تحریر : ڈاکٹر تصور حسین مرزا
اہل ایمان بلخصوص عاشقان ِ رسول اللہ صلی اللہ علیہ وآلہ وسلم یکم ربیع الاول سے ہی گھر گھر اور مساجد میں میلاد النبی اور نعت خوانی (مدحِ رسول صلی اللہ علیہ و آلہ وسلم) کی محافل شروع کر دیتے ہیں ۔ علماء کرام آنحضرت صلی اللہ علیہ وآلہ وسلم کی ولادت با سعادت، آپ کی ذات مبارکہ اور سیرت طیبہ کے مختلف پہلووں پر روشنی ڈالتے ہیں۔ اسی طرح مختلف شعراء اور ثناء خواںِ رسول آنحضرت صلی اللہ علیہ وسلم کی شان اقدس میں نعتیہ گلہائے عقیدت اور درود و سلام پیش کرتے ہیں۔یہ کوئی رسم یا دیگر تہواروں کی طرح کوئی تہوار نہیں بلکہ یہ ایک سعادت ہے جو صرف عاشقان ِ رسول اللہ صلی اللہ علیہ وآلہ وسلم کے حصہ میں آتی ہے۔
اہل ایمان کا یقین کامل و ایمان ہے کہ ماہ ربیع الاول کہ اس مہینے نبی آخرالزماں ۖ کی دنیا میں تشریف آوری ہوئی، جو انسان کامل، ہادی عالم اور وجہ تخلیق کائنات ہیں،ربیع الاول امت مسلمہ کے لیے کلیدی اہمیت کا حامل مہینہ ہے، اس ماہ مبارک میں ہی حضورانور سرور کونین حضرت محمد صلی اللہ علیہ وآلہ وسلم کو دنیا کو اندھیروں سے نکالنے کیلئے بھیجا گیا۔ پیغمبر اکرم صلی اللہ علیہ وآلہ وسلم پوری دنیا کے لئے نمونہ بن کر آئے، وہ ہر شعبے میں اس اوج کمال پر فائز ہیں کہ ان جیسا کوئی تھا اور نہ ہی آئندہ آئے گا۔ان شااللہ
عید میلاد النبی حضور اکرم صلی اللہ علیہ وآلہ وسلم کی ولادت کی مناسبت سے منایا جاتا ہے۔ یہ ربیع الاول کی بارہ تاریخ میں آتا ہے ۔ ویسے تو میلاد النبی اور محافلِ نعت کا انعقاد پورا سال ہی جاری رہتا ہے لیکن خصوصاّ ماہِ ربیع الاول میں عید میلاد النبی صلی اللہ علیہ وآلہ وسلم کا تہوار پوری مذہبی عقیدت اور احترام سے منایا جاتا ہے۔
اللہ پاک نے اپنی کتاب لاریب میں فرمایا ہے کہ
” اور انہیں اللہ کے دن یاد دلاؤ”۔ ( سورة ابراہیم، 5) امام المفسرین سیدنا عبد اللہ بن عباس (رضی اللہ عنہما) کے نزدیک ایام اللہ سے مراد وہ دن ہیں۔ جن میں رب تعالیٰ کی کسی نعمت کا نزول ہوا ہو۔ان ایام میں سب سے بڑی نعمت کے دن سید عالم صلی اللہ علیہ وسلم کی ولادت و معراج کے دن ہیں، ان کی یا د قائم کرنا بھی اس آیت کے حکم میں داخل ہے)۔ (تفسیر خزائن العرفان)۔
عرش و فرش والے عاشقانِ رسول ۖ اپنی عقیدت اپنی محبت اپنی لگن اپنی چاہت اور اپنی اطاعت میں حسب ِ توفیق اپنے گھروں ، گلیوں ، محلے ، گاؤں قصبے اور شہروں میں چراغاں کرتے ہیں ، درودواسلام کے نذرانے پیش کرتے ہیںاور ایسے خوش نصیبوں کی قسمت پر جتنا بھی ناز کیا جائے کم ہے۔ یہ روشنیاں چراغاں اور فانوس کی حقیقت سمجھنے کے لئے فرمانِ عالی شان امی جان رسالتِ مآب صلی اللہ علیہ وآلہ وسلم ہے
