جہلم (ڈاکٹر مظہر مشر) سابق چیئرمین بلدیہ جہلم راجہ ظفر اقبال نے نوابزادہ اقبال مہدی کی وفات پر کہا ہے کہ مرحوم سیاست میں ایک سنہری باب کی حیثیت رکھتے تھے، انہوں نے ساری زندگی اپنی سیاست کا محور شرافت، ایمانداری اور مخلص وفادار انہ طرز عمل اپناتے ہوئے گذاردی، ان کی وفات پر مسلم لیگ(ن) میں ایسا خلاء پیدا ہوا ہے جس کا پر ہونا بہت مشکل ہے، انہوں نے حقیقی معنوں میں سیاست کو عبادت سمجھ کر کیا، راجہ ظفر اقبال نے کہا کہ ان کی سیاسی زندگی میں میاں نواز شریف کے ساتھ وابستگی ایک بھائی کی طرح رہی، انہوں نے ہر قسم کے حالات کو برداشت کیا مگر سیاسی وفاداری تبدیل نہ کی، وہ جہاں بھی ہوتے تھے، اپنے علاقے سے متعلق روزانہ کی بنیاد پر حالات سے باخبر رہتے تھے ، وہ غریب پرور اور انتہائی شفیق انسان تھے ، انہوں نے اپنے سیاسی حریف اور ووٹ نہ دینے الے کے خلاف کبھی بھی انتقام نہ لیا یہی ان کی سیاسی زندگی کا سب سے بڑا اثاثہ تھا، یقینا جہلم کی سیاست میں ان کے جانے سے جو خلاء پیدا ہوگیا ہے وہ کبھی بھی پر نہ ہوسکے گا۔ انہوں نے اس موقع پر کہا کہ وزیراعلیٰ پنجاب میاں شہباز شریف نے انہیں سرکاری طور پر علاج کروانے کیلئے امریکہ جانے کی آفر کی مگر انہوں نے انتہائی بردباری اور شکریہ کے ساتھ یہ آ فر قبول نہیں کی ، اور اپنے ذاتی خرچ پر ہندوستان سے علاج کروانے کو ترجیح دی ، وہ قومی خزانے کو ہمیشہ غریبوں کی امانت سمجھتے تھے ۔ یا درہے کہ مرحوم نوابزادہ اقبال مہدی راجہ ظفر اقبال کے ماموں زاد بھائی بھی تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جہلم( ڈاکٹر مظہر مشر) نومنتخب کونسلر وارڈ نمبر2خادم اللہ بٹ نے کہا ہے کہ نوابزادہ اقبال مہدی کی وفات سے ہماری تو دنیا ہی اجڑ گئی ہے ، انہوں نے جس محبت اور شفقت کا اظہار مجھ سے کیا میں زندگی بھر ان کا احسان نہیں اتار سکوں گا ۔ انہوں نے کہا کہ آج لوگوں کا جم غفیر دیکھ کر مجھے محسوس ہوتا ہے کہ وہ نہ صرف ایک اچھے سیاستدان تھے بلکہ ایک عظیم انسان بھی تھے۔ ان کی زندگی غریب پروری کی سینکڑوں مثالوں سے بھری پڑی تھی ، انہوں نے کبھی بھی کسی کا دل نہ دکھایا اور ایمانداری ان کا طرع امتیاز تھا۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایم این اے راجہ نوابزادہ اقبال مہدی (مرحوم)کی زندگی پر ایک نظر
جہلم (رپورٹ۔ڈاکٹر مظہر مشر) جہلم کی سیاست کے بے تاج بادشاہ نوابزادہ اقبال مہدی کی سیاسی زندگی ناقابل شکست رہی ، انہوں نے 1985ء سے سیاسی زندگی کا آغاز کیا ۔ ممبر ضلع کونسل بننے سے لیکر صوبائی وزیر اور چیئرمین استحقاق کمیٹی قومی اسمبلی تک فرائض سر انجام دیئے مگر کرپشن کا ایک روپیہ بھی ان کی سیاسی زندگی کو داغدار نہ کر سکا اور ترقیاتی کاموں کا وہ جال اپنے علاقے میں بچھایا کہ ووٹرز کے پاس جانے کی بھی ضرورت محسوس نہ رہتی تھی ۔