ملزمان کو 26اگست تک گرفتار کرکے عدالت میں پیش کیا جائے ،انسداددہشت گردی کی خصوصی عدالت کا حکم
کراچی (پی پی سی)انسداد دہشت گردی کی خصوصی عدالت نے ارشد پپو قتل کیس میں ملوث عذیر جان بلوچ اور رکن قومی اسمبلی شاہجہاں بلوچ سمیت تین ملزمان کے ناقابل ضمانت وارنٹ گرفتاری جاری کردیئے ہیں ۔انسداد دہشت گردی کی خصوصی عدالت کی جج خالدہ یاسین کی عدالت میں ارشد پپو قتل کیس کی سماعت ہوئی ۔پولیس کی جانب سے تفتیشی افسر عدالت میں پیش نہ ہونے پر انسداد دہشت گردی کی عدالت نے عذیرجان بلوچ ،نور محمدعرف بابا لاڈلہ ،لیاری سے منتخب رکن قومی اسمبلی شاہجہاں بلوچ کے ناقابل ضمانت وارنٹ گرفتاری جاری کردیئے ۔عدالت نے حکم دیا کہ 26اگست تک ملزمان کو گرفتار کرکے عدالت میں پیش کیا جائے ۔اس سے پہلے بھی عدالت ملزمان کو اشتہاری قرار دے چکی ہے ۔پولیس کی جانب سے ملزمان کے خلاف موثر کارروائی نہ ہونے پر عدالت نے اظہار برہمی کیا تھا۔ملزمان کیخلاف ارشد پپو کی بیوہ کی درخواست پر مقدمہ درج کیا گیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سندھ ہائی کورٹ نے شاہ رخ جتوئی کو دبئی فرار کرانے میں معاونت فراہم کرنے والے 4ملزمان کی ضمانت کی توثیق کردی
کراچی (پی پی سی)سندھ ہائی کورٹ نے شاہ زیب قتل کیس کے مرکزی ملزم شاہ رخ جتوئی کو دبئی فرار کرانے میں معاونت فراہم کرنے والے 4ملزمان کی ضمانت کی توثیق کردی ہے ۔سندھ ہائی کورٹ کے جسٹس حسن اظہر رضوی کے چیمبر میں شاہ زیب قتل کیس میں مرکزی ملزم کو فرار کرانے میں معاونت فراہم کرنے والے ملزم اشرف جتوئی، نواب جتوئی ،خرم شہزاد اور بلاول ہاؤس کے پروٹوکول آفیسر وصی اختر کے کیس کی سماعت ہوئی۔ ملزمان کے وکیل نے عدالت میں موقف اختیار کیا کہ 27 دسمبر 2012 کو ملزم شاہ رخ جتوئی کراچی ایئرپورٹ پر ضرور دیکھا گیا لیکن ایف آئی اے کی جانب سے جو تفصیلات پیش کی گئی ہیں ان کے شواہد موجود نہیں ہیں ۔ایف آئی اے کے مطابق پی کے 603میں ملزم شاہ رخ جتوئی دبئی فرار ہوا تھا مگر ایف آئی اے پی کے 603میں فرار ہونے شواہد عدالت میں پیش نہیں کرسکی ۔عدالت نے عدم ثبوت پر چاروں ملزمان کی شاہ رخ جتوئی کو دبئی فرار کرانے میں معاونت فراہم کرنے کے کیس میں ضمانت کی توثیق کردی۔قبل ازیں چاروں ملزمان کی پانچ پانچ لاکھ روپے کی عبوری ضمانت منظور کی گئی تھی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سندھ اینٹی کرپشن کورٹ نے محکمہ خوراک میں چوری کے الزام میں ملوث ملزمان کی درخواست ضمانت مسترد کردی
کراچی (پی پی سی)صوبائی اینٹی کرپشن کورٹ نے محکمہ خوراک میں چوری کے الزام میں ملوث ملزمان کی درخواست ضمانت مسترد کردی ۔صوبائی اینٹی کرپشن عدالت کی جج گلشن آراء کی عدالت میں محکمہ خوارک کے ملزمان ظہیر الدین ،غنی ،ہاشم ،اسماعیل اور منظور کی جانب سے ضمانت کے لیے درخواست دی گئی تھی ۔عدالت نے محکمہ خوراک میں ہائی پروفائل چوری میں ملوث ہونے کی وجہ سے ملزمان کی درخواست ضمانت مسترد کردی ۔ملزمان پر محکمہ خوارک کے گودام سے ڈھائی کروڑ روپے کی گندم چوری کرکے فروخت کرنے کا الزام ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سندھ ہائی کورٹ کے سابق جج جسٹس امان اللہ عباسی کراچی میں انتقال کرگئے
