم احتجاج منایاگیا
لاہور(جی پی آئی) سربراہ پاکستان سُنی تحریک انجینئر محمدثروت اعجازقادری کی اپیل پر بجلی اورپٹرول کی قیمتوں میں ہوشربااضافے کیخلاف ملک گیریوم احتجاج منایاگیا۔نمازجمعہ کے بعد ملک بھرکے تمام بڑے چھوٹے شہروں میں احتجاجی مظاہرے اورریلیاں نکالی گئیں۔ اس سلسلے میںمغل پورہ چوک میں احتجاجی جلسہ کیا گیا۔جس سے خطاب کرتے ہوے اڈویزنل صدر مولانا مجاہدعبدالرسول نے کہا کہ پٹرول و بجلی کی قیمتوں میں اضافے سے مہنگائی کا سونامی آ چکاہے ۔ حکومت تاویلوں اور اپیلوں کی بجائے سپریم کورٹ کی ہدایات پر عمل کر کے عوام کوفوری ریلیف دے ۔حکومت ہے مہنگائی پر قابوپانے کی بجائے اس میںمسلسل اضافہ کیے جا رہی ہے۔ حکومت اپنے اخراجات اور بجٹ خسارے کا بوجھ عوام پر منتقل کرنے سے باز رہے اور بجلی اور تیل کی قیمتوں میں حالیہ اضافہ فوری واپس لے۔ حکومت نے ابتدائی ایام میں ہی قوم کا رہاسہا خون نچوڑلیا ہے۔دہشتگردی کے واقعات دن بدن بڑ رہے ہیں۔حکومتی ناکام پالیسیوں کے سبب پاکستان در حقیقت مسائلستان بن چکا ہے۔ سٹی صدر سردار محمد طاہر ڈوگر شیخ محمد نواز قادری دیگر رہنماوں نے بجلی اور پٹرولیم مصنوعات کی قیمتوں میں حالیہ اضافے کو ظالمانہ قرار دیتے ہوئے کہا کہ وفاقی وزیر پانی وبجلی نرخوں میں اضافے کیلئے بے تُکی تاویلیں پیش کررہے ہیںجوکہ18 کروڑعوام کے زخموں پر نمک چھڑکنے کے مترادف ہے۔ اگر حکومت عوام کے زخموں پر مرہم رکھنے کی اہلیت نہیں رکھتی تو کم از کم نمک بھی نہ چھڑکے ۔انہوں نے مطالبہ کیا کہ پاکستان کے غریب اور محنت کش افراد کو جینے کا حق دیا جائے مہنگائی کو کنٹرول کیا جائے ، تیل ، گیس اور بجلی سستے داموں فراہم کرنے کیلئے ہنگامی بنیادوں پر اقدامات کیے جائیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان کرکٹ بورڈ لاہور میں کرکٹ کے انٹرنیشنل مقابلوں کا اہتمام کرے: شہباز شریف
لاہور(جی پی آئی)وزیراعلیٰ پنجاب محمد شہباز شریف نے کہا ہے کہ پاکستان کرکٹ بورڈ صوبائی دارالحکومت میں کرکٹ کے بین الاقوامی مقابلوں کا اہتمام کرے، پنجاب حکومت مکمل سکیورٹی فراہم کرے گی اور ان مقابلوں کیلئے بہترین انتظامات کئے جائیں گے۔ پاکستان میں کھیلوں کے بین الاقوامی مقابلوں کا پھر سے انعقاد بے حد ضروری ہے تاکہ ہم پرامن ماحول میں ایسے مقابلوں کے انعقاد کو یقینی بنا کر دنیا کو دکھا سکیں کہ پاکستان بین الاقوامی ایونٹس کے انعقاد کیلئے محفوظ ملک ہے۔ پاکستان کرکٹ ٹیم نے کرکٹ کی تاریخ میں بڑی بڑی کامیابیاں حاصل کی ہیں۔ کھلاڑی محنت سے کھیلیں تو پاکستان کی کرکٹ ٹیم جنوبی افریقہ میں بھی آئندہ ہونے والی سیریز میں کامیابی حاصل کرسکتی ہے۔وہ آج یہاں قذافی سٹیڈیم میں چیف منسٹر الیون اور چیئرمین پی سی بی الیون کے مابین کھیلے گئے میچ کی تقریب تقسیم انعامات کے موقع پر خطاب کر رہے تھے۔ چیئرمین پاکستان کرکٹ بورڈ نجم سیٹھی، صوبائی وزیر تعلیم و سپورٹس رانا مشہود احمد خان، ڈائریکٹر جنرل پی سی بی جاوید میاں داد، پاکستانی ٹیم کے مینجر معین خان، کوچ ڈیوڈ واٹمور بھی اس موقع پر موجود تھے۔وزیراعلیٰ محمد شہباز شریف نے تقریب سے خطاب کرتے ہوئے کہا کہ جنوبی افریقہ کی سیریز سے قبل کرکٹ میچ کا انعقاد پاکستانی کرکٹ بورڈ کی اچھی کاوش ہے۔ پاکستانی کرکٹ ٹیم نے کرکٹ کے میدان میں بڑی بڑی فتوحات حاصل کی ہیں اور ملک و قوم کا نام روشن کیا ہے۔ جنوبی افریقہ کے ساتھ اچھے کرکٹ میچ ہوں گے۔ ہار جیت اللہ کے ہاتھ میں ہے پاکستانی ٹیم محنت کرے، جان لڑائے قوم کی دعائیں اس کے ساتھ ہیں اور انشاء اللہ ٹیم سیریز جیت کر وطن واپس لوٹے گی۔ انہوں نے کہا کہ کھلاڑی کسی بھی ملک کے حقیقی سفیر ہوتے ہیں جو دنیا میں اپنے ملک کی نمائندگی کرتے ہیں۔ انہوں نے کہا کہ قذافی سٹیڈیم میں پریکٹس میچ کا انعقاد پاکستان کرکٹ بورڈ کے چیئرمین نجم سیٹھی، جاوید میاں داد، معین خان، کوچ اور بورڈ کے عہدیداران کی ایک اچھی کاوش ہے۔ میں کرکٹ بورڈ کے چیئرمین سے کہتا ہوں کہ وہ بین الاقوامی میچوں کے انعقاد کا اہتمام کریں، انہیں جو بھی تعاون درکار ہوگا دیں گے۔ انہوں نے کہا کہ پنجاب حکومت صوبے میں کھیلوں کے فروغ کیلئے ٹھوس اقدامات کر رہی ہے۔ صوبے بھر میں کھیلوں کے میدان بنائے جا رہے ہیں۔ انہوں نے ماڈل ٹائون میں بنائے گئے خواتین کیلئے کرکٹ گرائونڈ کے انتظامات پی سی بی کے سپرد کرتے ہوئے کہا کہ یہاں خواتین کو کرکٹ کی کوچنگ اور انہیں کھیل کی سہولیات فراہم کرنے کے انتظامات کئے جائیں۔قبل ازیں وزیراعلیٰ قذافی سٹیڈیم پہنچے اور کھلاڑیوں سے ان کا تعارف کرایا گیا۔ فضا میں غبارے اور کبوتر چھوڑے گئے۔ چیف منسٹر الیون اور چیئرمین پی سی بی الیون کے مابین کھیلا گیا 3 روزہ میچ برابر رہا۔ وزیراعلیٰ نے دونوں ٹیموں کے کپتانوں کو ٹرافی دی۔ چیف منسٹر الیون اور چیئرمین پی سی بی الیون کے کپتانوں عمر امین اور یونس خان نے اس موقع پر اظہار خیال کرتے ہوئے کہا کہ ایسے میچز کا انعقاد خوش آئند ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان مسلم لیگ لائرز فورم پنجاب کے عہدیداران کی مسلم لیگی وکلاء کو مبارکباد
