قصور (بیورورپورٹ) پاکستان فلاح پارٹی کے مرکزی صدر قاضی عتیق الرحمن نے کہاہے کہ آزاد کشمیر اورجہلم انتخابات میں ن لیگ کا ساتھ دینے والی جماعت اسلامی قوم کو کنفیوژکررہی ہے ۔عدالت عظمٰی میں دائر پٹیشن حکومت کو آئینی طورپر تحفظ دینے کی ایک کوشش ہے ۔ حکومت کی کرپشن کے خلاف ٹرین مارچ ، پیدل مارچ اورملک گیر تحریک کے بعد ن لیگ کے ساتھ ملکر کشمیر میں کرپشن ختم کرنے کے مضحکہ خیز اعلان نے جماعت اسلامی کیلئے لوگوں کے دلوں میں ہمدردی کی بجائے دوری پیداکردی ہے ۔سراج الحق نے منافقت میں مولانا فضل الرحمن کو مات دے دی ،ان خیالات کا اظہار انہوں نے میڈیا بریفنگ میں کیا ،انہوں نے کہا کہ معاشی دہشت گردی کرنے والے کسی طوربھی ہمدردی کے مستحق نہیں ہیں تاہم چند ماہ سے حکومت اوراپوزیشن کی نوراکشتی نے قوم کا اعتماد ختم کردیاہے ،حکومت قیام پاکستان کے تمام مخالفین کی باقیات کو پناہ دے چکی ہے ۔الطاف کے حالیہ بیان نے پوری قوم کو اضطراب سے دوچارکردیاہے ۔ اسفند یارولی ، محموداچکزئی ، خواجہ آصف ،منورحسن اوردیگر کے پاکستان اورفوج مخالف بیانات پر راست اقدام نہ اٹھا کر حکومتیں شدید کوتاہی کی مرتکب ہوتی رہیں۔اگر حکومت بچانے کی وجہ سے ان ناپسندیدہ عناصر کے بارے میں نرم رویہ اختیار کیاگیا تو اس کا واضح مطلب یہ ہے کہ حکومت کو ریاست کے تحفظ کی بجائے اپنی ذات اورحکومت کے تحفظ کی فکرہے ،قاضی عتیق الرحمن نے کہا کہ فاروق ستار کی حالیہ پریس کانفرنس “مائنس ون” کی بجائے ابھی تک “سائلینس ون “کا فارمولا نظر آرہاہے۔ ایم کیو ایم کی تقسیم کا عمل شروع ہوگیاہے۔ اردوبولنے والے محب وطن ہیں تاہم ان میں سے بھی ناپسندیدہ عناصر کو قرارواقعی سزادینا ناگزیر ہے ۔ ابھی تک الطاف جیسے ملک دشمن کو قائد کہنے والے قوم کے تیوردیکھ لیں۔ محب وطن طبقات اگر گوشۂ تنہائی میں بیٹھ گئے تو وطن دشمن قوتوں کو کھیل کھیلنے کا موقع ملے گا۔سوشل میڈیا پہ الطاف کی تازہ ترین ٹیلیفونک گفتگو نے ان کی معافی تلافی کے بیان کو بے معنٰی کردیاہے،ملک کو تقسیم کی سازشیں کی جارہی ہیں ۔بھارتی لابی پوری قوت سے پاکستان پر حملہ آور ہوچکی ہے ۔قومی سلامتی کے ضامن اداروں کی صلاحیتوں پر اعتماد ہے ۔ان مکروہ سازشوں کو بکھیرنا ہی ملکی سلامتی اوراستحکام کی علامت ہوگا ۔الطاف سمیت ان کے اس مکروہ عمل میں شامل لوگوں کے خلاف غداری کا مقدمہ درج کیاجائے ۔ حکومت پاکستان لیت ولعل سے کام نہ لے ۔حالیہ بیان کے بعد وطن کے ساتھ محبت کے بے مثال مظاہرے اردو بولنے والے اہلیان کراچی کی حب الوطنی کا ثبوت ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور( بیورورپورٹ )سابق نائب ضلع ناظم حاجی مقصودصابرانصاری نے کہاہے کہ عیدالاضحی کے قریب آتے ہی اشیاء خوردونوش کی قیمتوں میں اضافہ ہوتاجا رہا ہے جس سے عوام کی زندگی اجیرن ہوچکی ہے،سبزیاں،دالیں اورمسالہ جات کی قیمتیں بھی آسمان سے باتیں کررہی ہیں۔گرانفروشی عروج پر ہے جبکہ منڈیوں میں اصل نرخ ناموں پرعمل درآمدنہیں ہورہا،بیشتراشیاء کی فروخت پردوکاندار50روپے فی کلو تک اضافہ وصول کررہے ہیں،پرائس کنٹرول کمیٹیاں محض خانہ پوری کررہی ہیں عملاً وہ غیر فعال ہوچکی ہیں،معمولی جرمانے کرکے مجرمان کو لوٹ مار کے لیے دوبارہ چھوڑدیاجاتاہے۔