سانحہ منگوال : انتظامیہ نے یہاں بھی کمائی کا ذریعہ ڈھونڈ لیا ، ملحقہ اداروں نے ریٹ بڑھا دئیے فٹ
لالہ موسیٰ (محمد بلال احمد بٹ ) سانحہ منگوال ، انتظامیہ نے یہاں بھی کمائی کا ذریعہ ڈھونڈ لیا ، ملحقہ اداروں نے ریٹ بڑھا دئیے فٹنس سرٹیفکیٹ کے نام پر مک مکا ہونے لگا ، اداروں کی لا پرواہی پھر کسی بڑے حادثے کا سبب بن سکتی ہے ۔ تفصیلات کے مطابق گزشتہ روز معتبر ذرائع سے ملنے والی تفصیلات کے مطابق سانحہ منگوال جوکہ ضلع گجرات کی تاریخ کا ایک افسوسناک واقع ہے جس کے بعد حکام کی جانب سے انتظامیہ کو ہدایت کی گئی تھی کہ تلاشی اور فٹنس سرٹیفکیٹ پر خصوصی توجہ دی جائے لیکن انتظامیہ نے یہاں بھی اپنی کمائی کا ذریعہ بنا لیا ہے ، گاڑیوں کی تلاشی اور فٹنس سرٹیفکیٹ کے نام پر 2,2ہزار روپے طلب کئے جاتے ہیں جبکہ کئی افراد سے محض 500روپے میں مک مکا کر کے انسانی جانوں سے سر عام کھیلنے کی اجازت دے دی جاتی ہے ۔ ٹریفک پولیس اور ملحقہ ادارے انتہائی غیر ذمہ داری کا مظاہرہ کر رہے ہیں جوکہ پھر کسی افسوسناک اور خطرناک سانحہ کا سبب بن سکتا ہے ، عوامی شہری حلقوں نے ڈی سی او گجرات سے فوری اقدامات کرتے ہوئے اصلاح الاحوال کا مطالبہ کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مین بازار ، چھوٹا بازار اور دیگر کاروباری مراکز میں ناجائز تجاوزات کی بھرمار ، علاقہ مکینوں ، راہگیروں اور خریداری کیلئے آنے والی خواتین اور بچوں کو شدید مشکلات کا سامنا
لالہ موسیٰ (محمد بلال احمد بٹ) مین بازار ، چھوٹا بازار اور دیگر کاروباری مراکز میں ناجائز تجاوزات کی بھرمار ، علاقہ مکینوں ، راہگیروں اور خریداری کیلئے آنے والی خواتین اور بچوں کو شدید مشکلات کا سامنا ۔ ٹی ایم اے ہاتھ پہ ہاتھ دھرے تماشا دیکھنے میں مصروف ، شہریوں کی دہائی ۔ تفصیلات کے مطابق لالہ موسیٰ میں مین بازار ، چھوٹا بازار ، دینہ چکیاں بازار ، اردو بازار اور دیگر کاروباری مراکز میں ناجائزتجاوزات نے عوام کا جینا محال کر رکھا ہے ،دکاندار ماہانہ کرایوں پر اپنی دکانوں کے باہر تھڑے بانوں کو جگہ دیتے ہیں جوکہ تجاوزات کی شکل میں علاقہ مکینوں ، راہگیروں اور خریداری کیلئے آنے والوں کو شدید مشکلات کا سامنا کرنا پڑتا ہے ۔ لالہ موسیٰ شہر میں اس کے علاوہ کروڑوں روپے مالیت سے تیار ہونیوالا سروس روڈ اور دیگر کئی اہم منصوبے بھی اس مرض کا شکار ہو چکے ہیں جوکہ شہر کی خوبصورتی میں ایک بد نما دغ ثابت ہو رہے ہیں ، لالہ موسیٰ شہر کے عوامی حلقوں نے مطالبہ کیا ہے کہ ٹی ایم اے لالہ موسیٰ اور دیگر حکام بالا فوری طور پر ایکشن لیتے ہوئے شہر سے ناجائز تجاوزات کا خاتمہ کریں۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میاں محمود الرشید کو پنجاب اسمبلی میں اپوزیشن لیڈر بننے اور پاکستان تحریک انصاف کے قومی اور صوبائی اسمبلی کے نومنتخب ارکان اسمبلی کے حلف اٹھانے پر مبارک باد پیش کرتے ہیں،شیخ نوازش علی ایڈووکیٹ
