قصور (محمد عمران سلفی سے) ڈسٹرکٹ کوارڈینیشن آفیسر قصورسلمان غنی کے زیر صدارت گندم خریداری مہم 2016ء اور باردانہ کی تقسیم کا جائزہ لینے کے حوالے سے اجلاس گزشتہ روز ڈی سی او کمیٹی روم میں منعقد ہوا۔ اجلاس میں ایڈیشنل ڈسٹرکٹ کلکٹر محمد شاہد ‘ اسسٹنٹ کمشنرقصور محمد شاہ رخ نیازی ، اے سی پتوکی محمد نواز گوندل ‘اے سی چونیاں شیخ محمد سلیم ‘اے سی کوٹ رادھاکشن سرمد تیمور ‘ای ڈی او زراعت عبدالمقیت خاں’ڈسٹرکٹ فوڈ کنٹرولر ماجد علی خاں ‘ڈی ایس پی ہیڈ کوارٹر حسن دانیال ، ‘سیکرٹریز مارکیٹ کمیٹی ‘سینٹر کوارڈینیٹرز ‘ محکمہ خوراک کے انچارجز سینٹر ‘ عملہ سپر وائزری کمیٹی ‘نمبر داران ‘کاشتکاروں کے نمائندے اوردیگر محکموں کے افسران نے شرکت کی ۔ اجلاس میں ایڈیشنل ڈسٹرکٹ کلکٹر محمد شاہد نے گندم خریداری اور باردانہ کی تقسیم کے حوالے سے پنجاب حکومت کی طرف سے جاری کردہ حکمت عملی پر روشنی ڈالی اور بتایا کہ گندم سرکاری ریٹ 1300 روپے فی من کے حساب سے خرید کی جائیگی اور فی بور ی 100 کلو گرام کے ڈلیوری چارجز 9روپے کے حساب سے کاشتکاران کو دئیے جائینگے ۔ ضلع قصور میں گندم کی خریداری کا ہدف 95 ہزار میٹرک ٹن مقرر کیا گیا ہے اور باردانہ کی تقسیم 15 اپریل سے شروع ہو گی اور پہلے آئیے پہلے پائیے کی پالیسی کے مطابق بار دانہ جاری کیا جائیگا۔ 20 اپریل 2016ء سے تمام سینٹرز پر گندم کی خریداری شروع کر دی جائیگی ۔ مزید بتایا گیا کہ ضلع بھر میں 14گندم خریداری سینٹرز قائم کئے گئے ہیں جن میں قصور’کھڈیاں ‘عثمانوالہ ‘چونیاں ‘پتوکی ‘حبیب آباد ‘بیدیاں ‘تلونڈی’الہ آباد ‘شام کوٹ ‘کنگن پور ‘سرائے مغل ‘پھولنگر اور کوٹ رادھا کشن شامل ہے۔ اس موقع پر ڈی سی او نے کہا کہ گندم خریداری سینٹرز پرزمینداروں کو تمام سہولیات دی جائیگی اور ضلع بھر سے گندم خریداری ہدف ہر صورت ممکن بنایا جائیگا ۔انہوں نے مزید کہا کہ گندم خریداری مہم کے دوران میرٹ پر باردانہ کی تقسیم ہو گی کسی قسم کی کوتاہی برداشت نہیں کی جائیگی اور کاشتکاروں کے حقوق کا تحفظ یقینی اورانہیں انکی محنت کا پورا معاوضہ دیا جائیگا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور (محمد عمران سلفی سے) ڈی سی او قصور سلمان غنی کے زیر صدارت دریائے ستلج میں ممکنہ سیلاب سے نمٹنے کیلئے تمام انتظامات کا جائزہ لینے کے سلسلہ میں گزشتہ روز ڈی سی او کمیٹی روم میں اجلاس منعقد ہوا۔ اجلاس میں تمام متعلقہ افسران نے شرکت کی ۔ ڈی سی او قصور نے اجلاس کے دوران ضلع کو ممکنہ سیلاب سے محفوظ کرنے کیلئے تمام حفاظتی انتظامات کا جائزہ لیا اور متعلقہ افسران کو ہدایت کی کہ وہ دریائے ستلج میں سیلاب کی صورتحال سے نمٹنے کیلئے اپنی اپنی تمام تیاریاں مکمل کریں ۔ ڈی سی او نے اسسٹنٹ کمشنرز اور محکمہ انہار کے افسران کو ہدایت کی کہ وہ ایک ہفتہ کے اندر تمام بندوں ‘کینال اور ڈرینج کی انسپکیشن کر کے فٹنس سرٹیفکیٹ دیں ۔ ڈی سی او نے ریسکیو 1122’سول ڈیفنس اور ٹی ایم ایز کو اپنی اپنی مشینری کو چالوحالت میں رکھنے کی ہدایت کی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور (محمد عمران سلفی سے) ڈسٹرکٹ کوارڈینیشن آفیسر قصور سلمان غنی اور ڈسٹرکٹ پولیس آفیسرقصور سید علی ناصر رضوی کے زیر صدارت تعلیمی اداروں میں سیکورٹی کے فول پروف انتظامات کا جائزہ لینے کیلئے اجلاس گزشتہ روز ڈی سی او کمیٹی روم میں منعقد ہوا۔ جس میں ایڈیشنل ڈسٹرکٹ کلکٹر محمد شاہد ، اسسٹنٹ کمشنرز قصور شاہ رخ نیازی ،اے سی پتوکی محمد نواز گوندل، اے چونیاں شیخ محمد سلیم خالد’ اے سی کوٹ رادھاکشن سرمد تیمور، ڈی ایس پی صدر مرزا عارف بیگ ، ڈی ایس پی سٹی اکرام خاں ،ڈی ایس پی ہیڈ کوارٹر حسن دانیال ، ای ڈی او ایجو کیشن ذوالفقار علی ، ڈپٹی ڈائریکٹر کالجز محمد زاہد مان ، سیکورٹی انچارج اینمل یونیورسٹی پتوکی محمد زاہد اور دیگر اداروں کے سربراہان نے شرکت کی ۔اجلاس میں تمام کالجز ، سرکاری و پرائیویٹ سکولوں ،سپیشل سکولوں ، ووکیشنل انسٹیٹیوٹس ، ورکرویلفیئر سکولوں ،یونیورسٹی آف اینمل سائنسزپتوکی اور دیگر اداروں میں سیکورٹی کے حوالے سے کئے گئے انتظامات کا جائزہ لیا گیا ۔اس موقع پر ڈی سی او اور ڈی پی او نے تعلیمی اداروں کی سیکورٹی کومزید بہتر بنانے کا حکم دیتے ہوئے کہا کہ عوام کی جان و مال کے تحفظ اور تعلیمی اداروں کی سیکورٹی کیلئے ہر ممکن اقدام اٹھائے جائیں اور ایس او پیز پر عملدرآمد نہ کرنے والوں کیخلاف قانونی کاروائی عمل میں لائی جائے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور (محمد عمران سلفی سے) ڈی سی او قصور کے حکم پر اسسٹنٹ کمشنر قصور محمد شاہ رخ نیازی نے قبرستان کی 2کنال 10مرلے زمین واگزارکروا کر 4افراد کیخلاف مقدمہ درج کروادیا۔ تفصیل کے مطابق اسسٹنٹ کمشنر قصور محمد شاہ رخ نیازی نے موضع کوٹ انود سنگھ تحصیل قصور میں قبرستان کی 2کنال 10مرلے زمین قابضین محمد الطاف ، محمد غفار ، محمد انوار اور ارشاد علی سے واگزار کروا کرانکے خلاف تھانہ راجہ جنگ میں مقدمہ درج کروا دیا ہے ۔ قابضین نے عرصہ دراز سے قبرستان کی جگہ پر قبضہ کیا ہوا تھا اور اہل علاقہ کی نشاندہی پر کاروائی کرتے ہوئے اسسٹنٹ کمشنر قصور نے قبرستان کی زمین واگزار کروالی ہے جس پر وہاں کے رہائشیوں نے ڈی سی او قصور سلمان غنی اور اسسٹنٹ کمشنر محمد شاہ رخ نیازی کا شکریہ ادا کرتے ہوئے انکی کارکردگی کو سراہا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور (محمد عمران سلفی سے) ڈسٹرکٹ پولیس آفیسر سید علی ناصر رضوی نے بتایاکہ گزشتہ رات تھانہ صدر پھولنگر کے علاقہ32پلی کے قریب ڈکیتی کی واردات کے دوران چھینا گیا مال مسروقہ تقسیم کرتے ہوئے آپس میں لڑنے پر ڈاکوئوں کی فائرنگ سے دو ساتھی ڈاکو ہلاک ہوگئے۔تفصیلا ت کے مطابق گزشتہ رات محمد عثمان نامی شخص نے 15پر پولیس کو اطلاع دی کہ میں اپنے دوست محمد طاہر کے ساتھ بسواری کار جمبر سے چھانگا مانگا جا رہا تھا کہ 32پلی کے قریب 7کس نامعلوم ڈاکوبسواری3عدد موٹرسائیکل آئے اور اسلحہ کے زور پر ہم سے نقدی 83000/-روپے ،2عدد موبائل فون اور دیگر ضروری کاغذات چھین کر قریب باغ امرود میں لیجا کرہمیں باندھ دیااسی دوران ڈاکو لوٹی ہوئی رقم تقسیم کرنے پر آپس میں لڑ پڑے اور ایکدوسرے پر فائرنگ سے دو ڈاکو شدید زخمی ہوگئے جبکہ بقایا 5کس ڈاکو موقعہ سے فرار ہوگئے ۔