ہیلپ سوسائٹی فار سوشل ویلفیئر محلہ سردار پورہ غیر سیاسی سماجی تنظیم ہے :عامر جاوید
گجرات (جی پی آئی)ہیلپ سوسائٹی فار سوشل ویلفیئر محلہ سردار پورہ غیر سیاسی سماجی تنظیم ہے جو اپنی مدد آپ کے تحت کام کر رہی ہے ، ان خیالات کا اظہار چیئرمین ہیلپ سوسائٹی فار سوشل ویلفیئر عامر جاویدآف جیٹ میڈیکل سٹور ، وائس چیئرمین حاجی آفتاب ، نذیر جہلمی ، صدر مظہر اقبال ، جنرل سیکرٹری چوہدری تبسم نسیم ، حاجی شیراز ، عنایت اللہ و دیگر نے ایک اجلاس کے دوران کیا انہوں نے کہا کہ ہم نے ہمیشہ سوسائٹی کے پلیٹ فارم سے علاقہ کے عوام کے مسائل کے حل کیلئے کام کیا ہے اور اس سلسلہ میں کسی سے کوئی مدد نہیں لی ، بلکہ اپنی مدد آپ کے تحت کام کرتے رہیں ، علاقہ کے عوام کے دکھ درد میں شامل ہونا ہماری تنظیم کا مشن ہے کسی قسم کی سیاسی وابستگی سے بالا تر ہو کر ہم کام کر رہے ہیں، انہوں نے کہا کہ بعض لوگ سیاسی جماعتوں سے این جی اوز کا تعلق جوڑنے کی کوشش کرتے ہیں ، جو کہ غلط ہے ، ہم علاقہ کے عوام کے شکر گزار ہیں کہ وہ ہماری ہمیشہ سرپرستی کرتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ضلع گجرات کے معروف تعلیمی ادارے انٹرنیشنل اسلامک یونیورسٹی سکول شیر ربانی کیمپس میں سالانہ سپورٹس فیسٹیول اختتام پذیر ہو گیا
گجرات (جی پی آئی)ضلع گجرات کے معروف تعلیمی ادارے انٹرنیشنل اسلامک یونیورسٹی سکول شیر ربانی کیمپس میں سالانہ سپورٹس فیسٹیول اختتام پذیر ہو گیا ، جس کی صدارت شہزاد شفیق نقشبندی نے کی ، جبکہ مہمان خصوصی اسسٹنٹ کمشنر گجرات بلال فیروز جوئیہ تھے ،اس موقع پر طلباء و طالبات نے مختلف کھیلوں میں حصہ لیا ،جنہیں مہمانانِ گرامی نے بے حد سراہا ، تقریب کا آغاز مارچ پاسٹ سے ہوا ، طلباء نے مارچ پاسٹ میں حصہ لیا اس کے بعد پرچم کو سلامی پیش کرتے ہوئے بلال فیروز جوئیہ نے حلف لیا ،اسسنٹ ایجوکیشن آفیسر علامہ ساجد محمود قادری ، رئیس ذوالفقار نجم بھی موجود تھے ، پی ٹی شو و دیگر کھیلوں کا مظاہرہ کیا گیا ، فلیٹ ریس میں انس عامر اول ، مرتضیٰ بدر دوئم ، جبکہ حسن سوئم رہے ، میوزکل چیئرمیں عائشہ اول ، کنیگرو ریس بوائز میں اول سیف علی ، دوئم ربیل ، سوئم مجتبیٰ ، فلیٹ ریس گرلز میں اول زینب ، دوئم سمعیہ ، سوئم روشانہ، انڈر پاس ریس میں اول الیان ، دوئم انوش ، سوئم عبدالرافے، زگ زیگ ریس میں ضیغم اول ، زوہا دوئم ، فرحین سوئم رہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جس قوم کے بچے صحت اور تندرست ہوں وہ قوم کسی میدان شکست نہیں کھا سکتی : بلال فیروز جوئیہ
