لاہور کی خبریں 26.08.2013

پنجاب میں شخصی حکومت قائم ہے ،ایڈیشنل جنرل سیکرٹر ی ق لیگ پنجاب
لاہور (پی پی سی) پاکستان مسلم لیگ پنجاب کے ایڈیشنل جنرل سیکرٹری ناصر محمود گل نے کہا ہے کہ بے اختیاری کا رونا رونے والے وزیر عوام کی خدمت نہیں کرسکتے۔انہوں نے وزیر بیت المال کے بے اختیاری کی وجہ سے مستعفی ہونے کے بیانات پر ردعمل میں کہا کہ وزیربیت المال اسمبلی کے اندر اور دیگر وزراء بند کمروں میں روتے ہیں، ہیں سب کے سب بے اختیار۔ پنجاب میں شخصی حکومت قائم ہے اور پنجاب کی معکوس ترقی کی وجہ بھی ون مین شو ہے۔انہوں نے مسلم لیگ ہائوس میں عہدیداروں سے گفتگو کرتے ہوئے کہا کہ بقول وزیر بیت المال اگر پارلیمانی سیکرٹری محکمہ بہتر طریقہ سے چلاسکتا ہے تو پھر یہ وزارت ختم کرکے بچت کیوں نہیں کی جاتی؟ انہوںنے کہا کہ بلدیاتی اداروں کو با اختیار بنائے جانے کے حوالے سے اختیارات کی مرکزیت ٹوٹنے کی جو امید پیدا ہوئی تھی وہ بھی ریمورٹ کنٹرول لوکل گورنمنٹ بل آنے کے بعد ختم ہوگئی۔ جمہوریت کے نام پر سول آمریت کے قیام کے خلاف رائے عامہ ہموار ہورہی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شہداء کے نام تعلیمی نصاف سے حذف کرنا قابل مذمت ہے،اراکین اسمبلی ق لیگ
لاہور (پی پی سی) پاکستان مسلم لیگ پنجاب کے اراکین صوبائی اسمبلی سردار وقاص حسن موکل، ڈاکٹر محمد افضل اور احمد شاہ کھگہ نے تعلیمی نصاب سے قومی ہیرو لانس نائیک محمد محفوظ شہید اور سوار محمد شہید کے نام نکالے جانے پر اپنے شدید ردعمل میں کہا ہے کہ اس مجرمانہ فعل اور سازشی حرکت کے ذمہ داروں کا تعین انتہائی ضروری ہے اور شہداء کے نام نصاب سے نکالنے والوں سے باز پرس کی جانی چاہیے کہ کس کے کہنے پر کن مقاصد کے لیے پاک فوج کے ان جری، بہادر اور دفاع وطن کے لیے جانوں کے نذرانے پیش کرنے والے شہیدوں کے نام نصاب سے نکالے گئے۔ انہوں نے کہا کہ کچھ عرصہ سے نصاب میں غلطیوں کی بھرمار اور قابل اعتراض مواد کے داخل کرنے اور نکالنے کے واقعات عام ہیں ۔جتنا یہ معاملہ حساس اور توجہ طلب ہے حکومت اس حوالے سے اتنی ہی لاپرواہی کا مظاہرہ کر رہی ہے۔ انہوں نے کہا کہ شہداء کے نام نکالے جانے کے حوالے سے پارٹی قیادت کی ہدایت پر تحقیق کر رہے ہیں اس کے بعد ثبوتوں کے ساتھ اسمبلی میں بات کریں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پنجاب بھر میں532ٹریفک حادثات میں658افرادزخمی،03 جاں بحق
لاہور(پی پی سی)پنجاب بھر میں مختلف مقامات پرگزشتہ 24 گھنٹوں کے دوران کل 532 ٹریفک حادثات ہوئے جن میںتین ا فراد ہلاک اور 444 شدید زخمی ہوئیجنہیں فوری طور پر نزدیکی ہسپتال میں پہنچایا گیاجبکہ214افراد معمولی زخمی ہوئے جنہیں فوری طور پرموقع پر ابتدائی طبی امداد فراہم کی گئی۔ریسکیو 1122کے پراونشل سیل کو موصول ہونے والی کالز کے مطابق ان ٹریفک حادثات میں276ڈرائیورز ،20کم عمرڈرائیور،291مسافراور94پیدل چلنے والے متاثر ہوئے ۔اعدادو شمار سے ظاہر ہوتا ہے کہ139ٹریفک حادثات کی کالز لاہور کنٹر ول روم میںموصول ہوئیں، جن میں صوبائی درالحکومت183متاثرین کے ساتھ پہلے ،فیصل آباد47حادثات میں57متاثرین کے ساتھ دوسرے جبکہملتان42حادثات میں50متاثرین کے ساتھ تیسرے نمبرپررہا۔ واضح رہے کہ ان ٹریفک حادثات میں کل661متاثر ہونے والوں میں سے 539 مرد اور 122 خواتین شامل ہیںجبکہ زخمی ہونیوالوں میں103افراد کی اوسط عمر18سال سے کم اور400افراد کی اوسط عمر 18سے 40سال کے درمیان اور 158 زخمی افراد کی اوسط عمر 40سال سے زیادہ تھی۔ان ٹریفک حادثات کے بیش تر واقعات میں زیادہ تر424موٹر سائیکلز57آٹو رکشے،56موٹر کاریں 28مسافر بسیں،19ٹرک، اور60دوسری اقسام کی آٹو گاڑیاں شامل ہیں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شادی بیاہ کی تقریبات رات10بجے ختم کرنے کا حکم
