جشن آزادی کے سلسلہ میں سپیئر کالج گجرات کے دونوں کیمپس کی بلڈنگوں کو خوبصورت طریقہ سے سجایا دیا گیا
گجرات(جی پی آئی)جشن آزادی کے سلسلہ میں سپیئر کالج گجرات کے دونوں کیمپس کی بلڈنگوں کو خوبصورت طریقہ سے سجایا دیا گیا ہے، اور لائٹنگ کا اہتمام کیا گیا ہے، جبکہ جشن آزادی کے سلسلہ میں ایک تقریب کا بھی انعقاد کیا جا رہا ہے، جس میں طلباء کی کثیر تعداد شرکت کرے گی ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آج ملک بھر میں یوم آزادی جوش و خروش کے ساتھ منایا جا رہا ہے
گجرات(جی پی آئی)آج ملک بھر میں یوم آزادی جوش و خروش کے ساتھ منایا جا رہا ہے، اس سلسلہ میں مختلف تقریبات بھی منعقد ہو رہی ہیں، جن کا مقصد آنے والی نسل کو جشن آزادی کا پیغام پہنچانا ہے ، اس سلسلہ میں ایک تقریب فاران گروپ آف انسٹی ٹیوٹس میں منعقد ہو گی، جس میں قوم کیلئے تحفہ جدید ترین مشینی کی صورت میں فراہم کیا جائے گا، جس کا افتتاح سابق ڈسٹرکٹ گورنر لائنز کلب اشفاق احمد رضی کرینگے، اس تقریب میں لائنز ممبران کی کثیر تعداد شرکت کر رہی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات میں بارشوں کا سلسلہ عروج پر پہنچ گیا، موسم خوشگوار، شہر کے مختلف علاقوں میں پانی کھڑا
گجرات(جی پی آئی)گجرات میں بارشوں کا سلسلہ عروج پر پہنچ گیا، موسم خوشگوار ہونے کے ساتھ ساتھ شہر میں مختلف مقامات پر پانی بھی نظر آ رہا ہے، ایسے میں ٹی ایم اے کو چاہیے کہ وہ ایسے اقدامات کرے جس سے شہر میں پانی کے نکاس کا نظام بہتر ہو سکے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
فاران گروپ آف انسٹی ٹیوٹس میں داخلوں کیلئے رش دیکھنے میں نظر آ رہا ہے
گجرات(جی پی آئی)فاران گروپ آف انسٹی ٹیوٹس میں داخلوں کیلئے رش دیکھنے میں نظر آ رہا ہے، میٹرک سے فارغ التحصیل طلباء کی کثیر تعداد اس ادارے کا انتخاب کر رہی ہے، تا کہ وہ ملک کی ترقی میں اپنا کردار ادا کر سکیں، منیجر ڈائریکٹر فاران گروپ آف انسٹی ٹیوٹس طارق جاوید چوہدری نے بتایا ہے کہ اس ادارہ میں طلباء کی ذہنی نشوونما کیلئے کام ہوتا ہے اور ادارے میں طلباء کیلئے تمام قسم کی سہولیات میسر ہیں، الیکٹرونکس، الیکٹریکل انجینئر، ٹیلی کمیونیکشن ٹیکنالوجی، کمپیوٹر ٹیکنالوجی ، مکینکل ٹیکنالوجی، سول ٹیکنالوجی، بی ٹیک، ڈی اے ای و دیگر شعبوں میں داخلوں کا رحجان دیکھنے میں آ رہا ہے، انہوں نے کہا کہ ہم اس قوم کو بہتر سے بہتر بنانے کیلئے کوشاں ہیں ، اور اپنے وسائل پاکستان کے استحکام کیلئے صرف کرنا چاہتے ہیں، اور فاران گروپ آف انسٹی ٹیوٹس ملک کے مختلف علاقوں میں کام کر رہا ہے ، تا کہ قوم کی بہترین راہنمائی کی جا سکے، انہوں نے کہا کہ فاران گروپ آف انسٹی ٹیوٹس کا شمار بلاشبہ پاکستان کے اہم اداروں میں ہوتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان تحریک انصاف کے راہنما فیضان خالد بٹ اور مہر شہباز فاضل نے پوری قوم کو جشن آزادی کی مبارک باد دی