لاہور(جی پی آئی) پاکستان مسلم لیگ لائرز فورم پنجاب کے عہدیداران جاوید قصوری اور خاور فاروق ایڈووکیٹ کو ڈپٹی اٹارنی جنرل پاکستان جبکہ احسان لحق مغل’ عبدالرئوف چیمہ اور محمود الحسن گیلانی ایڈووکیٹس کو سٹینڈنگ کونسل آف پاکستان کا رکن بننے پر دلی مبارکباد پیش کی ہے۔ مسلم لیگ (ن) پنجاب کے نائب صدر ناصر محمود چوہدری’ انفارمیشن سیکرٹری زاہد سلمان منہاس’ سید ظفر عباس گیلانی صدر لاہور اور شاہد صادق سیکرٹری جنرل لاہور و دیگر ممبران نے مسلم لیگ لائرز فورم کی جانب سے مسلم لیگ (ن) کے قائد میاں محمد نواز شریف وزیر اعظم پاکستان’ میاں محمد شہباز شریف وزیر اعلیٰ پنجاب اور نصیر احمد بھٹہ صد ر پاکستان مسلم لیگ لائرز فورم کا مذکورہ مسلم لیگی وکلاء کو اہم منصب پر فائز کرنے اور انہیں اہم ذمہ داریاں سونپنے پر شکریہ ادا کرتے ہوئے اپنے بھرپور تعاون کا یقین دلایا ہے۔ دریں اثناء ڈویلپمنٹ آف نیشن کے صدر ایس امجد اور ماڈل فلاحی سوسائٹی کوٹ لکھپت کے سیکرٹری میاں عبدالماجد قصوری نے بھی انہیں مبارکباد دی ہے اور مسلم لیگی قیادت کا شکریہ ادا کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان تحر یک انصاف کی سینئر رہنما جوائنٹ سیکرٹری پنجاب ثانیہ کامران اور لبنیٰ ملک نے کہا ہے کہ پاکستان مسلم لیگ ( ن) نے عوام سے کئے گئے و عدے جھوٹے ثابت
لاہور (جی پی آئی) پاکستان تحر یک انصاف کی سینئر رہنما جوائنٹ سیکرٹری پنجاب ثانیہ کامران اور لبنیٰ ملک نے کہا ہے کہ پاکستان مسلم لیگ ( ن) نے عوام سے کئے گئے و عدے جھوٹے ثابت کر کے یہ پیغام دیا ہے کہ وہ عوام کے لئے کس حد تک سوچتے ہیں جو کہ پوری قوم کے سامنے آچکا ہے کہ عالمی منڈ یوں میں پیٹرولیم مصنو عات کی قیمتوں میں کمی ہو ئی ہے جبکہ پاکستان میں قیمتوں میں کمر توڑ اضافہ کر دیا گیا ہے انہوں نے کہا کہ پاکستان مسلم لیگ ( ن) کے اپنے ہی کارکنان اپنے قائدین کو غلط کہتے ہوئے سراپاء احتجاج ہیں کیو نکہ عوام کو اب تک ریلیف نام کی کوئی چیز نہیں ملی بلکہ پیٹرولیم مصنو عات کی قیمتوں میں اضافے سے مہنگائی میں اضافے کے باعث اس عید پر عوام کی خوشیاں چھین لی گئی ہیں، شاہ خر چ حکمران سرکاری دورے اور دیگر پروٹوکول کے مزے لے رہے ہیں جو کہ عوام کے گئے ٹیکسوں کا پیسہ ہے انہوں نے کہا کہ پاکستان کی عوام کو اب معلوم ہو گیا ہے کہ کون سی جماعت پاکستان کو بحرانوں سے نکالتے ہوئے ریلیف دئے سکتی ہے وہ پاکستان تحر یک انصاف ہے اور اب جھوٹے وعدے کر نے والوں کو عوام کسی صورت قبول نہیں کر ئے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مخیر حضرات بلوچستان کے زلزلہ متاثرین کی دل کھول کر مدد کریں: وزیراعلی شہباز شریف
لاہور(جی پی آئی)وزیراعلی محمد شہباز شریف سے آج یہاں مخیر حضرات اور مختلف اداروں کے سربراہوں نے ملاقات کی اور انہیں وزیراعظم کے خصوصی فنڈ برائے امداد زلزلہ متاثرین بلوچستان کیلئے ایک کروڑ 55 لاکھ روپے کے چیک پیش کئےـ لاہور جم خانہ کلب کی جانب سے چیئرمین سلمان صدیق نے ایک کروڑ، ممبر صوبائی اسمبلی شیخ علائوالدین نے 20 لاکھ، ایس ایم تنویر نے سندر انڈسٹریل اسٹیٹ کی جانب سے 25 لاکھ اور ڈالر ایسٹ کمپنی کے میاں اعجاز نے 10 لاکھ کا چیک پیش کیاـ وزیراعلی محمد شہباز شریف نے اس موقع پر گفتگو کرتے ہوئے کہا کہ مخیر حضرات کا زلزلہ متاثرین کیلئے عطیات دینے کا جذبہ قابل ستائش ہےـ مشکل کی گھڑی میں بلوچستان کے بہن بھائیوں کی امداد ہمارا قومی فریضہ ہے اور پنجاب حکومت ان کی امداد اور بحالی کے کام میں پیش پیش ہےـ انہوں نے کہا کہ مخیر حضرات کے عطیات سے متاثرہ علاقے میں سوات کی طرح جدید ہسپتال قائم کیا جائے گاـ پنجاب حکومت نے زلزلہ متاثرین کی امداد کیلئے جامع پروگرام مرتب کیا ہے جس کے تحت روزانہ کی بنیاد پر ضروری اشیاء بھجوائی جا رہی ہیں اور امدادی اشیاء کی ترسیل و تقسیم کی مانیٹرنگ کیلئے رحیم یار خان میں بیس کیمپ جبکہ لسبیلہ میں رابطہ آفس قائم کیا گیا ہےـ انہوں نے مخیر حضرات سے اپیل کی کہ وہ متاثرین کیلئے دل کھول کر عطیات دیںـ مخیر حضرات نے اس موقع پر بات چیت کرتے ہوئے کہا کہ مصیبت میں گھرے بہن بھائیوں کی امداد ہمارا فرض ہے اور ہم ان کی امداد اور بحالی میں کوئی کسر اٹھا نہ رکھیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سُنی تحریک کا بجلی اورپٹرول کی قیمتوں میں اضافے کیخلاف ملک گیریوم احتجاج