وہ اپنے ڈیرہ واقع اسٹیل باغ چوک میں شہریوں کے مختلف وفود سے ملاقات میں گفتگو کررہے تھے ،انہوں نے کہاکہ گرانفروشوں،ناجائز منافع خوروں اور ذخیرہ اندوزوں کے خلاف بلاتفریق اور ہنگامی بنیادوں پر ایکشن لینے کی ضرورت ہے۔18کروڑ عوام کو ریلیف میسر نہیں۔مہنگائی نے ہر شعبہ ہائے زندگی سے تعلق رکھنے والے شخص کومتاثر کیا ہے۔دووقت کی باعزت روٹی کمانابھی دن بدن مشکل ہوتاچلاجارہا ہے،رشوت خوری کابازار گرم ہونے کی وجہ سے عوام کو اپنے جائز کام کروانے کے لیے بھی سرکاری افسران کو رشوت دینی پڑتی ہے۔سائلین کی کسی بھی سطح پر کوئی شنوائی نہیں ہورہی۔مزدور طبقہ بے روزگاری کے ہاتھوں تنگ آکر خودکشیاں کرنے پر مجبور ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور(بیورورپورٹ )یونین آف جرنلسٹس کااجلاس ، صحافتی اداروں پرکاروائیوں کی مذمت ، حکومت آزادی صحافت کو یقینی بنائے ،صدر عطا ء محمدقصوری تفصیلات کے مطابق کراچی میں نجی ٹی وی چینلز پرحملوں اور ایم کیو ایم کے قائد الطاف حسین کی جانب سے پاکستان مخالف بیانات دینے اور ملکی سا لمیت کے خلاف کام کرنے پر یونین آف جرنلسٹس،پریس کلب قصور کااجلاس زیرصدارت صدر عطاء محمدقصوری منعقد ہوا ،جس میں جنرل سیکرٹری محمداحمد چوہدری ،نائب صدرخالدنواز خان ، عمران سلفی صدر پریس کلب للیانی ،سعیداحمدبھٹی ،مہر شان الہی ،افتخارسلطانی، بابا عبدالرحمن، ملک عارف علی ودیگرنے شرکت کی ، صدر یونین آف جرنلسٹس عطاء محمدقصوری نے ایم کیو ایم کی جانب سے اے آر وائی ٹی وی،سماء ٹی وی پر حملے کی شدید مذمت کی ہے۔ انہوں نے ٹی وی پر حملے کو متحدہ کی بزدلانہ حرکت قرار دیااور کہا کہ تمام صحافی برادری مشکل کی اِس گھڑی میں افواج پاکستان اور ٹی وی اداروں کے ساتھ ہیں، حکومت آزادی صحافت کو یقینی بنائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور(بیورورپورٹ )بزرگان دین کی زندگیاں ہمارے لئے مشعل راہ ہیں ‘حکومت ان کے پیغام کو عام کرنے کیلئے تمام وسائل بروئے کار لا رہی ہے ‘ضلعی حکومت قصور کی جانب سے عرس حضرت بابا بلھے شاہ ؒ کے موقع پر زائرین کی سیکورٹی اور سہولت کیلئے کئے گئے انتظامات قابل دید ہیں ۔ ان خیالات کا اظہار صوبائی سیکرٹری مذہبی امور و اوقاف نوازش علی نے گزشتہ روز عظیم صوفی شاعر حضرت بابا بلھے شاہ ؒ کے 258ویں سالانہ عرس مبارک کے انتظامات کا جائزہ لینے کیلئے اپنے دورہ کے دوران میڈیا سے گفتگو کرتے ہوئے کیا۔ اس موقع پر ڈی سی او قصور عمارہ خان ‘ڈی او سی عبدالسلام عارف ‘ایڈمنسٹریٹر اوقاف لاہور ریجن ‘منیجر اوقاف ‘ممبران مذہبی امور کمیٹی دربار بابا بلھے شاہ اور دیگر افسران موجود تھے ۔صوبائی سیکرٹری اوقاف نے اپنے دورہ کے دوران دربار بابا بلھے شاہ ؒ پر چادر چڑھائی اور ملک و قوم کی ترقی ، خوشحالی اور سلامتی کیلئے دعا کی ۔ انہوں نے عرس مبارک کے موقع پر ضلعی حکومت کی طرف سے ملک بھر سے آنیوالے زائرین کیلئے سیکورٹی و دیگر انتظامات کا جائزہ لیا اور انہیں قابل تحسین قرار دیا ۔ انہوں نے دربار حضرت بابا بلھے شاہ ؒ پر سیکورٹی کیلئے قائم سینٹرل کنٹرول روم کا دورہ کیا اور دربار شریف کے اندر اور باہر سیکورٹی کیلئے لگائے گئے جدید سی سی ٹی وی کیمروں کا جائزہ لیا ۔ انہوں نے کہا کہ قصور میں بنائے گئے سینٹرل کنٹرول روم کی طرز کے انتظامات دیگر اولیاء اکرام کے عرس مبارک پربھی کئے جائینگے ۔