قصور (بیورورپورٹ) ڈی سی او قصور عمارہ خان نے وزیر اعلی پنجاب کی جانب سے معذور بچوں کے علاج معالجہ کیلئے اعلان کردہ 3، 3لاکھ روپے کے امدادی چیک والدین کو دیدیئے ہیں ۔ تفصیل کیمطابق وزیر اعلی پنجاب محمد شہباز شریف نے گزشتہ ماہ ڈی ایچ کیو ہسپتال قصور دورہ کے دوران 3معذور بچوں کے علاج معالجہ کیلئے مالی امداد کا اعلان کیا تھا اور ڈی سی او قصور عمارہ خان کو حکم دیا تھا کہ ان معذور بچوں کے تمام کوائف مکمل کر کے فوری طور پر وزیر اعلیٰ ہاؤس بھیجے جائیں ۔جس پر ڈی سی او قصور نے عملدرآمد کرتے ہوئے تین معذور بچوں کے مکمل کوائف وزیر اعلیٰ ہاؤس بھجوا دیئے جس پر وزیر اعلی پنجاب محمد شہبازشریف نے حویلی خانوالی ضمیر شاہ مصطفی آباد کے رہائشی ریاض عبدالرحمن کے دو معذور بچوں محمد حسن عمر 12سال اور محمد شہباز عمر 11سال کے علاج معالجہ کیلئے 3، 3لاکھ روپے جبکہ بھاگیوال گہلن ہٹھاڑ تحصیل چونیاں ضلع قصور کے رہائشی افتخار علی ڈوگر کے معذور بچے محمد نعیم عمر 10سال کے علاج معالجہ کیلئے 3لاکھ روپے کی مالی امداد کی منظوری دی ۔جس پر عملدرآمد کرتے ہوئے ڈی سی اوقصور عمارہ خان نے گزشتہ روز تینوں معذور بچوں کے علاج معالجہ کیلئے وزیر اعلی پنجاب کی جانب سے 3، 3لاکھ روپے کے امدادی چیک بچوں کے والدین میں تقسیم کئے ۔ اس موقع پر معذور بچوں کے والدین نے وزیر اعلی پنجاب محمد شہبازشریف کا خصوصی طور پر شکریہ ادا کیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور(بیورورپورٹ) چےئرمین پریس کلب حافظ آباد عبدالجبار انصاری کی حضرت بابا بلھے شاہ ؒ کے مزار پرحاضری ، ملکی سلامتی کیلئے خصوصی دعائیں ،تفصیلات کے مطابق کلچرل ایمبیسڈر آرٹ کونسل و چےئرمین پریس کلب حافظ آباد عبدالجبار انصاری نے اپنے خصوصی وفد کے ہمراہ حضرت بابا بلھے شاہؒ کے مزار پرحاضری ، ملکی سلامتی کیلئے خصوصی دعائیں مانگیں ، انہوں نے کہا کہ صوفی ازم نے دکھی انسانیت کو سیدھا راستہ دیکھایا اور امن کا درس دیا ،انسانیت کے لئے درد دل رکھنے والے ہمیشہ زندہ رہتے ہیں ،چےئرمین پریس کلب حافظ آباد عبدالجبار انصاری نے کہا کہ بابا بلھے شاہ ؒ نے شاعری کے ذریعے دین اسلام کی تبلیغ کیلئے کام کرکے خود کو امرکرلیا ہے ، انکے مزار پرحاضری میرے لئے باعث فخر ہے ،بطورکلچرل ایمبیسڈر آرٹ کونسل حافظ آباد اپنے تمام پروگرامز میں بابا جی بلھے شاہ ؒ کافیاں اورانکی قوالیاں پڑھی جاتی ہیں ،آئندہ یہ سلسلہ جاری رکھیں گے اور انکے عرس پر حافظ آباد سے خصوصی قافلہ بھی یہاں تمام تقریبات میں شرکت کیا کرے گا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور(بیورورپورٹ) سابق نائب ضلع ناظم حاجی مقصودصابرانصاری نے کہا ہے کہ ن لیگی حکومت کی مفادپرستانہ پالیسیاں کسی ڈھکی چھپی نہیں۔ عوام نے شریف برادران کی نعروں اور دعوؤں پر مبنی سیاست کو مسترد کر دیا ہے پاناما لیکس اور نیوز لیکس کی دلدل میں پھنسا شریف خاندان احتساب کے لئے تیار رہے۔ عوام شفاف اور بے لاگ احتساب چاہتے ہیں۔ ان خیالات کا اظہار انہوں نے نماز جمعہ کے اجتماع کے بعد شہریوں سے گفتگو کے دوران کیا ، انہوں نے کہا کہ پاناما لیکس کا منطقی انجام ملک کے بیس کروڑ لوگوں کی خواہش ہے پوری قوم کرپشن کے خلاف متحد ہے۔ پاکستان میں کھربوں روپے کی کرپشن ملکی اور بین الاقوامی معاہدات کی صورت میں سامنے آ چکی ہے۔ موجودہ حکومت کی ناقص کارکردگی کی وجہ سے ملکی وحدت پر سوالیہ نشان کھڑا ہو گیا ہے۔ انہوں نے مزید کہا کہ مسلم لیگ ن کی حکومت سپریم کورٹ کے از خود نوٹس کے قانون پر قدغن لگانے کے درپے ہے اور دیگر اداروں کی طرح سپریم کورٹ کو بھی غیر فعال کرنا چاہتی ہے ہم از خود نوٹس لینے کے اختیارات کو محدود اور بے اثر کرنے کی بھرپور مذمت کرتے ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور(بیورورپورٹ)ڈی سی او قصور عمارہ خان کی خصوصی ہدایات کی روشنی میں محکمہ بہبود آباد ی کے زیر اہتمام ڈینگی آگاہی واک کا اہتمام کیا گیا ۔ تفصیل کے مطابق محکمہ بہبود آبادی کے زیر اہتمام ڈینگی آگاہی واک فیملی ہیلتھ کلینک ڈی ایچ کیو ہسپتال قصور سے شروع ہو کر دفتر بہبود آبادی فضل خاں کالونی پر اختتام پذیر ہوئی ۔ واک کی قیادت ایم ایس ڈی ایچ کیو ہسپتال ڈاکٹر جاوید اقبال اور ڈسٹرکٹ پاپولیشن ویلفیئر آفیسر میاں محمد امجد فاروق نے کی ۔ اس کے علاوہ ڈی ایم ایس ڈاکٹر حافظ یا سین ، ڈاکٹر مہوش ، مسز سمیرا دلاور اور دیگر نے شرکت کی ۔ اس موقع پر گفتگو کرتے ہوئے ایم ایس ڈی ایچ کیو ہسپتال اور ڈی او پاپولیشن ویلفیئر نے کہا کہ ڈینگی مچھر سے بچاؤ کیلئے اپنے ماحول کو صاف اور خشک رکھیں ۔انہوں نے زور دیا کہ عوام الناس میں ڈینگی سے بچاؤ کے بارے میں زیادہ سے زیادہ آگاہی پیدا کر کے اس مہلک بیماری سے بچا جا سکتا ہے اور اس کیلئے معاشرے کے ہر فرد کو اپنا کردار ادا کرنا ہوگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور(بیورورپورٹ) گورنمنٹ گرلزپوسٹ گریجویٹ کالج میں سالانہ فن فےئرآج ہوگا ، تیاریاں مکمل ، سکیورٹی کے فول پروف انتظامات ،تفصیلات کے مطابق گورنمنٹ گرلزپوسٹ گریجویٹ کالج میں سالانہ مینا بازار آج سجے گا ، پرنسپل فریحہ سہیل کے مطابق سالانہ فن فےئرکی تیاریاں مکمل کرلی گئی ہیں اس موقع پر سکیورٹی کے فول پروف انتظامات کئے گئے ہیں ،تمام پروگرامز میں صرف خواتین اور بچیاں شریک ہوں گئی ،مردوں کے داخلوں پر مکمل پابندی ہے ، سالانہ فن فےئرکا مقصد بچیوں کی نصابی وغیرنصابی صلاحیتوں کوبڑھانا ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور(بیورورپورٹ) پریس کلب میں ممبران کے اعزاز میں” سالانہ گرینڈ ناشتہ “،ڈسٹرکٹ انفارمیشن افیسرسمیت صحافیوں کی بھرپور شرکت ،چھوٹے سری پائے ، مرغ چنے اور گرم حلوہ پوری نے ماحول قابل رشک بنادیا ، پریس کلب ممبران کیلئے ایسی تقریبات منعقد کرنیکا سلسلہ جاری رکھیں گے ، صدر ڈاکٹرسلیم الرحمن ،تفصیلات کے مطابق پریس کلب کے ہال میں