راولپنڈی(جی پی آئی) سربراہ پاکستان سُنی تحریک انجینئر محمدثروت اعجازقادری کی اپیل پر بجلی اورپٹرول کی قیمتوں میں ہوشربااضافے کیخلاف ملک گیریوم احتجاج منایاگیا۔نمازجمعہ کے بعد ملک بھرکے تمام بڑے چھوٹے شہروں میں احتجاجی مظاہرے اورریلیاں نکالی گئیں۔ اس سلسلے میں برف خانہ چوک راولپنڈی میں ایک بڑااحتجاجی مظاہرہ کیا گیا ۔احتجاجی مظاہرے کی قیادت ملک عبدالرئوف اور ڈاکٹرطیب رضاقادری نے کی ۔شرکاء سے خطاب کرتے پاکستان سُنی تحریک کے رہنما ملک عبدالرئوف نے کہا کہ حکومت بجلی اورپٹرول کی قیمتوں میں اضافہ واپس لینے کیلئے ٹال مٹول سے کام نہ لے۔ عوام کو ریلیف دینے کیلئے اگر عدلیہ نے ہی تمام فیصلے کرنے ہیں توحکمرانوں کوناہلی تسلیم کرتے ہوئے مستعفی ہو جاناچاہیے۔بجلی کی نئی قیمتوں کے تعین کیلئے دو ہفتوں کاوقت قوم سے سنگین مذاق ہے۔حکمران اپنی ناقص حکمت عملی پر پردہ ڈالنے کیلئے عدلیہ اورقوم کو دھوکہ دے رہے ہیں۔ڈرون حملوں،دہشتگردی،مہنگائی اوربے روزگاری کی ستائی ہوئی قوم کو ریلیف دینے کیلئے حکمرانوں کو فوری اوردوٹوک فیصلے کرنے ہوں گے۔پاکستان سنی تحریک کینٹ کے کوآرڈینیٹرڈاکٹرطیب رضا نے بجلی اور پٹرولیم مصنوعات کی قیمتوں میں حالیہ اضافے کو ظالمانہ قرار دیتے ہوئے کہا کہ وفاقی وزیر پانی وبجلی نرخوں میں اضافے کیلئے بے تُکی تاویلیں پیش کررہے ہیںجوکہ20کروڑعوام کے زخموں پر نمک چھڑکنے کے مترادف ہے۔ اگر حکومت عوام کے زخموں پر مرہم رکھنے کی اہلیت نہیں رکھتی تو کم از کم نمک بھی نہ چھڑکے ۔ انہوں نے مطالبہ کیا کہ حکومت وقت بجلی کی قیمت بڑھانے کی بجائے لائن لاسز کو کنٹرول کرے۔اس موقع پرسُنی تحریک کے کارکنوں نے بجلی اورپٹرولیم کے وفاقی وزراء کیخلاف شدیدنعرے بازی کی اورٹائربھی نذرِ آتش کیے۔درایں اثناء پاکستان سُنی تحریک لاہور کے ڈویژنل صدرمولانامجاہدعبدالرسول خان نے مغل پورہ میں احتجاجی جلسے سے خطاب کرتے ہوئے کہا کہ پٹرول و بجلی کی قیمتوں میں اضافے سے مہنگائی کا سونامی آ چکاہے ۔ حکومت اپنے اخراجات اور بجٹ خسارے کا بوجھ عوام پر منتقل کرنے سے باز رہے اور بجلی اور تیل کی قیمتوں میں حالیہ اضافہ فوری واپس لے۔ پاکستان سُنی تحریک فیصل آبادسٹی کے صدرمحمدآصف رضانے احتجاجی مظاہرے سے خطاب کرتے ہوئے کہا کہ حکومت کی ناکام معاشی پالیسیوں نے عوام کو زندہ درگور کر دیا ہے۔حکومت تاویلوں اور اپیلوں کی بجائے سپریم کورٹ کی ہدایات پر عمل کر تے ہوئے پٹرول و بجلی کی قیمتوں میں اضافے کا ظالمانہ اضافہ واپس لے ۔خیبرپختونخواکے صدرانعام اللہ خان نے پشاور میںسُنی تحریک اوربرادرسُنی تنظیمات کے زیراہتمام نکالی گئی ایک ریلی کے شرکاء سے خطاب کرتے ہوئے کہا کہ تیرہ سال سے بھوکا شیر نے عوام کے منہ سے آخری نوالہ تک چھیننے درپے ہے۔ انتخابات سے قبل قوم کو سبز باغ دیکھانے والوں نے اقتدار میں آ کر انھیںخودکشیاں کرنے پر مجبور کر دیا ہے۔جلیل ٹائون گوجرانوالہ میں احتجاجی مظاہرے سے خطاب کرتے ہوئے ضلعی صدرمحمداکرام بابر اورسٹی صدرحافظ طاہررضانے کہا کہ مہنگائی کے ڈرئون حملوں نے قوم کو زندہ درگورکردیاہے۔مقبولیت کے سروے شائع کرانے والے اپنے 100 دن کا بھی سروے کرائیں۔ حکومت نے ابتدائی ایام میں ہی قوم کا رہاسہا خون نچوڑلیا ہے۔انہوں نے مطالبہ کیا کہ پاکستان کے غریب اور محنت کش افراد کو جینے کا حق دیا جائے مہنگائی کو کنٹرول کیا جائے ، تیل ، گیس اور بجلی سستے داموں فراہم کرنے کیلئے اقدامات کیے جائیں ۔یوم احتجاج کے سلسلے میں علامہ وسیم عباسی نے اسلام آباد ،پیرسیدمبشرحسین شاہ نے گجرات ،ڈاکٹرغلام مرتضیٰ نے سرگودھا،محمدامتیازچٹان نے خوشاب، محمدرضاقادری نے جہلم، ڈاکٹرعمران مصطفی نے ملتان، محمدجہانگیرقادری نے سیالکوٹ ، محمدوسیم قادری نے شیخوپورہ ،محبوب علی سہتو نے سکھر، محمدخالدقادری نے حیدرآباد،التماس صابرنے نواب شاہ،عابدعلی قادری نے بھکر،پیرسیدعثمان حیدرشاہ نقوی نے حافظ آباد ، میانوالی میں اکرام خان شیرانی نے مختلف احتجاجی مظاہروں، ریلیوں اور جلسوں سے خطاب کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
9ڈویژنوں میں سیٹلائٹ فرانزک لیبزقائم کریں گے ، انسداد دہشت گردی کے لئے خصوصی فورس تشکیل دے رہے ہیں