”حضرت آمنہ رضی اللہ عنہ فرماتی ہیں، (جب آپ صلی اللہ علیہ وآلہ وسلم کی ولادت ہوئی تو ساتھ ہی ایسا نور نکلا جس سے مشرق سے مغرب تک ساری کائنات روشن ہوگئی)۔ مسلمان تو عید میلاد صلی اللہ علیہ وآلہ وسلم کی خوشی میں اپنے گھروں اور مساجد پر چراغاں کرتے ہیں، خالق کائنات نے نہ صرف ساری کائنات میں چراغاں کیا بلکہ آسمان کے ستاروں کو فانوس اور قمقمے بنا کر زمین کے قریب کردیا۔’
‘
اسی طرح حضرت عثمان بن ابی العاص رضی اللہ عنہ کی والدہ فرماتی ہیں، (جب آپ صلی اللہ علیہ وآلہ وسلم کی ولادت ہوئی میں خانہ کعبہ کے پاس تھی، میں نے دیکھا کہ خانہ کعبہ نور سے روشن ہوگیا۔ اور ستارے زمین کے اتنے قریب آگئے کہ مجھے یہ گمان ہوا کہ کہیں وہ مجھ پر گر نہ پڑیں)۔
محسن ِ انسانیت کی ذات اقدس اس کائنات کے لئے باعث رحمت ہے۔ آپ صلی اللہ علیہ وآلہ وسلم کو ہر شعبہ زندگی میں وہ معراج حاصل ہے، جس کی مثال ہی نہیں ملتی، حضور پاک کی زندگی کی صفات و کمالات کا احاطہ کرنا تو انسان کے لئے ممکن نہ ہے لیکن ہر شعبہ ہائے زندگی میں وہ عام انسان کے لئے بہترین عملی نمونہ نظر آتے ہے۔
جشنِ میلاد النبی صلی اللہ علیہ وآلہ وسلم حضور نبی اکرم صلی اللہ علیہ وآلہ وسلم کی ولادت باسعات کی تاریخی خوشی میں مسرت و شادمانی کا اظہار ہے اور یہ ایسا مبارک عمل ہے جس سے ابولہب جیسے کافر کو بھی فائدہ پہنچتا ہے۔ اگرابولہب جیسے کافر کو میلاد النبی صلی اللہ علیہ وآلہ وسلم کی خوشی میں ہر پیر کو عذاب میں تخفیف نصیب ہوسکتی ہے۔ تو اُس مومن مسلمان کی سعادت کا کیا ٹھکانا ہوگا جس کی زندگی میلاد النبی صلی اللہ علیہ وآلہ وسلم کی خوشیاں منانے میں بسر ہوتی ہو۔
آج افسوس ہم نبی کریم خاتم النبیین حضرت محمد صلی اللہ علیہ وآلہ وسلم کی ولادت و باسعادت کی خوشی منانے میں شریعت محمدی پر عمل پیرا نہیں ہو رہے ۔ خوشی منانے آپ سے محبت کرنے اور آپ ۖ کی اطاعت میں ہی دنیا اور آخرت کی کامیابی ہے مگر وہ کام جن کا دین اسلام میں تصور بھی نہیں ایسا کرنا ایسا کروانا محبت رسول صلی اللہ علیہ وآلہ وسلم کیسے ہو سکتی ہے؟
آپ صلی اللہ علیہ وآلہ وسلم نے علم و نور کی ایسی شمعیں روشن کیں جس نے عرب جیسے علم و تہذیب سے عاری معاشرے میں جہالت کے اندھیروں کو ختم کر کے اسے دنیا کا تہذیب یافتہ معاشرہ بنا دیا، آپ صلی اللہ علیہ وآلہ وسلم نے اپنی تعلیمات میں امن، اخوت، بھائی چارہ، یکجہتی اور ایک دوسرے کو برداشت کا درس دیا۔
عاشقان رسول اللہ صلی اللہ علیہ وآلہ وسلم سے گزارش ہے کہ عشقِ رسول اور اطاعت رسول کا دعویٰ کرنے کی بجائے عشقِ رسول کا عملی کردار ادا کرنا ہوگا جس سے یہ بتانے کی ضرورت ہی نہ پیش آئے کہ ہم عاشقان نبی صلی اللہ علیہ وآلہ وسلم ہے بلکہ ہمارا چلنا پھرنا اٹھنا بیٹھنا یعنی کردار بتائے کہ ہم نبی کریم صلی اللہ علیہ وآلہ وسلم کے دیوانے ہیں۔
تحریر : ڈاکٹر تصور حسین مرزا