لاہور(پی پی سی) محکمہ داخلہ پنجاب نے ضابطہ فوجداری کی دفعہ 144کے تحت ہوٹلوں، شادی ہالوں ، کھلی گرائونڈ، پارکوں، رہائش گاہوں، کلبوں، سڑکوں اور گلیوں یا دیگر مقامات پر شادی بیاہ کی تقریبات رات دس بجے تک ختم کرنے کا حکم جاری کیا ہے۔یہ حکم فوری طور پر نافذالعمل ہو کر 21ستمبر تک جاری رہے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لاہور سٹاک ایکسچینج میںسوموار کے روزتیزی کا رجحان
لاہور(پی پی سی) لاہور سٹاک ایکسچینج میںسوموار کے روزتیزی کا رجحان رہا- مجموعی طور پر98کمپنیوں کا کاروبار ہوا۔ 42 کمپنیوں کے حصص میں اضافہ ۔5کمپنیوں کے حصص میں کمی جبکہ 51 کمپنیوں کے حصص میں استحکام رہا۔ ایل ایس ای 25انڈیکس10.92پوائینٹس کے اضافہ کے ساتھ 4669.24پر بند ہوا۔ مارکیٹ میں کل 39 لاکھ 61 ہزار 300 حصص کا کاروبار ہو ا۔ جبکہ گزشتہ روز 54 لاکھ 14 ہزار 500حصص کا لین دین ہوا تھا۔ مارکیٹ میں جن کمپنیوں کے سودے سرفہرست رہے ا ن میں بنک آف پنجاب لمیٹڈ کے8لاکھ30 ہزار500حصص۔ فوجی سیمنٹ کمپنی لمیٹڈ کے 5 لاکھ19 ہزارحصص۔ جبکہ دیوان سلمان فائبر لمیٹڈ کے 5 لا کھ11ہزار حِصص فروخت ہوئے ۔ آج سب سے زیاد ہ اضافہ پاکستان سٹیٹ آئیل کمپنی لمیٹڈکے حصص میں ہوا جس کی قیمت8.34روپے بڑھ گئی ۔ سب سے زیادہ کمی نیشنل بنک آف پاکستان لمیٹڈکے حصص میں ہوئی جس کی قیمت1.87روپے کم ہو گئی۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ہماری قیادت ایڈ کے حق میںنہیں وہ ٹریڈکے فروغ کی حامی ہے۔خطاب
لاہور(پی پی سی)پاکستان مسلم لیگ (ن) لاہورکے جنرل سیکرٹری وممبر پنجاب اسمبلی خواجہ عمران نذیر نے کہا ہے کہ ٹریڈفرینڈلی پالیسیاں بنایا مسلم لیگ (ن)کی ترجیحات کاحصہ ہیں۔مسلم لیگ (ن) کی حکومت پرمقامی وبیرونی سرمایہ داروں کے اعتماد کی بحالی خوش آئند اورہماری قیادت کی نیک نیتی کانتیجہ ہے۔وزیراعظم میاں نوازشریف اورخادم پنجاب میاں شہبازشریف ایڈ کے حق میں نہیں بلکہ وہ باوقار انداز سے ٹریڈ کے فروغ کے حامی ہیں۔ وزیراعظم میاں نوازشریف کی دوررس معاشی اصلاحات کے مثبت اشارے آرہے ہیں۔ بجلی اورگیس چوروں کیخلاف کریک ڈائون سے جہاں بجلی بحران پرقابوپانے میں مددملے گی وہاں ریونیو میں جمع ہوگااورعام صارفین بھی زائدبلنگ کی شکایات نہیں کریں گے۔ وہ اپنے حلقہ انتخاب میں ایک تقریب سے خطاب کررہے تھے۔خواجہ عمران نذیر نے مزید کہا کہ جس وقت ملک وقوم کو بحرانوں کو سامنا ہواس وقت منتخب قیادت ضد یا انا کے تحت فیصلے نہیں کرتے ۔منتشر عوام کومتحد کرنے کیلئے قومی سیاسی قیادت کے درمیان اتحاد و یکجہتی ناگزیر ہے۔ انہوں نے کہا کہ وزیراعظم میاں نوازشریف پارلیمنٹ کے اندرکسی جماعت کی حمایت کے مختاج نہیں ہیں مگر پھر بھی وہ سیاسی پارٹیوں کے ساتھ مفاہمت کے حامی ہیں۔ پارلیمانی پارٹیوں کوساتھ لے کرچلنے کی سوچ اور خواہش کوہماری قیادت کی کمزوری نہ سمجھا جائے۔ انہوں نے کہا کہ اس وقت سیاسی قیادت آپس میں سرجوڑے بغیر ملک کودرپیش اندرونی وبیرونی چیلنجز سے نبرد آزما نہیں ہوسکتی۔ وزیراعظم میاں نوازشریف نے پاکستان کے روشن اورمضبوط سیاسی مستقبل کیلئے ماضی کی تلخیاں فراموش کردیں ۔انہوں نے کہا کہ پاکستان نوے کی دہائی والی سیاست کا متحمل نہیں ہوسکتا۔