لاہور (جی پی آئی)وزیر اعلی محمد شہباز شریف سے برطانیہ کی سینئر وزیر مملکت برائے خارجہ امور برؤنس سعیدہ وارثی نے آج ایوان وزیر اعلی میں ملاقات کی ـملاقات میں باہمی دلچسپی کے امور اور دوطرفہ تعلقات کے فروغ پر تبادلہ خیال کیا گیا ـصوبائی وزراء شیر علی خان، مجتبی شجاع الرحمن ، رانا مشہود احمد خان،، حمیدہ وحیدالدین ، اراکین اسمبلی ، چیف سیکرٹری ، سیکرٹری داخلہ اور دیگرمتعلقہ حکام بھی اس موقع پر موجود تھےـوزیر اعلی محمد شہباز شریف نے برطانوی سینئر وزیر مملکت برائے امور خارجہ برؤنس سعیدہ وارثی اور ان کے وفد سے گفتگو کرتے ہوئے کہا کہ پاکستان اور برطانیہ کے مابین قریبی دوستانہ اورتاریخی تعلقات ہیں پاکستان برطانیہ کو اپنا قریبی دوست اور حقیقی ترقیاتی شراکت دار سمجھتا ہے پاکستان کی ترقی خصوصا تعلیم اور صحت کے شعبے میں برطانیہ کا کردار قابل ستائش ہے برؤنس سعیدہ وارثی کے دونوں ممالک کے مابین تعلقات کو مزید فروغ دینے کے حوالے سے کردار کو قدر کی نظر سے دیکھتے ہیںانہوںنے کہا کہ پاکستان کو دہشت گردی، توانائی سمیت مختلف چیلنجز کا سامنا ہے توانائی کے بحران پر قابو پانے کے لئے ہنگامی بنیادوں پر اقدامات اٹھائے جا رہے ہیںحکومت توانائی کی پیداوار میں اضافے اور لائن لاسز پر قابو پانے کے ساتھ ساتھ بجلی اور گیس کی چوری روکنے کے لئے مربوط حکمت عملی پر عمل پیرا ہے اور اس ضمن میں شارٹ ٹرم ، میڈیم ٹرم اور لانگ ٹرم پالیسی تشکیل دی گئی ہے ـگڈانی میں کوئلے سے بجلی پیدا کرنے کا منصوبہ بنایا گیا ہے جبکہ بھاشا اور داسو ڈیم پر کام جاری ہے تھر میں کوئلے کے وسیع ذخائر موجود ہیں جبکہ پنجاب میں بھی کوئلہ پایا جاتا ہے بائیوگیس اور بائیو ماس کے ذریعے توانائی کے حصول کے لئے اقدامات اٹھائے جا رہے ہیں اور ان دونوں ذرائع سے پنجاب میں توانائی حاصل کی جا سکتی ہے شوگرملوں کے ذریعے گنے کے پھوگ کو استعمال میں لا کر بجلی حاصل کرنے کی منصوبہ بندی کر لی گئی ہے اسی طرح بہاولپور میں قائد اعظم سولر پارک دس ہزار ایکڑ اراضی پر قائم کیا جا رہا ہے جہاں انفراسٹرکچر کی فراہمی کا کام تیزرفتاری سے مکمل کیا جائے گا یورپ ، چین اور نارتھ امریکہ کی متعدد کمپنیوں نے قائد اعظم سولر پارک میں منصوبے لگانے میں دلچسپی کا اظہار کیا ہے جبکہ پنجاب حکومت اپنے وسائل سے پہلے مرحلے میں ایک سو میگا واٹ سولر پاور کا منصوبہ لگائے گی اور یہ منصوبہ انتہائی تیز رفتاری سے اگلے سال کے شروع میں مکمل کیا جائے گا انہوںنے بتایا کہ بجلی کے منصوبے لگانے کے ساتھ ساتھ سسٹم کی اپ گریڈیشن کا کا م بھی جاری ہے تا کہ بجلی کی تقسیم و ترسیل کو بھی یقینی بنایا جا سکے نندی پور پاور پراجیکٹ پر کام شروع کر دیا گیا ہے جس سے 480 میگا واٹ بجلی حاصل ہوگیموجودہ حکومت کو اقتدار میں آئے صرف چار ماہ ہوئے ہیں اور ہم ایک درست وژن سے صحیح سمت کی جانب بڑھ رہے ہیں اور مجھے امید ہے کہ حکومت کے اقدامات سے بجلی کے بحران پر قابو پانے میں مدد ملے گی انہوںنے کہا کہ برطانیہ اور عالمی برادری سے امداد نہیں بلکہ تجارت کے خواہشمند ہیں اور سرمایہ کاری کے فروغ کے لئے غیر ملکی سرمایہ کاروں کو ہر قسم کی سہولیات فراہم کی جائیں گی انہوںنے کہا کہ ڈیفڈ(DFID) کے تعاون کے تعلیمی شعبہ میں انقلابی اقدامات متعارف کرائے گئے ہیں صوبے کے اٹھارہ اضلاع میں ہنر مند افرادی قوت کی تیاری کے لئے پروگرام پر عملدرآمد کیا جا رہا ہے اور ہزاروں نوجوانوں کو فنی تربیت فراہم کی گئی ہے اور آج یہ نوجوان با عزت روزگار کما رہے ہیںـسکل ڈویلپمنٹ پروگرام کا دائرہ کار مزید بڑھانے کا پروگرام بنایا گیا ہے ـانہوںنے کہا کہ پاکستان کو دہشت گردی کے چیلنج کا بھی سامنا ہے اور اس حوالے سے آل پارٹیز کانفرنس میں متفقہ لائحہ عمل مرتب کیا گیا ہے ـ دہشت گردی کے خلاف جنگ میں پاکستان نے بیش بہا قربانیاں دی ہیںـ صوبے میں انسداد دہشت گردی کی خصوصی فورس قائم کی جا رہی ہے جبکہ ملک کو غیرقانونی اسلحہ سے پاک کرنے کے لئے بھی اقدامات اٹھائے جا رہے ہیں ـکراچی میں قیام امن کے لئے وفاقی حکومت صوبائی حکومت کے ساتھ مل کر ٹارگٹڈ آپریشن کر رہی ہے جس کے مثبت نتائج برآمد ہو رہے ہیں انہوںنے کہا کہ ملک میں امن ہو گا تو سرمایہ کاری آئے گی جس سے روزگار کے مواقع پیدا ہوں گے ـانتہاپسندی اور دہشت گردی سے اجتماعی سیاسی سوچ اور مشترکہ بصیرت کے ساتھ نمٹا جائے گا انہوںنے بتایا کہ پنجاب میں سنگین جرائم کی تفتیش میں مدد کے لئے سٹیٹ آف آرٹ فرانزک سائنس لیبارٹری قائم کی گئی ہے اور پنجاب حکومت ترکی کے تعاون سے سیٹلائٹ فرانزک سائنس لیبارٹریز کا دائرہ کار مزید 9 ڈویژنوں تک وسیع کر رہی ہے ـانہوںنے کہا کہ حالات مشکل ضرور ہیں لیکن کوئی وجہ نہیں کہ سیاسی عزم اور پختہ ارادے کے ذریعے صورتحال کو بہتر بنایا نہ جا سکے ـ وزیر اعلی نے کہا کہ پنجاب حکومت نے نومبر کے آغاز میں لندن میں انرجی روڈ شو منعقد کرنے کا فیصلہ کیا ہے جس کے لئے برطانوی حکومت کا تعاون کلیدی کردار ادا کرے