غیر قانونی ٹرانسپورٹ اڈے شہریوں کیلئے وبال جان بن گئے شہری تنظیموں کے عہدیداروں اور عوامی حلقوں کی جانب سے اصلا ح احوال
پیرمحل ( میاں اسد حفیظ سے) غیر قانونی ٹرانسپورٹ اڈے شہریوں کیلئے وبال جان بن گئے شہری تنظیموں کے عہدیداروں اور عوامی حلقوں کی جانب سے اصلا ح احوال کا مطالبہ۔تفصیل کے مطابق شہر کے وسطی اللہ چوک میں قائم غیر قانونی ٹرانسپورٹ اڈوں کو ختم کرنے کیلئے شہری کئی سالوں سے ضلعی انتظامیہ سے مطالبہ کرتے چلے آ رہے تھے کہ تحصیل میں تعینات ہونے والے اسسٹنٹ کمشنر چوہدری محمد خالد گجر نے شہر کے بارونق چوک سے غیر قانونی ٹرانسپورٹ اڈوں کو ختم کرکے عوام کا دیرینہ مطالبہ پورا کر دیا تھا مگر ٹرانسپورٹروں نے جنرل بس اسٹنیڈ میں اپنے اڈے قائم کرنے کی بجائے لاری اڈا کے عین سنگم پر سبزی منڈی روڈ پر اپنے اڈے قائم کر لئے۔مذکورہ بالا غیر قانونی ٹرانسپورٹ اڈوں کے قائم ہونے سے قریبی محلوں کے شہریوں کی زندگیاں اجیرن ہو چکی ہیں رات کے اوقات میں بڑی گاڑیوں کے ڈرائیورپریشر ہارن اس قدر زور دار ہارن بجاتے ہیں کہ شہری چین کی نیند بھی نہیں سو سکتے۔سبزی منڈی روڈ سے 24گھنٹے بڑی ٹریفک کے گزر سے اڑنے والی دھول بھی شہریوں کو موذی امراض میں مبتلا کرنے میں اپنا اہم کردار ادا کر رہی ہے۔شہر سے گزرنے والی بھاری ٹریفک کا داخلہ شہری حلقہ میں بند کرنے کیلئے عوامی حلقوں نے متعدد بار ضلعی انتظامیہ کے سامنے اپنا مطالبہ پیش کیا مگر کسی بھی ذمہ دار کے کانوں پر جوں تک نہیں رینگی۔شہر سے بھاری ٹریفک کا بوجھ کم کرنے کیلئے کروڑوں روپے کی لاگت سے بائی پاس بھی تعمیر کیا گیا مگر شہر سے ٹریفک کا بوجھ کم نہ ہو سکا۔شہریوں نے بتایا کہ صوبائی حکومت کی سرکاری اراضی پر غیر قانونی ٹرانسپورٹ اڈے قائم ہونا تحصیل انتظامیہ کی نااہلی کو ثابت کرتا ہے اگر ہنگامی بنیادوں پر ٹرانسپورٹ اڈوں کو جنرل بس اسٹینڈ میں منتقل نہ کیا گیا تو ہم DCOآفس ٹوبہ ٹیک سنگھ کے سامنے احتجاجی دھرنہ دینے پر مجبور ہو جائیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان کیلئے قیمتی زرمبادلہ کمانے والے پھٹی کے کاشتکاروں اور زمینداروں کا معاشی قتل کیا جا رہا ہے
پیرمحل ( میاں اسد حفیظ سے) پاکستان کیلئے قیمتی زرمبادلہ کمانے والے پھٹی کے کاشتکاروں اور زمینداروں کا معاشی قتل کیا جا رہا ہے ان خیالات کااظہار مہر شاہد زیب سرگانہ ایڈوکیٹ چیئرمین کسان بچائو موومنٹ میں اپنے ایک بیان میں کہا کہ حکمران کپاس کے کاشتکاروں اور جنرز کی شکایت پر کان نہیں دھر رہے جس سے وہ سخت مایوسی کا شکار ہیں۔ کیونکہ کپاس اگانے پر وہ سخت محنت کے ساتھ ساتھ قرضے لے کر کھاد اور ادویات کے استعمال کے علاوہ مہنگی بجلی اور ڈیزل استعمال کر کے آبپاشی کرتا ہے لیکن اسے اپنی تمام محنت اور سرمایہ کاری ضائع ہوتی نظر آ رہی ہے اور اس کیلئے قرضوں کی ادائیگی بھی مشکل ہو جائے گی۔ انہوں نے کہاکہ کپاس کی خریداری کا ذمہ دار سرکاری ادارہ ٹریڈنگ کارپوریشن آف پاکستان مختلف حیلوں بہانوں سے کسانوں اور فیکٹری مالکان کو تنگ کر رہا ہے، خوامخواہ اعتراض لگا کر خریداری نہیں کی جاتی جس کے باعث کسان بدترین مالی بحران کا شکار ہورہے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سیکرٹری جنگلات نے محکمانہ کرپشن میں ملوث افراد کو بے نقاب کرنے کے احکامات صادر کر دیئے
پیرمحل ( میاں اسد حفیظ سے) سیکرٹری جنگلات نے محکمانہ کرپشن میں ملوث افراد کو بے نقاب کرنے کے احکامات صادر کر دیئے۔تفصیل کے مطابق قصبہ سندھیلیانوالی کی سماجی شخصیت محمد جاوید کھرل نے سیکرٹری جنگلات پنجاب شیر عالم سے ملاقات کے موقع پر درخواست گزاری تھی کہ کھیکھہ راجباہ کو پختہ کرنے کیلئے راجباہ کے دونوں اطراف سے کھڑے قیمتی سبز درختوں کو کٹوانے کیلئے منظوری سیکرٹری جنگلات اور محکمہ انہار کے افران بالا سے لیناتھی لیکن ایسا ہرگز نہ کیا گیا اور DFO نے مبینہ طور پر اپنے حواریوںکی مدد سے بغیر منظوری سر سبز درخت کٹوا کر کروڑوں روپے کا نقصان کیا جب کہ اسی طرح کمالیہ پلانٹیشن بلاک نمبر 4سے بھی بھاری مالیت کے درختوں کا غیر قانونی قتل کر دیا گیا۔DFOنے تقریباً 45کے قریب ملازمین کو بھی ملازمتوں سے برخاست کروانے میں اہم کردار ادا کیا تا کہ ملازمین خوف زدہ ہو جائیں اور اس کی کرپشن بے نقاب نہ ہوسکے۔درخواست میں انکشاف کیا گیا ہے کہ کمالیہ جنگل میں مختلف ترقیاتی سکیموں کی مد میں بھی کروڑوں روپے کے فنڈز جعلی بلوں کے ذریعے ہڑپ کئے جا رہے ہیں۔کرپشن الزامات کی انکوائری کروانے کیلئے سیکرٹری جنگلات نے انکوائری آفیسر مقرر کرنے کے احکامات جاری کر دیئے تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
تحصیل سرکل پیرمحل میں تعینات ٹریفک پولیس افسران حامد علی اور محمد وحیدنے ماہ نومبر2014میں590گاڑیوں کے چالان
پیرمحل ( میاں اسد حفیظ سے) تحصیل سرکل پیرمحل میں تعینات ٹریفک پولیس افسران حامد علی اور محمد وحیدنے ماہ نومبر2014میں590گاڑیوں کے چالان کرنے کے علاوہ1,86,550روپے جرمانہ بھی کئے۔جب کہ پولیس افسران نے دھواں چھوڑنے والی اوور لوڈ گاڑیوں کے علاوہ بغیر ہیلمٹ کے موٹر سائیکل چلانے والے موٹر سائیکل سواروں کے خلاف بھی کاروائی عمل میں لائی۔مذکورہ افسران نے ایک ملاقات میں بتایا کہ قانون سے کوئی بھی شہری بالا تر نہیں۔ٹریفک قوانین پر عمل درآمد کروانا ہماری اولین ذمہ داریوں میں شامل ہے۔انہوں نے بتایا کہ بھاری ٹریفک کو کسی صورت بھی شہرکی وسطی شاہراہ سے نہیں گزرنے دیا جائے گا اور یہ با ت یقینی بنائی جائے گی کہ تمام بھاری ٹریفک کا گزر بائی پاس روڈ سے ہو۔جب کہ کم عمر رکشہ ڈرائیوروں کے خلاف بھی ہنگامی بنیادوں پر کاروائی عمل میں لائی جا رہی ہے اور ساتھ گاڑیوں اور موٹرسائیکلوں پر لگے پریشر ہارن کی تلفی بھی ہر صورت یقینی بنائی جائے گی۔ تھانہ پیرمحل پولیس نے زیر حراست محمد ایوب عرف بگی سکنہ 184گ ب کی نشاندہی پر 222بور رائفل برآمد کر کے ملزم کے خلاف مقدمہ کا اندراج کر دیا تھا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسلح ڈاکوئوں نے مونجی کے بیوپاریوں کو نقدی اور موبائل فون سے محروم کر دیا