گجرات(جی پی آئی)پاکستان تحریک انصاف یوتھ ونگ ضلع گجرات کے صدر فیضان خالد بٹ اور مہر شہباز فاضل نے اپنے مشترکہ بیان میں پوری قوم کو جشن آزادی مبارک کے موقع پر مبارک باد پیش کی ہے اور کہا ہے کہ آج کا دن ہمیں اس بات کا سبق دیتا ہے کہ ہمارے آبائو اجداد نے بڑی قربانیوں کے بعد اس ملک کو حاصل کیا تھا، اور ہمیں اس ملک کی خوشحالی کیلئے کام کرنا ہے ، پاکستان تحریک انصاف کے قائد عمران خان کی قیادت میں ملک کو ترقی کی راہوں پر گامزن کرنے کیلئے کوشاں ہیں، اور تحریک انصاف اس مقصد کیلئے کام کر رہی ہے، انشاء اللہ وہ وقت دور نہیں جب ملک سے بیروزگاری، لاقانونیت، دہشت گردی کا خاتمہ ہو گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایف آئی اے گوجرانوالہ اور واپڈا ٹیم گجرات کا مشترکہ آپریشن، گلستان تھیٹر و سینما چھاپہ
گجرات(جی پی آئی)ایف آئی اے گوجرانوالہ اور واپڈا ٹیم گجرات کا مشترکہ آپریشن، گلستان تھیٹر و سینما چھاپہ کے دوران کروڑوں روپے کی بجلی چوری کرتے ہوئے تھیٹر کا مالک گرفتار، واپڈا حکام کے مطابق چالیس کلو واٹ کا لوڈ چل رہا تھا، میٹر اتار لیا گیا ہے ،19,10000روپے کا ڈیمانڈ نوٹس اور ٹرانسفارمر کیلئے 9لاکھ روپے کا ڈیمانڈ نوٹس جاری کر دیا گیا، عوامی حلقوں نے اس کارکردگی کو سراہا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہمیں ملکر ملک کی ترقی و سلامتی کیلئے کام کرنا چاہیے:فہیم چوہدری، چوہدری احسان گجر
گجرات(جی پی آئی)اٹلی کی ممتاز کاروباری شخصیت فہیم چوہدری اور ایلیٹ فورس گجرات کے جوان چوہدری احسان گجر نے اپنے بیان میں پوری قوم کو جشن آزادی مبارک کے موقع پر کہا ہے کہ ہمیں ملکر ملک کی ترقی و سلامتی کیلئے کام کرنا چاہیے، تا کہ یہ ملک امن و آشتی کا گہوارہ بن سکے، اور ملک ترقی کر سکے ، اور ایسے حکمرانوں کو آگے آنا چاہیے جو ملک کی ترقی کیلئے کام کرنے کا جذبہ رکھتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لبیک یا رسول اللہ ۖ گجرات کے زیر اہتمام 12مستحق لڑکیوں کی اجتماعی شادیاں کی تقریب آج منعقد ہو گی
گجرات(جی پی آئی)لبیک یا رسول اللہ ۖ گجرات کے زیر اہتمام 12مستحق لڑکیوں کی اجتماعی شادیاں آج سفینہ میرج ہال بھمبر روڈ گجرات میں منعقد ہونگی، اجتماعی شادیوں کی تقریب، اس سلسلہ میں تمام انتظامات مکمل کر لئے گئے ہیں، مستحق لڑکیوں کو جہیز بھی لبیک یا رسول اللہ ۖ کی طرف سے دیا جا رہا ہے، جبکہ مہمانوں کی تواضع کیلئے بھی انتظامات مکمل کر لئے گئے ہیں، لبیک یا رسول اللہ کے صدر عمر شریف قادری، صاحبزادہ رضوان منصور آوانی ، شیخ عرفان پرویز، طاہر چوہدری اور ڈاکٹر ثوبان شاہد کی سربراہی میں کمیٹی کام کر رہی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سیکرٹری سوشل ویلفیئر اور ڈی سی او گجرات کی ہدایت پر پولیو مہم کا آغاز ہو گیا
