جھنگ : ڈویژنل کمشنر مومن آغا نے ہدایت کی ہے کہ محرم سیکورٹی پلان کی جامعیت اوراس پر کامیابی سے عملدرآمد میں کوئی کسر باقی نہیں رہنی چاہیے اورتمام تر انتظامات کی مسلسل نگرانی کی جائے تاکہ کسی جگہ کوئی خلا نہ رہے۔انہوں نے یہ ہدایت آر پی او بلال صدیق کمیانہ کے ہمراہ جھنگ سٹی میں محرم الحرام کے جلوسوں کے روٹس اورمجالس کے مقامات پرانتظامی وحفاظتی امورکاجائزہ لیتے ہوئے جاری کی۔ڈی سی اوغازی امان اللہ ،ڈی پی او ہمایوں مسعودسندھو،اسسٹنٹ کمشنرز مہر شفقت اللہ مشتاق،شاہد عباس جوئیہ اور دیگر افسران بھی اس موقع پر موجود تھے ۔ڈویژنل کمشنر نے کہا کہ ٹربل پوائنٹس پر سیکورٹی کے اضافی اقدامات ہونے چاہیںاوراس سلسلے میں کوئی پہلو نظروں سے اوجھل نہ ہو۔انہوں نے انتظامی افسران سے کہا کہ وہ محرم جلوسوں اورمجالس کے مقامات پر موجود رہیں اورامن کمیٹی کے ارکان سے گہرارابطہ رکھیں،کسی بھی شکایت یا مسئلہ کو باہمی مشاورت اورمعاملہ فہمی سے سلجھایا جائے۔انہوں نے محرم الحرام کے جلوسوں کے راستوں کو ہمہ وقت کلیئر رکھنے،صفائی ستھرائی،تجاوزات کے مکمل خاتمے اور مختلف تنصیبات کی حفاظت کو بھی یقینی بنانے کی ہدایت کی۔انہوں نے محرم کے مرکزی جلوس کے منتظمین سے بھی ملاقات کی اور کہا کہ عشرہ محرم کے دوران سیکورٹی انتظامات کی کامیابی کے لئے بھرپور تعاون کرتے ہوئے محرم جلوس اورمجالس کے آغاز اوراختتام کے اوقات کی پابندی کا خیال رکھیں۔انہوں نے ضلعی وتحصیل انتظامیہ اورپولیس میں مکمل کوآرڈینیشن برقراررکھنے کی تاکید کرتے ہوئے کہا کہ مشکوک افراد پر کڑی نظر اور شہر کے داخلی وخارجی راستوں کی مسلسل نگرانی کی جائے۔آر پی او بلال صدیق کمیانہ نے ہدایت کی کہ تحفظ عامہ کویقینی بنانے کے لئے جلوس کے روٹس کی ذیلی گلیوں کو سیل کیا جائے اور سیکورٹی امور کی جگہ کوئی نرمی نہیں ہونی چاہیے۔اس سلسلے میں تمام تر سیکورٹی آلات کو بروئے کار لائیں۔قبل ازیں ڈویژنل کمشنر مومن آغا نے ڈی سی او آفس جھنگ میں ایک اجلاس کے دوران عشرہ محرم کے انتظامی وحفاظتی امورکے بارے میں بریفنگ لی اورکہا کہ سیکورٹی پلان کا روزانہ کی بنیاد پر جائزہ لے کراسے مزید جامع بنایا جائے۔انہوں نے کہا کہ سی سی ٹی وی کیمرے،واک تھرو گیٹس،میٹل ڈیٹیکٹرز اوردیگر آلات کو فنکشنل اور متعین رکھنے کے علاوہ اہم مرکزی جلوسوں کی ویڈیو ریکارڈنگ بھی کی جائے۔کمشنر نے جلوسوں ومجالس کے اوقات میں لوڈ شیڈنگ کی صورت میں متبادل کے طور پر جنریٹرز/سرچ لائٹس کا انتظام یقینی بنانے کی بھی ہدایت کی۔انہوں نے محرم انتظامات کے استحکام اور مانیٹرنگ کے سلسلے میں ارکان اسمبلی کی مشاورت اور بھرپور معاونت پر بھی زور دیا۔ڈی سی اوغازی امان اللہ نے محرم انتظامات کے بارے میں بریفنگ دی اور بتایا کہ ضلع بھر میں عشرہ محرم کے دوران 1624مجالس اور 464جلوسوں کیلئے سیکورٹی کے سخت ترین انتظامات کئے گئے ہیں۔انہوں نے بتایا کہ ضلع کا مرکزی کنٹرول روم ڈی سی او آفس میں قائم کرکے تمام متعلقہ سٹاف کی ڈیوٹیز لگادی گئی ہیں ۔انہوں نے بتایا کہ ڈسٹرکٹ انٹیلیجنس کمیٹی اور ضلعی امن کمیٹی کے اجلاسز کے دوران انتظامات اور مسائل کاجائزہ لے کر ان کے فوری ازالہ کے لئے اقدامات کئے جارہے ہیں ۔انہوں نے بتایا کہ تمام مکاتب فکر کے علماء کرام فرقہ وارانہ ہم آہنگی اور بھائی چارے کے فروغ میں اہم کردار ادا کررہے ہیں۔