مرحوم نے اپنی تعلیم ایچی سن کالج سے حاصل کی ، سپیکر قومی اسمبلی ایاز صادق انکے ہر دلعزیز کلاس فیلوز میں شامل تھے۔ وزیر اعظم پاکستان میاں نواز شریف اور وزیر اعلیٰ پنجاب میاں شہباز شریف ان کو اپنے انتہائی معتبر ساتھیوں میں شمار کرتے تھے ، قریبی ذرائع کے مطابق مرحوم نے دو شادیاں کی تھیں ، ایک شادی سے دو بیٹے اور ایک بیٹی جبکہ دوسری شادی سے دو بیٹیاں ہیں ، انہوں نے ساری زندگی اپنی والدہ کی خدمت میں گذار دی ، آج بھی والدہ اللہ تعالیٰ کے فضل و کرم سے حیات ہیں اور ان کے ساتھ خصوصی شفقت کرتی تھیں ، مرحوم کی 9بہنیں تھیں ،آپ ان کے اکلوتے ہی بھائی تھے ، تمام بہنوں کو اپنے اس بھائی سے انتہا درجے کا پیار تھا ، کبھی بھی انہوں نے اپنی بہنوں کو اف تک نہیں کہا ، ان کی ایک بہن سیاسی طور پر ان کے نقش قدم پر چلتے ہوئے آج پاکستان تحریک انصاف کی طرف سے ممبر صوبائی اسمبلی ہیں ، اس خاندان کو یہ بھی اعزاز حاصل ہے کہ جہاں مرحوم نوابزادہ اقبال مہدی مسلم لیگ (ن) کی قیادت کے انتہائی قریب رہے ، وہیں نوابزادی راحیلہ مہدی بھی پی ٹی آئی میں انتہائی قدر کی نگاہ سے دیکھی جاتی ہیں ،نوابزادہ اقبال مہدی کی سیاسی زندگی اس قدر کشش والی تھی کہ ان کے حلقہ احباب میں نہ صرف مسلم لیگ(ن) کے لوگ تھے بلکہ پیپلز پارٹی ، تحریک انصاف ، جماعت اسلامی غرضیکہ تمام سیاسی جماعتوں کے لیڈران و ممبران بھی شامل تھے ، انہوں نے ساری زندگی جس مشغلہ سے زیادہ لگائو رکھا وہ شکار کے بہت شوقین تھے ، پاکستان بھر سے سیاستدان اور اعلیٰ شخصیات شکار کیلئے ان کے پاس آتے تھے ۔ علاج کے لئے ایک ہفتہ قبل ہی ہندوستان کے شہر نئی دہلی روانہ ہوئے تھے ، انہیں کیا معلوم تھا کہ ان کے دہلی جانے سے اہل جہلم کی ”دِلّی ” ہمیشہ کیلئے ہی اجڑ جائے گی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جہلم(ڈاکٹر مظہر مشر) رکن قومی اسمبلی نوابزادہ اقبال مہدی کی نماز جنازہ کل ( بروزبدھ) داراپور، تحصیل جہلم میں صبح گیارہ بجے ادا کی جائیگی۔ نماز جنازہ اعلی حکومتی شخصیات، وفاقی و صوبائی وزرائ، اراکین قومی و صوبائی اسمبلی،افسران ، معززین علاقہ ، سیاستدان اور زندگی کے تما م شعبوں سے تعلق رکھنے والے افراد کثیرتعداد میں شریک ہونگے۔ رکن قومی اسمبلی نوابزادہ اقبال مہدی گذشتہ شب مختصر علالت کے بعد اپنے خالق حقیقی سے جا ملے ۔ انہوں سوگواران میں ایک بیوہ، دو بیٹے اوردو بیٹیاں چھوڑے ہیں۔ نوابزادہ اقبال مہدی پانچ مرتبہ رکن قومی اسمبلی بنے اور 1985 میں بطور صوبائی وزیر جنگلات ، وائلڈ لائف اور ماہی پروری بھی خدمات سرانجام دیں۔
ڈاکٹر مظہر مشر
جہلم
موبائیل نمبر۔03455663251
تاریخ۔24-05-16