لالہ موسیٰ(محمد بلال احمد بٹ )میاں محمود الرشید کو پنجاب اسمبلی میں اپوزیشن لیڈر بننے اور پاکستان تحریک انصاف کے قومی اور صوبائی اسمبلی کے نومنتخب ارکان اسمبلی کے حلف اٹھانے پر مبارک باد پیش کرتے ہیں۔پاکستان تحریک انصاف قومی اور صوبائی اسمبلی میں ایک جانداراور مضبوط اپوزیشن کا کردار ادا کرے گی ۔ان خیالات کا اظہارپاکستان تحریک انصاف ضلع گجرات کے سینئر راہنما اور ٹکٹ ہولڈر حلقہ پی پی 112 نوازش علی شیخ ایڈووکیٹ نے کیا انہوں نے کہاکہ پاکستان تحریک انصاف کے محمد صدیق خان،ملک تیمور مسود،آصف محمود،راجہ راشد حفیظ،اعجاز خان،محمد عارف عباسی،اعجاز حسین بخاری،ڈاکٹر صلاح الدین خان،احمد خان بچر،محمد سبطین خان،میاں محمد اسلم اقبال،میاں محمود الرشید،ڈاکٹر مراد راس،مسعود شفقت،ظہیر الدین علزئی،حاجی جاوید اختر انصاری،وحید اصغر ڈوگر اور دیگر مخصوص نشتوں پر نومنتخب ارکان کو صوبائی اسمبلی کا حلف اٹھانے پر مبارک باد پیش کرتے ہیں۔انہوں نے مزیدکہا کہ اگر راتوں رات نتائج نہ بدلے جاتے تو آج اسمبلی میں پاکستان تحریک انصاف دو تہائی اکثریت سے حکومت بناتی مگر افسوس کے پنجاب کے تاجر سیاستدانوں کو تحریک انصاف کی جیت ہضم نہ ہوئی اور 11مئی کی رات کو سب کچھ بدل دیا گیا۔پاکستان تحریک انصاف کے نومنتخب ارکان کے قومی اور صوبائی اسمبلی میں حلف اٹھانے سے ہمارے سر فخر سے بلند ہوگئے ہیں اور اب ہم پہلے سے بھی زیادہ پر جوش اورمنظم طریقے سے قومی اور صوبائی سطح پر غریب عوام کے حقوق کی ترجمانی اور پاسبانی کریں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لالہ موسیٰ تھانہ سٹی ، تھانہ صدر کے ایس ایچ اوز تبدیل ، نئے افسران نے تھانوں میں اپنی ڈیوٹیاں سنبھال لیں
لالہ موسیٰ (محمد بلال احمد بٹ ) لالہ موسیٰ تھانہ سٹی ، تھانہ صدر کے ایس ایچ اوز تبدیل ، نئے افسران نے تھانوں میں اپنی ڈیوٹیاں سنبھال لیں ۔ ناصر بٹ تھانہ سٹی اور عامر ملک تھانہ صدر میں تعینات ہوگئے ۔ تفصیلات کے مطابق تھانہ سٹی اور تھانہ صدر لالہ موسیٰ کے ایس ایچ اوز تبدیل ہو گئے ، تھانہ سٹی لالہ موسیٰ میں انسپکٹر ناصر بٹ اور تھانہ صدر لالہ موسیٰ میں انسپکٹر عامر ملک نے بطور ایس ایچ او چارج سنبھال لیا ۔ یاد رہے کہ ایس ایچ او تھانہ سٹی خالد ڈار کا تبادلہ سیالکوٹ اور سیالکوٹ سے انسپکٹر ناصر بٹ کا تبادلہ تھانہ سٹی لالہ موسیٰ میں ہوا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پاکستان پیپلز پارٹی آج پاکستانی عوام کے دلوں کی ترجمان ہے،خالد محمود سیالوی
لالہ موسیٰ (محمد بلال احمد بٹ ) پاکستان پیپلز پارٹی آج پاکستانی عوام کے دلوں کی ترجمان ہے ، کائرہ برادران نے ہمیشہ عوامی مفادات کی سیاست کی ہے اور خدمت خلق کا یہ مشن اقتدار کے بغیر بھی جاری و ساری رہے گا ۔ ان خیالات کا اظہار سابق کونسلر ، راہنما پیپلز پارٹی خالد محمود سیالوی نے صحافیوںسے گفتگو کرتے ہوئے کیا ۔انہوں نے مزید کہا کہ کائرہ برادران نے اپنے ادوار میں حلقہ بھر میں جو ترقیاتی کام کروائے ہیں اسکی مثال نہیں ملتی ، اور انشاء اللہ آئندہ بلدیاتی الیکشن میں بھرپور حصہ لیتے ہوئے عوامی نمائندگی اور عوامی خدمت کی نئی تاریخ رقم کریں گے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
الخدمت اسلامک مائیکروفنانس نے اس ماہ 11افراد کو 265,000/-روپے کے قرضے منظور کئے