کراچی (پی پی سی)سندھ ہائی کورٹ کے سابق جج جسٹس امان اللہ عباسی جمعرات کو کراچی میں انتقال کرگئے ۔جسٹس امان اللہ عباسی کی نماز جنازہ ڈیفنس کھڈا مارکیٹ کی جامع عزیز مسجد میں ادا کی گئی۔جس میں سندھ ہائی کورٹ ججوں ،سینئر وکلاء اور مرحوم کے عزیز و اقارب نے بڑی تعداد میں شرکت کی ۔ جسٹس امان اللہ عباسی کے انتقال پر سندھ ہائی کورٹ سمیت سندھ بھر کی تمام ماتحت عدالتوں میں کارروائی معطل کردی گئی ۔جبکہ اہم کیسز کی سماعت ججوں کے چیمبر میں ہوئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لیاری میں جا بجا گندگی کے ڈھیراور سیوریج کا پانی وبائی امراض کا سبب بن سکتے ہیں،پاسبان
کراچی (پی پی سی) پاسبان کراچی کے نائب صدر اکرم آگریا نے کہا ہے کہ شہرکے دیگر علاقوں کی طرح لیاری میں بھی جا بجا گندگی کے ڈھیر وبائی امراض کا سبب بن سکتے ہیں۔انہوں نے یوم آزادی کے موقع پرپاسبان لیاری کے ذمہ داروںعابد بلوچ، اعجازبلوچ، امجدبلوچ اور اخترقریشی کے ہمراہ لیاری کا دورہ کرتے ہوئے شہریوںسے گفتگو کرتے ہوئے کہا ہے کہ شہر بھر میں اور خصوصی طور پر لیاری میں صفائی کی صورتحال انتہائی خراب ہوچکی ہے۔ عید کے تینوں دن بلدیہ عظمیٰ کراچی کا عملہ غائب رہا جس کی وجہ سے مین شاہراہوں اور گلی کوچوں میں کچرے کے ڈھیر سے سخت تعفن اٹھ رہا ہے اور لیاری کے کئی علاقوںمیں بارش اور سیوریج کا گندہ پانی اب تک سڑکوں اور گلیوں میں جمع ہے جس کی وجہ سے وبائی امراض پھوٹ پڑنے کا خدشہ ہے۔ ایڈمنسٹریٹر بلدیہ عظمیٰ کراچی اور سٹی ایڈمنسٹریٹر محمد حسین سیدلیاری میںبارش و سیوریج کے پانی اور گندگی و کچرے کے ڈھیروں کا نوٹس لیں۔ اکرم آگریا نے کہا کہ گزشتہ ہفتے ہونے والی بارشوں کا پانی اب تک لیاری کی کئی سڑکوں اور گلیوں میں موجود ہے جس کی سے مختلف علاقوں میں سخت بدبو پھلی ہوئی ہے۔ ایک ہفتہ سے زائد عرصہ گذرنے باوجود بلدیہ عظمی کراچی کا عملہ اپنی ذمہ داریوں سے غفلت برت رہا ہے۔ انہوں نے کہا کہ ایک مرتبہ پھر مون سون بارشوں کی پیشن گوئی کی گئی ہے اگر شہرمیںمزید بارشوں کا سلسہ شروع ہوگیا تو صورتحال مزید سنگین ہوجائے گی۔ اکرم آگریانے تمام متعلقہ اداروں سے مطالبہ کیا کہ سڑکوں، گلی محلوں سے کچرے کے ڈھیر فوراََ اٹھائیں جائیں اور نالوں اور گٹروں کی صفائی کی جائے تاکہ سڑکوں اور گلیوں میں جمع گندے پانی کی نکاسی ممکن ہوسکے ۔اگر مزید چند دن کچرے کے ڈھیر اور گندہ پانی جمع رہا تو خدشہ ہے کہ شہر میں وبائی امراض پھوٹ پڑینگے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سفیر امن کا اعزاز اورنگزیب سلطان کی گراں قدر خدمات کا ثمر ہے، رکن سندھ اسمبلی نشاط ضیاء قادری
کراچی (پی پی سی)قومی امن کمیٹی برائے بین المذاہب ہم آہنگی کی جانب سے عالمی ریکارڈ ہولڈر ایتھلیٹ اورنگزیب سلطان کو وطن عزیز میں مختلف شعبوں میں سماجی خدمات ادا کر نے پر وزیر اعظم پاکستان میاں محمد نواز شریف اور وزیر اعلیٰ پنجاب میاں محمد شہباز شریف کی جانب سے سفیر امن کا اعزازدینے کے سلسلے میں منعقدہ تقریب سے خطاب کرتے ہوئے حق پرست رکن صوبائی اسمبلی نشاط محمد ضیاء قادری نے کہاکہ اورنگزیب سلطان پاکستان کا ہونہا ر سپوت ہے سفیر امن کا اعزاز شہر کراچی کے عوام کے لئے اعزاز اور اورنگزیب سلطان کے گراں قدر خدمات کا ثمر ہے تقریب میں قومی امن کمیٹی برائے بین المذاہب ہم آہنگی کے چیئر مین اور حق پرست رکن صوبائی اسمبلی نشاط محمد ضیاء قادری نے پاکستان کا یہ اعزاز ورلڈ ریکارڈ ہولڈر ایتھلیٹ اورنگزیب سلطان کو پیش کیا اس موقع پر شہر کی ممتاز سیاسی و سماجی اور تعلیم و کھیل کے شعبوں سے تعلق رکھنے والی شخصیات نے شرکت کی دریں اثناء شاہ فیصل کالونی کی عوام کی جانب سے اورنگزیب سلطان کو اعلیٰ اعزاز ملنے پر مبارکباد پیش کیا ہے۔
Related Posts