ہم نے بڑی مشکل سے اپنے ہاتھ کھولے اور پولیس کو 15پر اطلاع دی ۔ڈی پی اوقصور نے بتایا کہ وقوعہ کی اطلاع پاکر تھانہ صدر پھولنگر پولیس فوری موقعہ پر پہنچی جہاں پر پولیس کو 2کس ڈاکوئوں کی نعشیں ملی جو اپنے ہی ساتھی ڈاکوئوں کی فائرنگ سے شدید زخمی ہونے کے بعد ہلاک ہوگئے تھے ۔ پولیس نے موقعہ سے ایک عدد کلاشنکوف، پسٹل اور نقدی22000/-روپے برآمدکیے ۔ تھانہ صدر پھولنگر پولیس نے مقدمہ درج کر کے بقایا 5کس نامعلوم ڈاکوئوں کی گرفتاری کے سلسلہ میں سپیشل ٹیمیں تشکیل دے دی ہیں جن کو جلد گرفتار کرلیا جائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور (محمد عمران سلفی سے) گنڈاسنگھ والا میں گندم کے کھیتوں میں تیار گندم کی فصل کو آگ لگ گئی،لاکھوں روپے مالیت کی قیمتی فصل جل کر خاکسترہوگئی،تفصیلات کے مطابق گنڈاسنگھ والا میں گندم کے کھیتوں سے گزرنے والے بجلی کے تاروں میں شارٹ سرکٹ کے باعث آگ بھڑک اٹھی ،جس نے دیکھتے ہی دیکھتے سارے کھیت کو اپنی لپیٹ میں لے لیااور کھڑی تیار فصل لاکھوں روپے مالیت کی گندم جل کر تباہ ہوگئی ،ریسکیو عملہ نے موقع پر پہنچ کر آگ پر قابو پایا،جس سے دیگر آس پاس کی فصلیں تباہ ہونے سے بچ گئیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
قصور (محمد عمران سلفی سے) دنیاوی کاموں کیساتھ دینی درسگاہوں کی بنیاد ہی اصل اسلام کی روح ہے۔اللہ اور اسکے کے رسول ۖ کی رضا کی خاطر اسلامی تعلیم دینا موجودہ دور میں جہاد سے کم نہ ہے ۔ ان خیالات کا اظہار مسلم لیگ ن کے مقامی ایم پی اے حاجی نعیم صفدر انصاری نے مقامی صحافی غلام مرتضی بیگ کے زیر انتظام چلنے والے مدرسہ عائشہ صدیقہ الحبیب کے افتتاح کے موقع پر گفتگو کرتے ہوئے کیا۔اُنہوں نے کہا کہ یہ والدین کیلئے سعادت ہے کہ انکی زندگی میں ہی انکے بچے سر کار دو عالم ۖ کے دینی مشن کیلئے ادارے کھو ل رہے ہیں ۔ اس موقع پیر منشاء عباس بخاری ،محمد حبیب بیگ ، محمد تنویر شاہد ،میاں شبیر احمد ھاشمی ، محمد یسین ضیغم نے کہا کہ پاکستان کو امت مسلمہ کا سپہ سالار ہو نے کا حق ادا کر نا ہو گا ۔وگرنہ کل بروز قیامت کس منہ سے آقا کریم ۖ کو ہم منہ دیکھائیں گے۔ اُنہوں نے کہا کہ کیا ایسا ہو تا کہ مسلمان ایک پلیٹ فارم پر اکھٹے ہو کر قرآن کو اپنا مقصد حیات اور حضرت محمد مصطفیۖ کی زندگی کو مشعل راہ بنا لیں تو ہر سختی دور ہو جائے گی ۔ موجودہ دور میں جاری بد امنی ،افراتفری اور دہشت گردی کے حوالے سے اُنہوں نے کہا کہ پاکستان میں نظام حکومت ہی جس کی لاٹھی اسکی بھینس پر چل رہی ہے ہمیں مسلم اُمہ کے لیڈر ہو نے کا اگر فخر ہے تو اس فخر کو قائم رکھنے کیلئے اسلام کو بد نام کر نے والی قوتوں کیخلاف اُٹھ کھڑا ہو نا ہو گا تاکہ مسلمانوں کا تشخص قائم رہ سکے۔آج اگر بر ما ،میانمار اور دنیا کے دوسرے علاقوں میں مسلمانوں کو بے دردی سے قتل کر کہ انکی نسل کشی کی کو شش کی جا رہی ہے یہ امریکہ اور اسکے حواریوں کی گہری سازش ہے۔