معززممبران کے اعزاز میں” سالانہ گرینڈ ناشتہ “کا اہتمام کیا گیا ، جس میں ڈسٹرکٹ انفارمیشن افیسر چوہدری عبدالواحد،چےئرمین پریس کلب محمداشرف واہلہ، گروپ لیڈران مہرمحمدجاوید ،حاجی محمدشریف ،جنرل سیکرٹری ڈاکٹر تکریم علی،نائب صدر عمران زیب ،صدر یونین آف جرنلسٹس عطاء محمدقصوری ، جنرل سیکرٹری احمدچوہدری ، صدر الیکٹرونک میڈیا رپورٹرز ایسوسی ایشن (ایمرا) محمداجمل شاد ، جنرل سیکرٹری طارق محمود جٹ ، سلیم انجم، توصیف شاد، تنویرشاہد، بابا عبدالرحمن،زیشان اشرف ، ندیم اخترچوہدری، حافظ ظہیر ، افتخار سلطانی ،خالد نواز خان نائب صدر،سعید احمدبھٹی، ماجدخان ، مہراشفاق احمد، مہر اشرف مہر، عمیرانصاری، عمران شہزاد انصاری، عبدالغفار، بلال الحسن مہرسمیت دیگراحباب نے بھرپور شرکت کی ، اس موقع پر چھوٹے سری پائے ، مرغ چنے اور گرم حلوہ پوری نے ماحول قابل رشک بنادیا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور (بیورورپورٹ)تھانہ بی ڈویژن، اندھے قتل کے ملزمان قلیل وقت میں گرفتا ر،ملزمان کے قبضہ سے آلہ قتل پسٹل برآمد۔ تفصیلات کے مطابق ڈی ایس پی سٹی عبدالقیوم گوندل نے مقامی صحافیوں سے بات چیت کرتے ہوئے بتایا کہ 16نومبر کی صبح کو مسمات شکرانہ بی بی اپنی ہمسائی دوست شبانہ بی بی کیساتھ صبح کی سیر سے واپس گھر جارہی تھیں کہ گھر کے قریب گلی میں ایک نامعلوم موٹرسائیکل سوار نے فائرنگ کر کے شکرانہ بی بی کو قتل جبکہ شبانہ بی بی کوشدید زخمی کردیا اور موقعہ سے فرار ہوگیا جس کا مقدمہ تھانہ بی ڈویژن میں مقتولہ کے بیٹے نورالہٰی کی مدعیت میں درج کیا گیا ۔وقوعہ چونکہ شہر قصور میں صبح کی سیر کرتے وقت ہوا تھا اس لیے نہایت اہم اور حساس نوعیت کا تھاجس پر ڈی پی اوقصور سید علی ناصر رضوی اور ایس پی انویسٹی گیشن ملک محمد مشتاق اعوان نے ملزمان کو ٹریس کر نے کیلئے تین ٹیمیں تشکیل دی یہ ٹیمیں زیر نگرانی ڈی ایس پی سٹی،انسپکٹر طاہر بشیر ایس ایچ او تھانہ بی ڈویژن ،افتخار احمد SI انچارج ہومیسائیڈ انویسٹی گیشن یونٹ معہ دیگر افسران و ملازمان مکمل طور پر سرگرم عمل ہوگئیں اورصرف 24گھنٹوں میں ملزمان کو ٹریس کرلیا جبکہ گرفتاری تین روز قبل ہوئی دوران انٹیروگیشن انکشا ف کیا کہ میری منگنی چچی شکرانہ بی بی کی بیٹی کیساتھ ہوئی لیکن چچی کی سہیلی اور ہمسائی مقتولہ شکرانہ بی بی میرے ہونے والے سسرال کے گھر میں بے جا مداخلت کرتی تھی متعدد بار چچی شبانہ بی بی کو شکرانہ بی بی کیساتھ میل جول سے بھی منع کیا گیا لیکن وہ باز نہیں آرہی تھی جس پر میں نے دونوں کو قتل کرنے کی منصوبہ بند ی اور اپنے ملازم سلیم گجر کے ہمراہ 16نومبر کی صبح دونوں پر شدید فائرنگ کردی جس کے نتیجہ میں شکرانہ بی بی ہلاک جبکہ شبانہ بی بی شدید زخمی ہوگئی۔ اللہ تعالیٰ کے فضل وکرم سے قصور پولیس نے نہایت پیشہ وارانہ صلاحیت کو استعمال کیا اور انتہائی قلیل مدت میں ایک اہم کیس کوٹریس کر کے ملزمان کو بمعہ آلہ قتل برآمد کیا۔