گجرات (جی پی آئی) اسسٹنٹ کمشنر گجرات بلال فیروز جوئیہ نے کہا ہے کہ نوجوان نسل کی فلاح و بہبود حکومت کی اولین ترجیح ہے جس قوم کے بچے صحت اور تندرست ہوں وہ قوم کسی میدان شکست نہیں کھا سکتی ، وہ گزشتہ روز انٹرنیشنل اسلامک یونیورسٹی اسلام آباد سکولز شیر ربانی کیمپس گجرات میں سپورٹس گالا کے موقع پر خطاب کرتے ہوئے کیا انہوں کہا کہ اگر ہم بچوں کی صحیح معنوں میں سرپرستی کریں تو بچے ملک و قوم کی ترقی میں اہم کردار ادا کر سکتے ہیں ، ہمیں خوشی ہے کہ آئی یو آئی سکولز میں صحیح معنوں میں بچے کے کردار اور ان کے اندر چھپی ہوئی صلاحتوں کو ابھارنے کیلئے اقدامات کیے جا رہے ہیں ، انہوں نے کہا کہ ہمیں چاہیے کہ بچوں میں غیر نصابی سرگرمیوں کو بھی فروغ دیں تا کہ بچے اپنی اندر چھپی ہوئی صلاحتوں کو برئوے کار لائیں اور ان میں خود اعتمادی پید ا ہو سکے ، انہوںنے کہا آج کے بچے کل کے حکمران ہیں ، اس موقع پر مفتی عبدالعزیز ، شہزاد شفیق و دیگر نے بھی خطاب کیا ، مس قرة العین نے مہمانوں کو خوش آمدید کہا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات سے مسلم لیگ ن کے امیدواران بھاری اکثریت سے کامیاب ہونگے :رانا مشرف علی ناز
گجرات (جی پی آئی) پاکستان مسلم لیگ ن کے ممتاز راہنما صدر یونین کونسل 54رانا مشرف علی ناز نے کہا ہے کہ گجرات سے مسلم لیگ ن کے امیدواران بھاری اکثریت سے کامیاب ہونگے ، کیونکہ مسلم لیگ ن نے ہمیشہ عوام کی خدمت کی ہے اور لوگوں کو ریلیف فراہم کرنے کوشش کی ہے وہ گزشتہ روز یونین کونسل 54کے مسلم لیگیوں کے راہنمائوں سے گفتگو کر رہے تھے ، انہوں نے کہا کہ اورنگزیب بٹ صحیح معنوں میں عوامی لیڈر ہیں جنہیں علاقہ کے عوام بے حد چاہتے ہیں ، اور وہ بھاری اکثریت سے کامیاب ہو کر عوام کی خدمت کیلئے عملی طور پر کام کرینگے ، رانا مشرف علی ناز نے کہا کہ جو لوگ مسلم لیگیوں کے خلاف منفی پراپیگنڈہ کر تے ہیں وہ اپنی موت آپ مر جائیں گے اور مسلم لیگ ن کے امیدواران بھاری اکثریت سے کامیاب ہو کر پہلے کی طرح عوام کی خدمت میں اپنے وسائل برئوے کار لائیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
عظیم الشان علی شیر خدا کانفرنس 8اپریل کو منعقد ہو گی
گجرات (جی پی آئی)عظیم الشان علی شیر خدا کانفرنس 8اپریل بروز سوموار بعد از نماز عشاء جامع مسجد صرافہ نزد الجنت میرج ہال محلہ غریب پورہ میں منعقد ہو گی ، جس کی صدارت صاحبزادہ پیر سید سعید احمد شاہ گجراتی کرینگے جبکہ خصوصی خطاب مفتی محمد عنصر القادری کرینگے ، نقابت کے فرائض عمران چشتی سرانجام دینگے ، جبکہ یہ محفل زیر قیادت پیر سید زاہد حسین شاہ ترمذی منعقد ہو رہی ہے ، تلاوت کلام پاک کا شرف پیر