گجرات(جی پی آئی)سیکرٹری سوشل ویلفیئر اور ڈی سی او گجرات کی ہدایت پر پولیو مہم کا آغاز ہو گیا ہے ، ڈسٹرکٹ آفیسر سوشل ویلفیئر محمد ارشد کی سربراہی میں گجرات کی تمام این جی اوز اس مہم میں حصہ لینگی ،اس مہم میں تمام ڈپٹی ڈسٹرکٹ آفسران حصہ لے رہے ہیں اور این جی اوز کو بھرپور طریقہ سے کام کرنے کی ہدایت کی گئی ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جشنِ آزادی کے حوالے سے یونیورسٹی آف گجرات میں پرچم کشائی اور قومی سیمینار کی خصوصی تقریبات منعقد ہو ں گی
گجرات (جی پی آئی ) جشنِ آزادی کے حوالے سے یونیورسٹی آف گجرات میں پرچم کشائی اور قومی سیمینار کی خصوصی تقریبات حافظ حیات کیمپس میں منعقد ہوں گی وائس چانسلر ڈاکٹر محمد نظام الدین مہمان خصوصی ہوں گے۔ رجسٹرار یونیورسٹی آف گجرات ڈاکٹر طاہر عقیل کے مطابق جشن یوم آزادی کے حوالے سے جامعہ گجرات میں خصوصی تقریبات کا انتظام کیا گیا ہے۔ نماز فجر کے وقت کیمپس مسجد میں تمام شرکاء رب العزت کے حضور سجدہ شکر ادا کریں گے اور وطن عزیز کی سلامتی استحکام اور ترقی کے لیے خصوصی دعا ہو گی۔ ایڈمن بلاک کے سامنے پرچم کشائی کی پروقار تقریب ہوگی۔ وائس چانسلر ڈاکٹر محمد نظام الدین پرچم کشائی کریں گے۔ طلباء و طالبات قومی ترانہ و ملی نغمے پیش کریں گے ۔ قومی پرچم سربلند کیا جائے گااور سلامی دی جائے گی۔ بعد ازاں وزیر اعلیٰ پنجاب میاں شہباز شریف کی خصوصی مہم سکولوں میں بچوں کے سو فیصد داخلے کی مہم سے اظہار یکجہتی کے لیے ”اصل آزادی جہالت سے آزادی” کے موضوع پر خصوصی سیمینار ویڈیو کانفرنسنگ ہال میں صبح 9 بجے شروع ہو گا رئیس الجامعہ پروفیسر ڈاکٹر محمد نظام الدین صدارت کریں گے۔ پروفیسر ڈاکٹر طاہر عقیل، پروفیسر سید شبیر حسین شاہ ، شیخ عبدالرشید، پروفیسر نصر اﷲ باجوہ سمیت اساتذہ و طلباء و طالبات سے خطاب کریں گے۔ دوپہر اڑھائی بجے ”جہالت سے آزادی کی آگاہی مہم کا آغاز ریلی نکال کر کیا جائے گا۔ ریلی وزیر اعلیٰ پنجاب کے سکولوں میں سو فیصد داخلے کے حوالے سے عوامی آگاہی اور منتظمین سے اظہار یکجہتی کے لیے نکالی جائے گی جس میں اساتذہ ، طلباء و طالبات اور سول سوسائٹی کے علم دوست افراد شرکت کریں گے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
14اگست (یوم آزادی) کے موقع پر موٹر سائیکل پر ون ویلنگ پرپابندی عائد ، دفعہ 144نافذ
گجرات(جی پی آئی)ایڈمنسٹریٹر ضلعی حکومت/ڈی سی او آصف بلا ل لودھی نے دفعہ 144کا نفاذ کرتے ہوئے 14اگست (یوم آزادی) کے موقع پر موٹر سائیکل پر ون ویلنگ پرپابندی عائد کر دی ہے۔ پابندی کا فیصلہ حادثات کی روک تھام اور عوام کے جان و مال کے تحفظ کے لئے کیا گیا ہے ۔ ڈی سی او آصف بلال لودھی نے واضع کیا ہے کہ احکامات کی خلاف ورزی کے مرتکب عناصر کو گرفتار کیا جائے گا اور ان کے خلاف مجاز عدالت میں مقدمات چلائے جائیں گے۔ انہوں نے پولیس کو ہدایت کی کہ دفعہ 144کے نفاذ پر پوری قوت سے عملدرآمد یقینی بنایا جائے اور خلاف ورزی کرنے والوں کے خلاف سخت کاروائی عمل میں لائی جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حکومت پنجاب کے پروگرام کے تحت سکولوں میں100بچو ں کا داخلہ یقینی بنانے کے لئے مہم کا آغاز آج ہوگا