لالہ موسیٰ(محمد بلال احمد بٹ)الخدمت اسلامک مائیکروفنانس نے اس ماہ 11افراد کو 265,000/-روپے کے قرضے منظور کئے۔ 03افراد کو سیٹیزن ویلفیئر سوسائٹی رقم فراہم کرے گی۔تفصیلات کے مطابق الخدمت اسلامک مائیکروفنانس مینیجمینٹ باڈی کا اجلاس ضلعی دفتر میں منعقد ہوا۔اجلاس میں الخدمت اسلامک مائیکروفنانس نے11فراد کو 65,000/-روپے کے قرضے کی منظوری دی گئی۔ اجلاس کی صدارت حاجی غضنفر اقبال(ڈائریکٹر مائیکرو فنانس )نے کی ۔شرکاء میں چوہدری عمران انور ( صدر الخدمت فائونڈیشن ضلع گجرات ) سعید احمد (سابق صدر کھاریاں شہر)،چوہدری محمد عنصر بھدر( صدر بھدر)ڈاکٹر طارق جاوید(بھدر)،اسعد سعید پروگرام مینیجر الخدمت فائونڈیشن ضلع گجرات ،مائیکرو فنانس مینجرنوید احمد گوندل موجود تھے ۔03 افراد کو سیٹیزن ویلفیر سوسائٹی رقم فراہم کرے گی۔ یاد رہے کہ الخدمت فائونڈیشن ضلع گجرات اب تک278افرادکو5218000/–کے چھوٹے بلاسود کاروباری قرضے فراہم کرچکی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
سکھ چین ہائوس لالہ موسیٰ کے وفد نے چوہدری زبیر انور ایڈووکیٹ کی قیادت میں گزشتہ روز لالہ موسیٰ میں سانحات میں جاں بحق ہونیوالے افراد کی روح کے ایصال ثواب کیلئے دعائیہ تقاریب میں شرکت کی
لالہ موسیٰ (محمد بلال احمد بٹ ) سکھ چین ہائوس لالہ موسیٰ کے وفد نے چوہدری زبیر انور ایڈووکیٹ کی قیادت میں گزشتہ روز لالہ موسیٰ میں سانحات میں جاں بحق ہونیوالے افراد کی روح کے ایصال ثواب کیلئے دعائیہ تقاریب میں شرکت کی ۔ انہوں نے سانحہ سردارپورہ میں جاں بحق ہونیوالے راجہ احسان اور پرویز پالی کے بھتیجے اسامہ علی کے ختم قل میں شرکت کی ، اور مرحومین کے ورثاء سے اظہار افسوس کیا اور مرحومین کی روح کے ایصال ثواب کیلئے فاتحہ خوانی و دعائے مغفرت کی ۔ اس موقع پر چوہدری زبیر انور ایڈووکیٹ کے ہمراہ یاسر نذیر بائولی ، مہر اظہر مسعود ، ارشد بٹ ، ظہیر شہباز اور راشد بشیر بھی موجود تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
چک پرانا میں ڈبہ اسٹیشن پر پٹرول کی ملاوٹ کے دوران آگ بھڑک ا
لالہ موسیٰ (محمد بلال احمد بٹ ) چک پرانا میں ڈبہ اسٹیشن پر پٹرول کی ملاوٹ کے دوران آگ بھڑک اٹھی ، ایک شخص ہلاک ، امدادی ٹیموں نے موقع پر پہنچ کر آگ کو مزید پھیلنے سے روک لیا ۔ تفصیلات کے مطابق الیاس شاہ نامی شخص کے چک پرانا میں واقع ڈبہ اسٹیشن پر ملازم کی پٹرول میں ملاوٹ کے دوران اچانک آگ بھڑک اٹھی ، آگ کی شدت سے ملازم کبیر شاہ ولد شبیر شاہ سکنہ ابیال موقع پر جاں بحق ہو گیا ۔ جبکہ فائر بریگیڈٹی ایم اے لالہ موسیٰ اور ریسکیو 1122 کی امدادی گاڑیوں نے موقع پر پہنچ کر آگ پر قابو پا لیا ۔ یاد رہے کہ چک پیرانا میں واقع اس ڈبہ اسٹیشن پر پٹرول میں ملاوٹ کا کام کیا جاتا ہے جوکہ کسی بھی وقت اہل علاقہ کیلئے انتہائی خطرناک ثابت ہو سکتا جبکہ اس کے عقب میں الغنی پٹرولیم بھی واقع ہے یہ ڈبہ اسٹیشن کسی بھی وقت انتہائی سنگین نتائج کا مرتکب ہو سکتا ہے اہل علاقہ نے اسے فوری ہٹانے اور اسکے مالک کے خلاف سخت قانونی کارروائی عمل میں لانے کا مطالبہ کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسلم لیگ (ن) عوامی امنگوں کی ترجمان ہے ، میاں برادران ملک کو ترقی کی شاہراہوں پر گامزن کریں گے،فہد جاوید