پیرمحل ( میاں اسد حفیظ سے)مسلح ڈاکوئوں نے مونجی کے بیوپاریوں کو نقدی اور موبائل فون سے محروم کر دیا۔تفصیل کے مطابق گائوں 667/8گ ب کے محمد منشاء اور محمد اختر گائوں 669/10گ ب سے مونجی کی رقم لے کر بذریعہ موٹر سائیکل واپس اپنے گھر کو آ رہے تھے کہ موٹر سائیکل سوار تین ڈاکوئوں نے جان سے مارنے کی دھمکی دے کر بیوپاریوں سے دو لاکھ روپے نقدی سمیت موبائل فون چھین لئے اور اسلحہ لہراتے ہوئے فرار ہونے میں کامیاب ہو گئے۔تھانہ پیرمحل پولیس نے ڈکیتی میں ملوث ملزمان کے خلاف بجرم 392ت پ کے تحت مقدمہ کا اندراج کر کے کاروائی کا عمل شروع کر دیاتھا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
با اثر افراد کے بیٹوں نے دوشیزہ کو زیادتی کا نشانہ بنانا ڈالا ملزمان کے خلاف مقدمہ درج
پیرمحل ( میاں اسد حفیظ سے) با اثر افراد کے بیٹوں نے دوشیزہ کو زیادتی کا نشانہ بنانا ڈالا ملزمان کے خلاف مقدمہ درج۔تفصیل کے مطابق نواحی گائوں 681/22ْگ ب کی رہائشی انوری بی بی زوجہ نذیر احمد کی جواں سالہ بیٹی فریحہ کو مبینہ طورپر رات کے وقت مذکورہ گائوں کے مسمیان واجد علی ،محمد عادل ،محمد شاہد اور محمد الیاس نے اپنے دیگر دو ساتھیوں سے باہم صلا ح مشورہ ہو کر گھر سے اٹھاتے ہوئے قریبی باغ میں لے جا کر زیادتی کا نشانہ بنا ڈالا۔گھر میں بیٹی کی عدم موجودگی میں ماں نے گائوں کے دیگر افرد کے ساتھ مل کر تلاش شروع کی تو اوباش دو شیزہ کو برہنہ حالت میں چھوڑ کر فرار ہو گئے۔تھانہ پیرمحل پولیس نے زیادتی واقع میں ملوث ملزمان کے خلاف بجرم 376ت پ کے تحت مقدمہ کا اندراج کرکے کاروائی کا عمل شروع کر دیا تھا۔ذرائع کے مطابق مقدمہ میںنامزد ملزمان نے گرفتاری کے ڈر سے اپنی عبوری ضمانتیں کروا لیں تھیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سندھیلیانوالی روڈ پر واقع گائوں 674/15گ ب میں مبینہ طور پر دیرینہ رنجش کی بناء پرمذکورہ گائوں
پیرمحل ( میاں اسد حفیظ سے) سندھیلیانوالی روڈ پر واقع گائوں 674/15گ ب میں مبینہ طور پر دیرینہ رنجش کی بناء پرمذکورہ گائوں کے محمد عمر ،محمد حبیب اور محمد صدیق نے ڈنڈوں اور سوٹوں سے لیس ہوتے ہوئے اپنے ہی گائوں کے محمد جاوید اقبال گجر کی اہلیہ ساجدہ بی بی کو اس وقت وحشیانہ تشدد کا نشانہ بنا ڈالا جب وہ اپنے گھر کچن میں امور خانہ داری سرانجام دینے میں مصروف عمل تھی۔تھانہ پیرمحل پولیس نے زخمی خاتون کے شوہر کی مدعیت میں واقع میں ملو ث ملزما ن کے خلاف مقدمہ کا اندراج کر کے کاروائی کا عمل شروع کر دیا تھا۔