گجرات(جی پی آئی)حکومت پنجاب کے پروگرام کے تحت سکولوں میں100بچو ں کا داخلہ یقینی بنانے کے لئے مہم کا آغاز آج ہوگا۔ کمشنر گوجرانوالہ طارق نجیب نجمی خصوصی تقریب کے دوران ضلع گجرات میں داخلوں کی مہم کا افتتاح کریں گے۔ ڈی سی او گجرات آصف بلا ل لودھی ،ای ڈی او ایجوکیشن گجرات ایاز طارق اور دیگر افسران بھی تقریب میں شرکت کریں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چودہ اگست یوم آزادی پاکستان کا وہ روشن دن ہے:چوہدری منصور اختر
گجرات( جی پی آئی )چودہ اگست یوم آزادی پاکستان کا وہ روشن دن ہے جو بر صغیر کے مسلمانوں کو غلامی کے اندھیروں سے باہر نکال لایا۔ قائد اعظم محمد علی جناح کی قیادت میں قافلہ آزادی اپنی منزل کو حاصل کرنے میں کامیاب ہو گیا۔ مارد ملت فاطمہ جناح نے قدم قدم پر مسلمان خواتین کی بھر پور نمائندگی کرتے ہوئے ایک خواب کو حقیقت میں بدل دیا۔ ان خیالات کا اظہار چوہدری منصور اختر آف روشن ٹائر اینڈ محمود ٹائر والے نے کیا ۔یہ ایک ایسا خواب تھا جو کبھی شاعر مشرق علامہ اقبال نے دیکھا تھا۔ میدان عمل میں قافلہ سالار قائد اعظم تھے جنہوں نے نہایت دانائی اور ہوش مندی سے انگریزوں اور ہندوؤں کی مشترکہ مخالفت کے باوجود ملت اسلامیہ کو دنیا کا سب سے بڑا اسلامی ملک عطا کیا۔آج پھر ہمیں قائد اعظم کے افکاراتحاد، ایمان اور تنظیم پر کار بند ہونے کی ضرورت ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان کی سلامتی بقااور ایٹمی اثاثوں کی حفاظت کیلئے سب کو مل کر کام کرنا ہوگا::ڈاکٹر زاہد ظہیر
گجرات(جی پی آئی)پاکستان کی سلامتی بقااور ایٹمی اثاثوں کی حفاظت کیلئے سب کو مل کر کام کرنا ہوگا یہ بات پاکستان پیپلز پارٹی ضلع گجرات کے سیکرٹری جنرل ڈاکٹر زاہد ظہیر نے یوم آذادی کے پر مسرت موقع پر اپنے پیغام میں کہی انہوں نے کہاکہ ملک کے روشن اور بہتر مستقبل کے لیے ہم سب کو آپس کے اختلافات ختم کر کے مثبت اور تعمیری سوچ کے ساتھ آگے بڑھنا ہوگا تاکہ کسی دشمن عناصر کو وطن عزیز کی طرف میلی آنکھ اٹھانے کی جرآت نہ ہو سکے،ڈاکٹر ذاہد ظہیر نے مزید کہا کہ پاکستان کواس وقت اندرونی اور بیرونی خطرات کا سامنا ہے اس لیے پاکستان کی سلامتی بقااور ایٹمی اثاثوں کی حفاظت کیلیے ہم سب کو مل کا کام کرنا ہوگایوم آذادی کے مبارک مو قع پرقوم کے نام اپنے پیغام میں ڈاکٹر ذاہد ظہیر نے مزید کہا کہ قائد کے فرمودات پر عمل پیرا ہو کر ہی حقیقی معنوں میں ملک و قوم کی خدمت کی جا سکتی ہے اور ملک تیزی سے ترقی کی راہ پر گامزن ہو سکتا ہے،جبکہ14اگست کے موقع پر ہمیں ان سب شخصیات کو بھی یاد رکھنا چاہے جنہوں نے پاکستان کی سلامتی اور پاکستانیوں کی فلاع وبہبود کے لیے بے شمار قربانیاں دی اور پاکستان کے استحقام پر کوئی سودے بازی نہیں کی شہید ذولفقار علی بھٹو او ر شہید محترمہ بے نظیر بھٹو نے وطن عزیز کے لیے اپنی جانوں کا نذرانہ پیش کیاجو پاک سر زمین سے انکی عقیدت اور محبت کا منہ بولتا ثبوت ہے،،۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جلالپورجٹاں میں نامعلوم افراد نے نوجوان کو سوتے ہوئے ذبح کر دیا