لالہ موسیٰ (محمد بلال احمد بٹ) مسلم لیگ (ن) عوامی امنگوں کی ترجمان ہے ، میاں برادران ملک کو ترقی کی شاہراہوں پر گامزن کریں گے ۔ ان خیالات کا اظہار ممتاز سیاسی و سماجی شخصیت فہد جاوید آف شاد باغ نے صحافیوں سے گفتگو کرتے ہوئے کیا ۔ انہوں نے مزید کہا کہ حلقہ بھر سے عوام الناس سے مسلم لیگ ن کے امیدواران چوہدری جعفر اقبال اور چوہدری اشرف دیونہ کو بھاری مینڈیٹ دیکر جو کامیابی دلوائی ہے اس پر ہم حلقہ کے عوام کے مشکور ہیں ، انشاء اللہ میاں برادران ملک و قوم سے تمام تر مسائل کے حل کیلئے عملی اقدامات کرملک و قوم کی تقدیر بدل کر دکھائیں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ٹراما سنٹر لالہ موسیٰ میں بدتمیز اسٹاف اعلیٰ حکام کی ہدایت پر معطل کر دیا گیا
لالہ موسیٰ (محمد بلال احمد بٹ ) ٹراما سنٹر لالہ موسیٰ میں بدتمیز اسٹاف اعلیٰ حکام کی ہدایت پر معطل کر دیا گیا ۔ تفصیلات کے مطابق ٹرا ما سنٹر لالہ موسیٰ میں ڈاکٹر قیصر اور کمپوڈر رضوان جنہوں نے شہریوں اور مریضوں سے آئے روز بدتمیزی اور ناروا سلوک اپنا وطیرہ بنا رکھا تھا ، اور حکام بالا کے پاس انکی شکایات کے انبار لگے تھے ۔ ای ڈی او ہیلتھ ڈاکٹر خالد فیض کی ہدایات پر ڈاکٹر بنگش نے ڈاکٹر قیصر اور کمپوڈر رضوان کو فوری طور پر معطل کر دیا جس پر اہلیان علاقہ نے حکام بالا کے اس اقدام کو سراہا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسلم لیگ (ن) عوامی خدمت کا نام ہے ، لالہ موسیٰ شہر کے مسائل عنقریب حل کروائیں گے ،ڈاکٹر آصف محمود
لالہ موسیٰ (محمد بلال احمد بٹ) مسلم لیگ (ن) عوامی خدمت کا نام ہے ، لالہ موسیٰ شہر کے مسائل عنقریب حل کروائیں گے ، عوام الناس کے حقوق انکی دہلیز پر پہنچانا ہی ہماری سیاست کا مشن ہے ۔ ان خیالات کا اظہار ممتاز مسلم لیگی راہنما ڈاکٹر آصف محمود سابق نائب ناظم نے صحافیوں سے گفتگو کرتے ہوئے کیا ۔ انہوں نے مزید کہا کہ چوہدری جعفر اقبال MNAاور چوہدری اشر ف دیونہ MPAکی قیادت میں حلقہ بھر سے لوڈشیڈنگ اور دیگر مسائل کو ترجیحی بنیادوں پر حل کروائیں گے ، عوام نے انتخابات میں ہمیں جن محبتوں سے نوازا انہیں فراموش نہیں کیا انکا قرض ادا کریں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آئندہ بلدیاتی الیکشن میں نہ صرف بھرپور حصہ لیں گے بلکہ شہر کے چاروں شانے چت کر کے دکھائیں گے،ارشد محمود بٹ
لالہ موسیٰ (محمد بلال احمد بٹ) آئندہ بلدیاتی الیکشن میں نہ صرف بھرپور حصہ لیں گے بلکہ شہر کے چاروں شانے چت کر کے دکھائیں گے ۔ ان خیالات کا اظہار ممتاز سیاسی و سماجی شخصیت ارشد محمود بٹ سابق کونسلر نے صحافیوں سے گفتگو کرتے ہوئے کیا ۔ انہوں نے مزید کہا کہ ہم اپنے بھرپور پینل کے ہمراہ لالہ موسیٰ شہر کی چاروں یونین کونسل سے اپنے امیدوار کھڑے کریں گے اور شہریوں کی محبتوں سے کامیابی سر کر کے علاقہ میں تعمیر و ترقی پر مثالی اقدامات کریں گے۔
Related Posts