سید نذر حسین شاہ گجراتی حاصل کرینگے ، نعت رسول مقبول ۖ حافظ جنید ایوب اور حافظ حسن ایوب پیش کرینگے انتظامیہ میں حافظ محمد ایوب صراف ، اویس ایوب ، بلال ایوب ، جنید ایوب اور حسن ایوب شامل ہیں ، ٹھیک ساڑھے نو بجے خطاب شروع ہو جائیگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہم عوام کی خدمت کیلئے میدان میں آئے ہیں :عمر مسعود فاروق
گجرات (جی پی آئی)ممتاز سیاسی و سماجی شخصیت عمر مسعود فاروقی امیدوار حلقہ NA105نے کہا ہے کہ ہم عوام کی خدمت کیلئے میدان میں آئے ہیں اور معاشی انقلاب لانا ہماری اولین ترجیح ہے ، وہ گزشتہ روز مختلف مقامات پر عوامی وفود سے ملاقات کر رہے تھے ، انہوں نے کہا کہ ہم نے اپنی صلاحتیں ہمیشہ ملک و قوم کی ترقی کیلئے استعمال کی ہیں ، اور آئندہ بھی ملکی ترقی کیلئے کام کرتے رہینگے ، جب تک معاشی انقلاب نہیں آئے گا ، کوئی اس وقت تک قوم ترقی نہیں کر سکتی ، اور ہم معاشی انقلاب کیلئے عوام کی مدد کے طلبگار ہیں ، کہ آنے والے انتخابات میں معاشی انقلاب کیلئے ہمارے ہاتھ مضبوط کریں تا کہ ہم عوام کے تعاون سے عوام کے مسائل حل کر سکیں ، انہوں نے کہا کہ جب تک عوامی سپورٹ حاصل نہ ہو ہم عوام کے مسائل نہیں حل کر سکتے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چوہدری ایاز اکرم کی روح کے ایصال ثواب کیلئے ختم قل کی محفل آج ہو گی
گجرات (جی پی آئی )مسلم لیگ ن کے مرکزی رہنماء ممتا زبزنس مین چوہدری احمد سعید ‘ سابق وفاقی وزیر چوہدری احمد مختار ‘چوہدری احمد پرویز کے چچا زاد بھائی چوہدری ایاز اکرم جو کہ گزشتہ دنوں انتقال کر گئے تھے ان کی روح کے ایصال ثواب کیلئے ختم قل آج مورخہ 7اپریل صبح گیارہ بجے ان کے آبائی گائوں گندرہ کلاں بھمبر روڈ پر پڑھا جائیگا دوست احباب سے شرکت کی استدعا کی گئی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہمارا تعلق مسلم لیگ(ق) کے ساتھ ہے:عبدالعزیز بھٹی
گجرات(جی پی آئی)مغل کالونی بھٹی برادری کے سر کردہ رہنماء عبدالعزیز بھٹی، محمد بوٹا بھٹی، محمد اسلم بھٹی، محمد افضل بھٹی، محمد عرفان بھٹی، تنویر بھٹی،امجد حسین بھٹی،گل محمد بھٹی،ریاست علی بھٹی،لیاقت علی تارڑ ،محمد بشیر تارڑ ، محمد شریف تارڑ ،قیصر شریف تارڑ ،اللہ دتہ تارڑ ،جاوید گجر ،اسلم گجر،چاچا رفیق وڑائچ ،حاجی عبدالغنی مغل،مرزا عثمان غنی مغل،مرزا عمران غنی ،مرزا محمد عارف ،راجہ محمود ٹھیکیدار ،ملک شجاعت ،قاسم علی ملک ،راجہ ارشد ،میر جازب حسین مرزا اکرم بیگ منشی تنویر احمد و دیگر نے مشترکہ بیان میں کہا ہمارا تعلق مسلم لیگ(ق) کے ساتھ ہے۔ ہم نے (ن) لیگ کے امیدوار اورنگزیب بٹ کی حمائت نہیں کی ایسی خبروں میں کوئی صداقت نہیں ہے برادریوں کے مختلف افراد نے چوہدری برادران کے ساتھ پہلے بھی تعاون کیا اور آئندہ الیکشن میں بھی مکمل حمایت کریں گے۔انہوں نے مزید کہا کہ ہمارا جینا مرنا صرف چوہدری برادران کے ساتھ ہے۔انشاء اللہ چوہدری برادران آئندہ الیکشن میں بھرپور کامیابی حاصل کریں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
خاموش اکثریت کے ترجمان چوہدری وقار نادر جوڑا کے کاغذات نامزدگی منظور کرلئے گے
گجرات ( جی پی آئی ) ریٹرننگ آفیسر این اے 105طارق خورشید خواجہ نے حلقہ پی پی 111سے آزاد امیدوار سابق چیئر مین بلدیہ اور خاموش اکثریت کے ترجمان چوہدری وقار نادر جوڑا کے کاغذات نامزدگی منظور کرلئے ہیں ‘چوہدری وقار نادر جوڑا اپنے وکلاء پینل ندیم شہزاد کوکب ایڈووکیٹ(ممبر پنجاب بار کونسل) ‘راجہ امجد محمود ایڈووکیٹ کے ہمراہ عدالت میں پیش ہوئے اس موقع پر ریٹرننگ آفیسر خواجہ طارق خورشید نے امیدوار برائے صوبائی اسمبلی چوہدری وقار نادر جوڑا پرایک شہری کی طرف سے جھوٹ پر مبنی لگائے گئے اعتراضات کو فوری طورپر ختم کرتے ہوئے ٹی ایم او خرم وڑائچ ترہنگی ‘نقشہ برانچ کے انچارج مرزا فیاض احمد ودیگر افسران کو عدالت میں بمعہ ریکارڈ طلب کرنے کے بعد ریٹرننگ آفیسر طارق خورشید خواجہ کو بتایا کہ امیدوار برائے صوبائی اسمبلی حلقہ پی پی 111 چوہدری وقار نادر جوڑا ٹی ایم اے گجرات کے ڈیفالٹر نہیں ہیں ان کے ذمہ ٹی ایم اے گجرات کے کوئی واجبات نہیں ہیں جس پر ریٹرننگ آفیسر گجرات نے چوہدری وقار نادر جوڑا کے کاغذات کو منظور کرتے ہوئے مقامی شہری کی طرف سے لگائے گئے اعتراضات کو فوری طور پرختم کردیا ۔اس موقع پر وقار نادر جوڑا نے میڈیا کے نمائندوں کو بتایا کہ شہر کی چند با اثر شخصیات نے میرے خلاف جو پراپیگنڈہ مہم شروع کررکھی تھی وہ آج دم توڑ گئی ہے اللہ تعالیٰ نے مجھے ہر میدان میں سرخرو کیا ہے آج تک پورا شہر گواہ ہے کہ وقار نادر جوڑا نے کسی کے ساتھ زیادتی نہیں جس کا باقاعدہ سرٹیفکیٹ ریٹرننگ آفیسر گجرات نے جاری کردیا ہے اور اس فیصلہ سے ضلع گجرات کی خاموش آبادی کا سر فخر سے بلند ہوگیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چوہدری پرویز الٰہی میاں عمران مسعود نے گزشتہ روز یونین کونسل 49میں مسلم لیگ ق کے الیکشن آفس کا افتتاح کیا