گجرات (جی پی آئی ) جلالپورجٹاں میں نامعلوم افراد نے نوجوان کو سوتے ہوئے ذبح کر دیا گذشتہ شب تھانہ صدر جلالپورجٹاں کے علاقہ چوپالہ میں وقاص عرف سنی اپنے ڈیرہ پر سو رہا تھا کہ نامعلوم افراد نے اسے گلے پر چھری پھیر کر موت کے گھاٹ اتار دیا اور فرار ہو گئے پولیس نے مقتول کی نعش کا عزیز بھٹی شہید ہسپتال گجرات میں پوسٹمارٹم کروانے کے بعد ورثاء کے حوالہ کر دی اور مقتول کے بھائی تنویر احمد کی رپورٹ پر نامعلوم ملزمان کے خلاف مقدمہ درج کر کے تفتیش شروع کر دی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شاہ رخ ملک نے میٹرک میں نمایاں پوزیشن حاصل کرنے والی طالبہ اقراء عابد کو مبارک باد پیش کی
گجرات(جی پی آئی)معروف صحافی و کالم نگار شاہ رخ ملک نے اپنے بیان میں میٹرک کے امتحانات میں نمایاں پوزیشن حاصل کرنے والی طالبہ اقراء عابد کو مبارک باد پیش کی ہے اور ان کے والد عابد مسعود ملک کو بھی مبارک باد پیش کرتے ہوئے امید ظاہر کی ہے کہ وہ آئندہ بھی اسی طرح محنت و لگن سے تعلیم حاصل کرکے ملک و قوم کا نام روشن کرینگی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات میں بارش سے موسم خوشگوار ہو گیا
گجرات (جی پی آئی ) گجرات میں بارش سے موسم خوشگوار ہو گیا نشیبی علاقوں میں پانی کھڑا ہونے سے شہریوں کو مشکلات کا سامنا گذشتہ روز گجرات اور گردونواح میں صبح سے ہی بادل چھا گئے اور سارا دن بارش کا سلسلہ جاری رہا جس سے نشیبی علاقوں میں اکثر سرکاری دفاتر میں پانی کھڑا ہونے سے شہریوں اور دفتروں میں اپنے کام کاج کیلئے آنے والے سائلین کو مشکلات کا سامنا کرنا پڑا ٹی ایم اے حکام شہر سے پانی نکالنے میں مصروف رہے جبکہ بالائی علاقوں میں بارشوں سے دریائے چناب اور گجرات سے گزرنے والے برساتی نالے بھمبر میں پانی کی سطح بلند ہونے سے ارد گرد کے دیہاتوں کے لوگ نقل مکانی کر کے محفوظ مقام پر منتقل ہو گئے ہیں ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گجرات میں آج 14 اگست جوش و خروش کے ساتھ منایا جائے گا
گجرات (جی پی آئی ) گجرات میں آج 14 اگست جوش و خروش کے ساتھ منایا جائے گا گجرات کھاریاں سرائے عالمگیر ڈنگہ لالہ موسیٰ کنجاہ منگووال جلالپورجٹاں ٹانڈہ کڑیانوالہ کوٹلہ ارب علی خاں سمیت ضلع بھر کے دیہاتوں میں 14 اگست منانے کی تیاریاں مکمل ہو گئیں شہریوں نے بڑے بڑے قومی پرچم اپنے گھروں کی چھتوں پر لگا دئیے ہیں جبکہ گاڑیوں اور موٹر سائیکلوں پر بھی قومی پرچم لگائے گئے ہیں بعض گاڑیوں کو قومی پرچم کے رنگ میں رنگ دیا گیا ہے خصوصاً بچوں میں جشن آزادی منانے کا جوش و خروش پایا جاتا ہے گلی محلوں بازاروں کو قومی پرچموں اور جھنڈیوں سے سجا دیا گیا ہے جبکہ منچلے نوجوانوں نے اپنے موٹر سائیکلوں کے سائیلنسر اتار دئیے ہیں دوسری طرف ضلعی انتظامیہ نے ون ویلنگ نافذ کر دی ہے۔
Related Posts