گاـانہوںنے کہا کہ توانائی سیکٹر میں ملکی اور غیر ملکی سرمایہ کاروں کو سہولیات فراہم کرنے کے لئے ون ونڈو آپریشن شروع کیا گیا ہے تا کہ سرمایہ کاروں کو کسی قسم کی پریشانی کا سامنا نہ کرنے پڑے توانائی سمیت تمام شعبوں میں انتہائی شفافیت اور میرٹ پر معاہدے کئے جا رہے ہیں انہوںنے کہا کہ پاکستان کے عوام نے عام انتخابات میں پاکستان مسلم لیگ (ن) کو بھاری مینڈیٹ دیا ہے اور عام انتخابات سے لیکر انتقال اقتدار تک جمہوریت کے تمام مراحل خوش اسلوبی سے طے ہوئے ہیں عوام کی خدمت حکومت کا نصب العین ہے یہی وجہ ہے کہ حکومت انتہائی تیز رفتاری کے ساتھ معاشی اصلاحات کے ساتھ توانائی بحران پر قابو پانے کے لئے پرعزم ہے انہوںنے کہا کہ بیرون ملک مقیم پاکستانی ملک کا قیمتی اثاثہ ہیں جو وطن سے دوررہ کر ملک کی خدمت کر رہے ہیں پاکستان مسلم لیگ (ن) بیرون ملک پاکستانیوں کو قدر کی نگاہ سے دیکھتی ہے برطانوی سینئر وزیر برؤنس سعیدہ وارثی نے زلزلے کے باعث بلوچستان میں ہونے والے جانی و مالی نقصانات اور پشاور میں دہشت گردی کے واقعات میں قیمتی انسانی جانوں کے ضیاع پر اظہار افسوس کیا اورکہا کہ پاکستان اور برطانیہ کے تعلقات کو معاشی میدان میں مزید فروغ دینے کی ضرورت ہے اور ہماری خواہش ہے کہ دونوں ملکوں کے درمیان تجارتی حجم 2015 ء تک 3 ارب پاؤنڈ تک لیجایا جائےـانہوںنے کہا کہ معاشی اصلاحات کر کے حکومت نے جرات مندانہ اقدام کیا ہے جس پر میں مبارکباد پیش کرتی ہوںـ اس سے ظاہر ہوتا ہے کہ مسلم لیگ (ن) کی حکومت ملک و قوم کے روشن مستقبل کا سوچ رہی ہے ـ انہوںنے کہا کہ لندن میں انرجی روڈ شو کے انعقاد کے حوالے سے پنجاب حکومت کے ساتھ مکمل تعاون کیا جائے گاـانہوںنے پنجاب میں توانائی سیکٹر میں تعاون کے لئے یقین دہانی بھی کرائیـوزیر اعلی نے برطانوی سینئر وزیر برؤنس سعیدہ وارثی اور ان کے تجارتی وفد کے اعزاز میں ظہرانہ بھی دیا اس موقع پر پنجاب حکومت کی جانب سے برطانوی وفد کے ارکان کو صوبے میں سرمایہ کاری ، توانائی کے شعبہ میں منصوبے لگانے اور سرمایہ کاروں کے لئے فراہم کی جانے والی سہولیات کے حوالے سے بریفنگ بھی دی گئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یو نیو رسل ہیو من رائٹس آرگنائز یشن انٹر نیشنل کا انتخابی اجلاس زیر صدارت مرکزی صدر سید حفیظ سبزواری منعقد ہوا
اسلام آباد (جی پی آئی) یو نیو رسل ہیو من رائٹس آرگنائز یشن انٹر نیشنل کا انتخابی اجلاس زیر صدارت مرکزی صدر سید حفیظ سبزواری منعقد ہوا ۔اجلاس میں مرکزی ،صوبائی عہدیداروں سمیت سینٹرل ایگز یکٹو کمیٹی کے چیئر مین اور ممبران نے شرکت کی ۔اجلاس میں سال 2014کے لئے انتخا بات کرانے کی منظو ری دی گئی۔اجلاس سے خطاب کرتے ہوئے سید حفیظ سبزواری نے کہاکہ یو نیو رسل ہیو من رائٹس آرگنائز یشن انٹر نیشنل پاکستان کی واحد تنظیم ہے جس کے انتخابات ہر سال باقاعدگی سے ہوتے ہیں ۔اجلاس میں متفقہ طو ر پر میا ں بر کت علی عباسی سینئر ایڈووکیٹ سُپریم کو رٹ آف پاکستان کو چیف الیکشن کمشنر مقرر کیا گیا ۔جبکہ صو بہ پنجاب کے لئے محمد اسلم خان ،سندھ کے لئے حیدر عباس نقوی ، خیبر بختونخواہ کے لئے محمد یو سف خان ،بلو چستان کے لئے محمد عتیق کاکڑ ،گلگت بلتستان کے لئے حیدرعلی خان اور آزاد کشمیر کے لئے سید فدا اصغر الیکشن کمشنرز مقرر کئے گئے ۔الیکشن شیڈول کا اعلان چیف الیکشن کمشنر آئندہ ہفتے کریں گیجبکہ پاکستان کے پانچو ں صو بوں اور آزاد کشمیر میں سال 2014ء کے لئے انتخا بات دسمبر کے پہلے ہفتہ میں ہو ں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اعلیٰ معیاری تعلیم مادرِ وطن کے دفاع کیلئے اہم ترین ہتھیار ہے۔ سینیٹر مشاہد حسین سید
اسلام آباد (جی پی آئی)سینیٹ ڈیفنس کمیٹی کے چیئرمین سینیٹر مشاہد حسین سید نے کہا ہے کہ اعلیٰ معیاری تعلیم مادرِ وطن کے دفاع کیلئے اہم ترین ہتھیار ہے۔عالمی یومِ اساتذہ کے موقع پر اپنے خصوصی پیغام میں انہوں نے کہا کہ آج ورلڈ ٹیچرز ڈے کے موقع پر جب دنیا بھر میں پیغمبرانہ پیشے سے وابستہ اساتذہ کرام کے مقدس پیشے اور انکی مواشرے میں سدھار کیلئے اعلیٰ خدمات کو خراج تحسین پیش کیا جارہا ہے، وہ اس بات پر فخر محسوس کرتے ہیں کہ انہوں نے اپنے کیریئر کا آغاز پنجاب یونیورسٹی میں بطور لیکچرر کیا اور اسی نسبت سے باآسانی ٹیچرز کی خدمات و مسائل کو اجاگرکرسکنے کی اہلیت رکھتے ہیں۔سینیٹر مشاہد حسین سید نے مزید کہا کہ کسی بھی معاشرے کو سدھارنے کیلئے اساتذہ کرام کی تربیت کا کلیدی کردار ہوتا ہے اور یہ انکی مخلصانہ کاوشوں کے ہی ثمرات ہوتے ہیں جنکی بدولت کوئی بھی فرد یا قوم ترقی کی معراج کو چھو لینے میں کامیاب ہوجاتی ہے۔ والدین کے بعد اساتذہ کو ہی یہ اعزاز حاصل ہوتا ہے کہ وہ طلباء کی کردار سازی، اعلیٰ سوچ اور شخصیت نکھارنے کیلئے رول ماڈل قرار دیے جاسکے۔ پاکستان کا اکیسویں صدی میں بطور ماڈرن، ترقی یافتہ ایشین ملک ہونے کا خواب تبھی شرمندہ تعبیر ہو سکے گا جب اساتذہ کو عزت و احترام کی نگاہ سے دیکھا جائے گا اور صرف معیار تعلیم پر ہی توجہ مرکوز کی جائے گی۔ یہی وجہ ہے کہ تمام ترقی یافتہ معاشروں میں اساتذہ کو اعلیٰ مقام کا حقدار سمجھا گیا ہے۔ مشرق میںحکمت و دانائی کی بناء پر انہیں استاد یا گرو کہا جاتا ہے جبکہ مغرب میںاساتذہ کرام کومعقول تنخواہ ا ادا کی جاتی ہے تاکہ وہ فکر معاش سے بے پرواہ ہوکر اپنی صلاحتیں قوم کے معماروں کا مستقبل سنوارنے میں وقف کرسکیں۔سینیٹر مشاہد حسین نے اپنے پیغام میں حکومت، شہریوں، سیاسی جماعتوں سمیت معاشرے کے تمام طبقات کو مخاطب کرتے ہوئے زور دیا ہے کہ پاکستانی معاشرے میں اساتذہ کرام کی عزت و احترام کو یقینی بنانے کے ساتھ ساتھ انہیں معاشی طور پر مضبوط بنایا جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ڈینگی کی مجموعی صورتحال کنٹرول میں ہے ،تا ہم آئندہ3ہفتے اہم ہیں:خواجہ سلمان رفیق
لاہور(جی پی آئی)حکومت اورعوام کی مشترکہ کوششوں سے صوبے میں ڈینگی کی صورتحال کنٹرل میں ہے تاہم آئندہ3ہفتے ڈینگی مچھر کی افزائش کے لحاظ سے بہت اہم ہیںاور سرکاری محکموں اورعوام کو اپنی موجود ہ جدوجہد جاری رکھنا ہوگی۔یہ بات آج یہاں رکن پنجاب اسمبلی خواجہ سلمان رفیق کی زیرصدارت ڈینگی کی روک تھام کے اقدامات کا جائزہ لینے کے لیے کابینہ کمیٹی کے اجلاس میں بتائی گئی ۔اجلاس میں سیکرٹری صحت حسن اقبال سمیت مختلف سرکاری محکموں کے سیکرٹریز،ایڈیشل سیکرٹریز ،کمشنر لاہور امداد اللہ بوسال،کنگ ایڈورڈ میڈیکل یونیورسٹی کے وائس چانسلر پروفیسر فیصل مسعود، چیف منسٹر ڈینگی ریسرچ سیل کے انچارج ڈاکٹر وسیم اکرم ،ڈی آئی جی سپیشل برانچ شاہد خان اور پنجاب انفارمیشن ٹیکنالوجی بورڈ کے افسران نے شرکت کی ۔سیکرٹری صحت حسن اقبال نے ڈینگی کی صورتحال بارے بریفنگ دیتے ہوئے بتایا کہ تمام تر موافق حالات کے باوجود سرکاری محکموںکی مربوط کوششوں اورعوام کے بھر پور تعاون سے ڈینگی کامرض رواںسیزن میں کنٹرول میں ہیںاور اس وقت ڈینگی کے صرف11کنفرم مریض مختلف ہسپتالوں میں زیر علاج ہیں اورکسی مریض کو ہائی ڈیپنڈنسی یونٹ میں داخل کرنے کی ضرورت پیش نہیں آئی جبکہ سندھ میں ڈینگی کے مریضوں کی تعداد1826اورخیبر پختونخوا میں 7455ہوچکی ہے اوراسی طرح سندھ میں ڈینگی سے 12جبکہ خیبر پختونخوا میں 25اموات ہوچکی ہے ۔کمشنر لاہور امداد اللہ بوسال نے لاہور ،شیخوپورہ،قصور اور ننکانہ کے اضلاع میں ڈینگی سرویلنس اورلاروا سائیڈنگ کے بارے میں تفصیلات سے آگاہ کیا ۔انہوں نے بتایا کہ لاہور میں داتا گنج بخش ٹاؤن،راوی ٹاؤن اورشالیمار ٹاؤن میں ڈینگی لاروا زیادہ رپورٹ ہورہا ہے ۔اس موقع پر مختلف محکموں کے سیکرٹریوں اورایڈیشنل سیکرٹریوں کے علاوہPITB اور سپیشل برانچ کے افسران نے اپنے اپنے محکموں کی رپورٹ پیش کی ۔اس موقع پرڈاکٹر وسیم اکرم نے بتایا کہ درجہ حرارت زیادہ ہونے اورموسم میں نمی کی وجہ سے ڈینگی لاروے کی افزائش ہورہی ہے تاہم رات کا درجہ حرارت کم ہوتے ہی صورتحال تبدیل ہوجائے گی۔پروفیسر فیصل مسعود نے بتایا کہ کنگ ایڈورڈ میڈیکل یونیورسٹی نئے ڈاکٹروںکی آن جاب ٹریننگ کے لیے کورسز کا باقاعدگی سے انعقاد کررہی ہے ۔خواجہ سلمان رفیق نے محکموں کی کارکردگی پراظہار اطمینان کرتے ہوئے کہا کہ فیصل آباد اور راولپنڈی کے اضلاع میںڈ ینگی سرویلنس میں مزید اضافہ کیا جائے۔انہوں نے کہا کہ موجودہ کوششوں کی رفتار برقرار رکھی جائے تاکہ ڈینگی کا مرض بے قابو نہ ہوسکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ٹیل کے نرخوں میں اضافہ سے نیا بحران جنم لے رہا ہے، راجہ عدیل
لاہور(جی پی آئی)تاجر راہنما و سینئر نائب صدر لوہا مارکیٹ شہید گنج راجہ عدیل نے کہا ہے کہ سٹیل کے نرخوں میں اضافہ سے نیا بحران جنم لے رہا ہے ، تعمیراتی سرگرمیاں بری طرح متاثر ہونگی، بالخصوص سفید پوش طبقہ کیلئے سستے گھروں کی تعمیر کا خواب پورا نہ ہوسکے گا۔حکومت نے اگر سٹیل کی قیمتوں کو کم کرنے کے لیے ہنگامی اقدامات نہ کیے تو ایک نیا بحران تعمیراتی شعبہ کو اپنی لپیٹ میں لے لے گا۔ انہوں نے کہا کہ بجلی کی قیمتوں میں اضافوں سے سٹیل کی پیداوار 60فیصد کم ہوئی ہے اور متعدد سٹیل ملیں بند ہوگئیں ہیں، سٹیل کی قیمتوں میں ہوشربا اضافہ عوام کو سستے ذاتی گھروں کی فراہمی کے دعوئوں کے بھی خلاف ہے دوسری جانب سٹیل کی صنعت سے وابستہ ہزاروں خاندان بھی اس کی لپیٹ میں آجائیں گے۔