گجرا ت( جی پی آئی ) سابق ڈپٹی وزیراعظم چوہدری پرویز الٰہی ‘سابق صوبائی وزیرتعلیم میاں عمران مسعود نے گزشتہ روز یونین کونسل 49میں مسلم لیگ ق کے الیکشن آفس کا افتتاح اپنے دست مبارک سے کیا الیکشن آفس کا انچارج ممتاز مسلم لیگی رہنماء چوہدری عبدالرحمن گوندل آف نور پور پڈھے کو بنایا گیا افتتاحی تقریب میں جاوید پڈا ‘طارق ساہی ‘چوہدری اعجاز ساہی ‘مرزا ثاقب ‘خرم ا قبال ‘چوہدری خالد ‘میاں ارسلان امانت ‘سید نوازش علی ‘سید نثار شاہ ‘سید جابر شاہ ‘سلیمان شاویز ‘راجہ عثمان ‘عمران بلا ‘چوہدری عثمان ‘رئیس احمد ‘مرزا علی ‘جہانزیب ‘چوہدری خالد سمیت دیگر مسلم لیگی رہنماء بھی موجو دتھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
کوٹلہ کے قریب تیز رفتار موٹرسائیکل سوارموٹرسائیکل سے گر کر جاںبحق ہوگیا
گجرات ( جی پی آئی ) کوٹلہ کے قریب تیز رفتار موٹرسائیکل سوارموٹرسائیکل سے گر کر جاںبحق ہوگیا ‘بتایا گیا ہے کہ تھانہ ککرالی کے علاقہ کوٹلہ ارب علی خان میں ایک تیز رفتار موٹرسائیکل سوار نوجوان قا سم اپنے ہی موٹرسائیکل سے گر کرشدید زخمی ہوگیا جسے طبی امداد کیلئے ہسپتال لے جایا جارہا تھا کہ وہ راستے میں زخموں کی تاب نہ لاتے ہوئے دم توڑ گیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ظہور الٰہی سٹیڈیم گجرات میں افغانستان اور ڈی سی او الیون کے درمیان ہونیوالا ایک روزہ کرکٹ میچ سیکورٹی کے انتظامات مکمل نہ ہونے کے باعث ملتوی کردیا
گجرات ( جی پی آئی ) ظہور الٰہی سٹیڈیم گجرات میں افغانستان اور ڈی سی او الیون کے درمیان ہونیوالا ایک روزہ کرکٹ میچ سیکورٹی کے انتظامات مکمل نہ ہونے کے باعث ملتوی کردیا گیا جس سے میچ دیکھنے کیلئے آ نیوالے ہزاروں شائقین مایوس لوٹ گئے ‘اسٹیڈیم انتظامیہ کے مطابق پولیس اور سیکورٹی کے دیگر ادارے الیکشن مہم میں مصروف ہونے کی وجہ سے سیکورٹی فراہم نہیں کرسکے جس سے میچ ملتوی کرنا پڑا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
منگووال میں مسلح افراد نے تین سالہ کمسن بچی کو اغواء کرلیا
گجرات ( جی پی آئی ) منگووال میں مسلح افراد نے تین سالہ کمسن بچی کو اغواء کرلیا گزشتہ روز تھانہ کنجاہ کے علاقہ منگووال سے نا معلوم مسلح افراد نے تین سالہ کمسن بچی کو اغواء کرلیا تاہم پولیس نے واقع سے لا علمی کا اظہار کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
بسم اللہ ویلفیئر آرگنائزیشن گجرات کی ماہانہ میٹنگ آج منعقد ہو گی
گجرا ت( جی پی آئی ) بسم اللہ ویلفیئر آرگنائزیشن گجرات کی ماہانہ میٹنگ آج مورخہ 7اپریل کو صدر بسم اللہ ویلفیئر آرگنائزر علی زیب کی رہائشگاہ محلہ مکی مسجد میں بعد از نماز مغرب ہوگی میٹنگ میں فلاحی کاموںکے حوالے سے فری میڈیکل کیمپ لگانے اور فری ادویات فراہم کرنے کے بارے میں لائحہ عمل اختیا رکیا جائیگا تمام ممبران میٹنگ میں لازمی شرکت کریں۔
Related Posts