ڈی پی او نے جلوسوں کی کیٹگری کی تفصیلات سے آگاہ کرتے ہوئے بتایا کہ ضلع میں اے کیٹگری کے 74،بی کے 99اورسی کیٹگری کے 291جلوسوں کے راستوں پر سیکورٹی کے غیر معمولی انتظامات کئے گئے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جھنگ : ڈویژنل کمشنر مومن آغا نے کہا ہے کہ محرم الحرام کے حفاظتی انتظامات کے ہر پہلو پر گہری نظر رکھی جائے اور خصوصا حضرت سلطان باھو کے عرس مبارک کے دوران سخت ترین سیکورٹی کو یقینی بنائیں ۔ انہوں نے یہ بات آر پی او بلال صدیق کمیانہ کے ہمراہ شورکوٹ اور گڑھ مہاراجہ کے دورہ کے دوران محرم الحرام اور عرس مبارک کی تقریبات کے سیکورٹی امور کا جائزہ لیتے ہوئے کہی ۔ ڈی سی او جھنگ امان اﷲ خاں ‘ ڈی پی او ہمایوں سندھو اور دیگر افسران بھی اس موقع پر موجود تھے ۔ ڈویژنل کمشنر اور آر پی او نے محرم الحرام کے جلوسوں کے روٹس اور اہم مجالس کے مقامات پر حفاظتی حکمت عملی کا جائزہ لیتے ہوئے متعلقہ افسران کو ہدایت کی کہ محرم الحرام کی تمام تقریبات کو سیکورٹی حصار میں رکھا جائے اور جلوسوں کے راستوں میں گھروں اور دکانوں کی چھتوں پر بھی سیکورٹی سٹاف چوکس رکھیں ۔ انہوں نے کہا کہ مجالس عزا کو جانے والے تمام راستوں کو سیل کر دیا جائے اور ناکہ بندی کرکے مجالس میں شریک ہونے والوں کی دوہری چیکنگ ہونی چاہئے ۔ ڈویژنل کمشنر اور آر پی او نے دربار شریف حضرت سلطان باھو کا بھی دورہ کیا اور عرس مبارک کے دوران منعقد ہونے والی تقریبات کی تفصیلات کا جائزہ لیتے ہوئے ڈیوٹی افسران سے کہا کہ وہ حفاظتی انتظامات کے ساتھ ساتھ نظم و ضبط کو برقرار رکھنے کے لئے خصوصی اقدامات کریں اور زائرین کے تحفظ اور سہولت کے لئے تمام تر وسائل بروئے کار لائے جائیں ۔انہوں نے ٹریفک مینجمنٹ اور گاڑیوں کی پارکنگ کے نظام کو مزید بہتر بنانے کی ضرورت پر زور دیتے ہوئے کہا کہ مشکوک افراد پر کڑی نظر رکھی جائے ۔اس موقع پر ڈی سی او اور ڈی پی او نے محرم الحرام اور عرس مبارک حضرت سلطان باھو کے سیکورٹی پلان سے آگاہ کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
محرم الحرام کے حوالہ سے پروبیشنرز آفیسرز کی ٹیم کا ریسکیو 1122کے سنٹرل اسٹیشن کا دورہ اور اطمنان کا اظہار۔
جھنگ (ریسکیو ذرائع)تفصیلات کے مطابق پنجاب مینجمیٹ اینڈ پروفیشنل سروسیز(PMS) کی جانب سے سیکرٹری DRTAحسن رضا کی زیرقیادت پروبیشنرز آفیسرز کی ٹیم نے ریسکیو 1122جھنگ کا دورہ کیا اور محرم الحرام کے حوالہ سے ایمر جنسی پلان اور انتظامات کا جائزہ لیا جس پر اُنہوں نے ریسکیو 1122کے جوانوں کی پیشہ وارنہ صلاحتوں کوسراہتے ہوئے ڈسٹرکٹ ایمرجنسی افیسرڈاکٹر طار ق سعید اور اُن کے تمام عملہ کی کارگردگی کی تعریف کی اور اطمنان کا اظہار کیاپروبیشنرز آفیسرز کی ٹیم میں محمد سلمان،مسٹر فیصل،مسٹر توقیراحمد،میاں مراد حسین،مسٹر زریاب ساجداور ڈاکٹر مبارک علی رضا شامل تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شہری کے گھر میں اچانک آگ بھڑک اُٹھی
جھنگ (ریسکیو ذرائع) تفصیلات کے مطابق محلہ حسنانہ جھنگ صدر میں خضر حیات نامی شخص کے گھر میںشارٹ سرکٹ کی وجہ سے اچانک آگ بھڑک اُٹھی ریسکیو 1122کے عملہ نے بروقت پہنچ کر ا گ پر قابو پالیا اور لاکھوں مالیت کا سامان محفوظ کیاتاہم کوئی جانی نقصان نہیں ہوا۔