صوبائی سیکرٹری نے گفتگو کرتے ہوئے کہا کہ بزرگان دین کا راستہ امن سکون اور ترقی کا راستہ ہے اس راستے کو اختیار کر کے ہم نہ صرف اپنی آخرت کو سنوار سکتے ہیں بلکہ ہم دنیا میں بھی کامیابی حاصل کر سکتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور(بیورورپورٹ)ڈی سی او قصور عمارہ خان کا گورنمنٹ ایم سی گرلز پرائمری سکول اور زیر تعمیر سپورٹس جمنیزیم کا اچانک دورہ ‘عوام الناس کو تعلیم کی جدید سہولیات کی فراہمی کو ہر صورت یقینی بنانے کا عزم ‘عوامی خدمت میری اولین ترجیح ہے ۔ تفصیلات کیمطابق ڈی سی او قصور عمارہ خان نے گورنمنٹ ایم سی گرلز پرائمری سکول کا اچانک دورہ کیا اور وہاں پر صفائی ستھرائی کے ناقص انتظامات ، خستہ ہال بلڈنگ اور پینے کے صاف پانی کی عدم دستیابی پر سخت برہمی کا اظہار کیا اور ای ڈی او ایجو کیشن کو حکم دیا کہ اس سکول کو فوری طور پر کسی قریبی سکول میں شفٹ کر کے بچوں کو بہترین تعلیمی سہولیات فراہم کی جائیں ۔ انہوں نے پینے کے پانی کی فراہمی کیلئے لگائے گئے فلٹرز کے گندا ہونے پر سکول کی ہیڈ مسٹریس کے خلاف کاروائی کرنے کا بھی حکم دیا ۔ علاوہ ازیں ڈی سی او قصور عمارہ خان نے عرصہ دس سال سے ا لتوا کے شکار سپورٹس جمنیزیم کا دورہ کیا ۔اس موقع پر ڈی او سپورٹس نے بتایا کہ یہ انٹر نیشنل معیار کا یہ عظیم الشان منصوبہ کرپشن ، مالی بدعنوانی اور چند حکومتی اداروں کی عدم دلچسپی کی وجہ سے التوا کا شکار ہے جس پر ڈی سی او نے ڈی او سپورٹس کو حکم دیا کہ وہ فوری طور پر اس پراجیکٹ کے بارے میں ایک جامع رپورٹ مرتب کر کے انہیں دیں اور تمام متعلقہ محکموں کیساتھ آئندہ ہفتے اسی جگہ جمنیزیم میں ایک میٹنگ بلائی جائے جس میں اس زیر التوا جمنیزیم کو قابل استعمال بنانے کیلئے اقدامات بارے فیصلہ کیا جائیگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور(بیورورپورٹ)عرس حضرت بابا بلھے شاہ ؒ کے سلسلہ میں ضلع قصور کی تمام عدالتیں آج (بروز ہفتہ )بند رہینگی ۔تفصیل کے مطابق لاہور ہائی کورٹ نے عرس حضرت بابا بلھے شاہ ؒ کے موقع پر ضلع قصور کی تمام عدالتوں میں 27اگست (بروز ہفتہ ) چھٹی کا اعلان کر دیا ہے اس لئے ضلع قصور کی تمام عدالتیں آج بند رہینگی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور (بیورو رپورٹ )قصابوں کی من مرضیاں۔گوشت سمیت سری پائے کے منہ مانگے نرخ وصول کرنے لگے۔ پرائس کنٹرولر اتھارٹی بے بس۔ تفصیلات کے مطابق قصابوں نے سری ، پائے، اوجھڑی، کلیجی وغیرہ کے من مانے ریٹ مقرر کر رکھے ہیں جس کی وجہ سے شہریوں میں اضطراب پایا جاتا ہے۔ سبزی، پھلوں اور برائلر گوشت کا روزانہ ریٹ مارکیٹ کمیٹی مقرر کرتی ہے جبکہ چھوٹے اور بڑے گوشت کا ریٹ ڈی سی او کی میٹنگ میں ماہانہ بنیادوں پر طے کیا جاتا ہے۔ لیکن گوشت کا ریٹ مقرر کرتے وقت سری، پائے ، کلیجی اور اوجھڑی کا ریٹ مقرر نہیں کیا جاتا جبکہ یہ اشیاء گوشت کی کٹیگری میں نہیںآتیں۔ مذکورہ بالا اشیاء کے ریٹ کے تعین کیلئے قصابوں کو کھلی چھٹی دیدی گئی ہے جو شہریوں سے من مانگے دام وصول کرتے ہیں جو کہ بعض اوقات گوشت کے ریٹ سے بھی زیادہ ہوتے ہیں۔ قصوربھر کی سیاسی، سماجی، معاشرتی تنظیموں اور سول سوسائٹی نے ڈی سی او قصور سے مطالبہ کیا ہے کہ آئندہ مینٹنگ میں سری پائے، کلیجی اور اوجھڑی وغیرہ کے ریٹ جوکہ گوشت کے ریٹ سے نصف ہوتے ہیں، مختص کئے جائیں اور زائد ریٹ وصول کرنے والوں کے خلاف سخت قانونی کاروائی بھی کی جائے۔