راجہ عدیل نے کہا کہ ملک میں2009 میں ایک کروڑ ٹن سٹیل کی مصنوعات تیار ہوتی تھیں جو اس وقت کم ہوکر40لاکھ ٹن سٹیل تک محدود ہوگئی ہیں اور اگر قیمتوں میں توازن نہ رہا تو سٹیل سیکٹر کو24ارب روپے کا نقصان برداشت کرنا پڑے گا، حکومت کی جانب سے بجلی کی قیمتوں میں اضافہ کے بعد سیٹل کی پیداواری لاگت میں8ہزار روپے فی ٹن تک اضافہ ہوجائے گا۔بجلی اور پٹرولیم مصنوعات کی قیمتوں میں اضافہ کے باعث سٹیل کی قیمتوں میں اضافہ کے باعث ہول سیلرز مال اٹھانے سے انکار کر رہے ہیں کیونکہ وہ سریا ،گارڈر مہنگے ہونے کا بوجھ مل مالکان پر ڈال رہے ہیں ۔حکومت سٹیل انڈسٹری کو بحران سے نکالنے کیلئے فوری طور پر بجلی اور پٹرولیم مصنوعات میں اضافوں کو واپس لے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
واسا میں ن لیگ کے پولنگ ایجنٹ بھرتی ہورہے ہیں ، ق لیگ لاہور
لاہور(جی پی آئی)پاکستان مسلم لیگ لاہور کے نائب صدر نصیر احمد آرائیں نے کہا کہ گزشتہ دس سال سے واسا میں کام کرنے والے ورک چارج ملازمین کی تنخواہیں بند کرکے انہیں نوکریاں چھوڑ نے پر مجبور کیا جارہا ہے اور ان کی جگہ ن لیگ کے ایم این ایز ، ایم پی ایز کے سفارشی افراد کو بھرتی کیا جارہا ہے ن لیگ کے لیے پولنگ ایجنٹس اور انتخابات میں ماردھاڑ کرنے والوں کو بطور انعام واسا سمیت ڈسٹرکٹ گورنمنٹ کے مختلف اداروں میں کھپایا جارہا ہے ،انہوں نے کہا کہ داتا گنج بخش اور راوی ٹائون میں اس نئی سیاسی غنڈہ گردی کا تجربہ کیا جارہا ہے ، حکومت کے اس ڈریکونین اقدام سے سینکڑوں خاندان فاقوں کی دہلیز پر آبیٹھے ہیں ، انہوں نے کہا کہ ن لیگ جب بھی برسراقتدار آئی ہے نااہل افراد کو عوامی خدمت کے اداروں میں بھرتی کرکے ان اداروں کو برباد کرنے ک ساتھ ساتھ قومی خزانے کو سالانہ کروڑوں روپے کا نقصان پہنچا رہی ہے ، انہوں نے چیف جسٹس لاہور ہائی کورٹ سے اپیل کی کہ وہ واسا کے ورک چارج ملازمین سے ہونے والے انسانیت سوز سلوک کا نوٹس لیں اور انہیں تحفظ دیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جماعت اسلامی کے زیر اہتمام مہنگائی کے خلاف ملک گیر احتجاج۔۔ نماز جمعہ کے بعد ملک بھر میں احتجاجی مظاہرے
لاہور(جی پی آئی) جماعت اسلامی کے زیر اہتمام مہنگائی کے خلاف ملک گیر احتجاج کیا گیا ۔ نماز جمعہ کے بعد ملک بھر میں صوبائی و ضلعی ہیڈ کوارٹرز پر احتجاجی مظاہرے اور جلسے کئے گئے ،ملک بھر کے چھوٹے بڑے شہروں میں نماز جمعہ کے بعد مساجد کے باہر زبردست احتجاجی ریلیاں نکالی گئیں اور شاہراہوں اور چوراہوں میں دھرنے دیئے گئے ، کراچی کے اٹھائیس بڑے چوکوں میں دھرنے دیئے گئے ۔حیدر آباد اور فیصل آباد میں مہنگائی کے خلاف زبردست احتجاجی جلوس نکالے گئے ، جن میں عوام نے بڑی تعداد میں شرکت کی۔ جماعت اسلامی کے عہدیداران و کارکنان نے ایک روز قبل ہی احتجاجی پروگراموں کی بھرپور تیاری کرلی تھی اور ڈور ٹو ڈور اور شاپ ٹو شاپ جاکر لوگوں سے ملاقاتیں کرکے انہیں مہنگائی کے خلاف احتجاجی مظاہروں میں شرکت کی دعوت دی تھی ۔کئی شہروں میں مقامی پریس کلبوں کے سامنے احتجاجی دھرنے دیئے گئے ۔امیرجماعت اسلامی پاکستان سید منورحسن نے کہا کہ حکومت نے اپنے ہنی مون پیریڈ میں ہی عوام کے زخموں پر پھاہا رکھنے کی بجائے نمک پاشی شروع کردی ۔لوگوں کی یہ خوش فہمی بھی دم توڑ چکی ہے کہ نئی حکومت زیادہ دیر نہیں تو کچھ دن تو ہمارے دکھوں کا علاج کریگی۔خبر یہ نہیں کہ روزانہ دوچار لوگ مہنگائی کے ہاتھوں تنگ آکرحرام موت کو گلے لگالیتے ہیں بلکہ اصل خبر یہ ہے کہ اٹھارہ کروڑ عوام تمام تر مظالم کو خندہ پیشانی سے برداشت کررہے ہیں اور چاہتے ہوئے بھی خود کشی نہیں کررہے ۔غربت کے مارے عوام محرومیوں اور مجبوریوں کی داستان بن چکے ہیں ،حکومت سے انہیں جتنی امیدیں اور توقعات تھیں ایک ایک کرکے فنا کے گھاٹ اتر چکیں ہیں ۔ حکمران لوگوں کو بغاوت پر اکسا رہے ہیں۔ امریکی و بھارتی ایجنڈے کے تحت ملک میں انتشار اور انارکی پیدا کرنے کی کوشش کی جارہی ہے ۔غربت اور مہنگائی سے لوگ دو وقت کے کھانے کو ترس گئے ہیں ،ہر طرف اندھیروں کا راج ہے اور غربت منہ کھولے لوگوں کو نگل لینے پر تلی ہوئی ہے ۔ان خیالات کااظہار انہوں نے جامع مسجد منصورہ میں نماز جمعہ کے بڑے اجتماع سے خطاب کرتے ہوئے کیا۔لاہور میں درجنوں مقامات پر بجلی ، تیل وگیس کی قیمتوں میں اضافے کے خلاف احتجاجی مظاہرے کئے گئے ۔ملتان روڈ پر منصورہ کے باہرہونے والے احتجاجی مظاہرے کی قیادت سیکریٹری جنرل جماعت اسلامی لیاقت بلوچ نے کی ۔مظاہرے کے شرکاء سے خطاب کرتے ہوئے انہوں نے کہا کہ وزیر اعظم نواز شریف نے اپنے بیان میں کہا ہے کہ بجلی و تیل کی قیمتوں میں اضافہ غریب عوام کیلئے ناقابل برداشت ہے ۔ حالانکہ یہ اضافہ کرنے والے وہ خود ہیں۔ اگر وزیر پانی و بجلی اور وزیر پٹرولیم نے وزیر اعظم کی اجازت کے بغیر اور ان کی مرضی کے خلاف یہ اضافہ کیا ہے تو دونوں وزراء کو برطرف کریں ،یا پھر انجان بننے کی بجائے قوم کے سامنے اقرار کریں کہ اس ہوشربا ء اضافے میں ان کی مرضی بھی شامل ہے اور اپنی نااہلی اور عوام کو ریلیف دینے میں ناکامی کو تسلیم کرتے ہوئے مستعفی ہوجائیں ۔انہوں نے مہنگائی کے خلاف سپریم کورٹ کی طرف سے ازخود نوٹس پر چیف جسٹس کا شکریہ ادا کیا اور مطالبہ کیا کہ سپریم کورٹ پٹرولیم مصنوعات میں ہونے والے اضافے کا بھی نوٹس لے ،عالمی مارکیٹ میں تیل کی قیمتوں میں کمی کے باوجود حکومت نے آئی ایم ایف کے دبائو میں آکر اور پہلے سے تسلیم شدہ شرائط پر تیل کی قیمتیں بڑھائیں ہیں ۔انہوں نے کہا کہ حکمران اپنے اللے تللوںاور عیش و عشرت کو چھوڑنے کیلئے تیار نہیں اور تمام غیر پیداواری اخراجات کا بوجھ عوام کو برداشت کرنا پڑ رہا ہے ۔مظاہرے سے ڈاکٹر ذکراللہ مجاہد اور عبدالعزیز عابد نے بھی خطاب کیا ۔صوبہ خیبر پختونخواہ کے تما م ضلعی ہیڈ کوارٹرز پر مہنگائی کے خلاف زبر دست احتجاج کیا گیا ۔ صوبائی ہیڈ کوارٹر پشاور ،لکی مروت،ہنگو،ڈیرہ اسماعیل خان ،ہری پور،کرک ،بنوں ،دیر اپر و دیر زیریں،مالاکنڈ ،کوہاٹ ،شانگلاسمیت صوبہ کے تما م اضلاع میں احتجاجی مظاہرے کئے گئے۔مرکز اسلامی پشاور میں مہنگائی کے خلاف منعقدہ سیمینار سے مرکزی نائب امیر و سینئر صوبائی وزیر سراج الحق ،صوبائی امیر پروفیسر محمد ابراہیم خان سمیت دینی ،سماجی و سیاسی راہنمائوں نے خطاب کرتے ہوئے مہنگائی کی شدید الفاظ میں مذمت کی اور مطالبہ کیا کہ حکومت فوری طور پر بجلی و تیل کی قیمتوں میں اضافہ واپس لے ،پنجا ب میں بہاولپور ،خانیوال ،سرگودھا ،فیصل آباد ،گوجرانوالہ ،راولپنڈی ،ملتان ،ساہیوال ،اوکاڑہ ،شیخوپورہ ،سیالکوٹ ،گجرات ،منڈی بہاولپور سمیت تمام ضلعی و تحصیلی ہیڈ کوارٹر پر احتجاجی مظاہرے کئے گئے ،امیر جماعت اسلامی پنجاب ڈاکٹر سید وسیم اختر نے بہاولپورمیں احتجاجی مظاہرے سے خطاب کرتے ہوئے کہا کہ حکومت عوام کو بنیادی سہولیات دینے میں بری طرح ناکام ہوچکی ہے،موجودہ حکومت کے دور میں اشیائے سرف کی قیمتوں میں چالیس پچاس فیصد نہیں بلکہ اب تک سو فیصد اضافہ کردیا گیا ہے اور ابھی آگے آگے دیکھئے ہوتا ہے کیا۔ نائب امیر جماعت اسلامی پنجاب امیر العظیم نے اوکاڑہ میں احتجاجی ریلی میں شرکت کی ۔،سندھ میں بھی کراچی ،حیدر آباد سمیت تمام ضلعی ہیڈ کوارٹر ز پر احتجاجی مظاہرے کئے گئے ۔بلوچستان میں کوئٹہ ،لورالائی ،پشین ،گوادر سمیت تمام ضلعی ہیڈ کوارٹرز اور چھوٹے بڑے شہروں میں احتجاجی مظاہرے ہوئے ۔صوبائی امیر عبدالمتین اخونزادہ و دیگر قائدین نے مظاہروں اور احتجاجی ریلیوں کی قیادت کی اور حکومت سے مطالبہ کیا کہ بجلی و تیل کی قیمتوں میں اضافہ فوری واپس لیا جائے ۔مہنگائی کے خلاف شہرشہر ہونے والے احتجاجی مظاہروں میں لوگوں نے بینرز اور کتبے اٹھا رکھے تھے جن پر حکومت کے خلاف نعرے درج تھے ۔مظاہرین نے حکومت کے خلاف زبردست نعرے بازی بھی کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سربراہ ادارہ صراط مستقیم ڈاکٹر محمد اشرف آصف جلالی نے کہا کہ مہنگائی سے معاشرہ تباہی کے دہانے پر پہنچ گیا ہے
لاہور(جی پی آئی) سربراہ ادارہ صراط مستقیم ڈاکٹر محمد اشرف آصف جلالی نے کہا کہ مہنگائی سے معاشرہ تباہی کے دہانے پر پہنچ گیا ہے روز بروز کی مہنگائی معاشرتی جرائم کیلئے جلتی پہ تیل کا کام کر رہی ہے۔ بجلی اور پٹرولیم مصنوعات کی قیمتوں میں حالیہ اضافے کو ظالمانہ قرار دیتے ہوئے مسترد کر دیا ہے ۔اپنے بیان میںانہوں نے بجلی اور تیل کی قیمتوں میں اضافے کے حکومتی اقدام کو سخت تنقید کا نشانہ بنایا ہے۔ ان کا کہنا ہے کہ ورلڈبینک اورآئی ایم ایف کی ایماء پر پیٹرولیم مصنوعات اور بجلی کی قیمتوں میں اضافہ کرکے عوام کو معاشی بد حالی کی طرف دھکیلا جارہاہے،عوام پہلے ہی مہنگائی،بے روزگاری سے تنگ آکر خودکشیاں کررہے ہیں،بجلی و پٹرول کی قیمتوں میں اضافے سے ملک کی معیشت کا دیوالیہ نکل جائے گا، اگر حکومت عوام کے زخموں پر مرہم رکھنے کی اہلیت نہیں رکھتی تو کم از کم نمک بھی نہ چھڑکے۔ ڈاکٹر محمد اشرف آصف جلالی نے حکومتی کارکر دگی پر تشویش کا اظہار کر تے ہو ئے کہا کہ پٹرول اور بجلی کی قیمتوں میں اضافہ سے عام آدمی کا گھریلو بل کئی گنا بڑھ جائے گا۔ انہوں نے مطالبہ کیا کہ حکومت اپنے اخراجات اور بجٹ خسارے کا بوجھ عوام پر منتقل کرنے سے باز رہے اور بجلی اور تیل کی قیمتوں میں حالیہ اضافہ فوری واپس لے۔