پاکستان میں انڈسٹریل پارک

November 26, 2016 0 1 min read

تحریر : جاوید صدیقی
دنیا بھر میں اکتیس سے زائد ممالک میں انڈسٹریل پارک موجود ہیں ، انڈسٹریل پارک دراصل بیرون ملک کے سرمایہ کاروں، صنعت کاروں اور حکومتی نمائندگان کے تحفظ کیلئے محفوظ اور بہتر جگہوں پر بنائے جاتے ہیں ،انڈسٹریل پارک کیلئے دنیا بھر میں سب سے زیادہ موزوں جگہ ایئر پورٹ سے منسلک زمین ہوتی ہے کیونکہ ایئر پورٹ کے احاطے میں ہوٹل بھی موجود ہوتے ہیں جہاں بیرون ملک سے آئے ہوئے خریدار ٹھہرتے ہیں اور اپنی مطلوبہ ضروریات کے تحت انڈسٹریل پارک سے خریداری کرکے اگلی ہی فلائٹ سے واپس بھی باآسانی چلے جاتے ہیں،انڈسٹریل پارک عام طور پر اُن مقامات پر تیار کیا جاتا ہے جہاں سیاسی و معاشرتی ہجوم سے دور رہا جائے ،جہاں سیاسی احتجاج اور معاشرتی و مذہبی رسومات و تقریبات کے اثرات سےمتاثر نہ ہوسکیں، پاکستان سمیت دنیا بھر میں سیاسی احتجاج اورہڑتالیںہوتی رہتی ہیں جبکہ مذہبی رسومات کی ادائیگی اور مذہبی تقریبات کی وجہ سے بھی بیرون مالک کے خریدار پریشانی سے محفوظ رہ سکیں۔

ایئر پورٹ کے احاطے کی سب سے بڑی وجہ یہ بھی ہوتی ہے کہ خریدار اپنی مطلوبہ اشیا کا آرڈر دیکر اگلی فلائٹ سے واپس ہوجائے اور کم وقت میں اپنا مقصد حاصل کرکے وقت کا ضیاع ہونے سے بچایا جاسکے۔لیکن یہ بھی ضروری نہیں کہ لازماًایئر پورٹ ہی ہو لیکن یہ جگہ یا شہر ایسا ضرور ہوجہاں مکمل امن و امان اور تحفظ پایا جائے۔۔۔۔!! معزز قائرین! فیصل آباد میں چین نے انڈسڑیل پارک منصوبے پر دو ارب روپے کی سرمایہ کاری کی، اس پروجیکٹ سے صنعتی ترقی کا خواب عملی تصویر کا روپ دھارہی ہے،چینی صنعتکاروں کی چونیاں میں دو ہزار ایکڑ پر مشتمل انڈسٹریل پارک میں سرمایہ کاری سے صنعتی ترقی کے وژن کی تکمیل کو بھرپور سپورٹ مل رہی ہے۔

رچنا انڈسٹریل پارک میں ون ونڈو آپریشن کے تحت صنعتکاروں کو تمام سہولتیں ایک ہی چھت تلے فراہم کی جا رہی ہیں، پاکستان انڈسٹریل ڈویلپمنٹ کارپوریشن نے سرگودھا میں سوایکڑ پر ایک انڈسٹریل پارک بنایا ہے،اس انڈسٹریل پارک کا مقصد صنعتکاروں اور سرمایہ کاروں کو ایک ہی چھت تلے تمام سہولتیں فراہم کرنا ہے۔۔!! وفاقی حکومت نے سندھ میں بھی انڈسٹریل پارک بنانے کیلئے غور شروع کردیا اس کیلئے قائد اعظم محمد علی جناح انٹرنیشنل ایئرپورٹ کے احاطے کی زمین کو مختص کیا ہے کیونکہ کراچی میں آئے روز ہڑتالوں، جلسوں جلوس، دہشتگردی کے باعث انڈسٹریل پارک کو ایئرپورٹ کے احاطے میں تیار کرنے کا ارادہ رکھا گیا ، فزیبلٹی رپورٹ بھی تیار کرلی گئی۔

پاکستانی ماہرین کو چائنا کا بھی دورہ کرایا گیا کہ کراچی میں کس طرح اور کس نوعیت کاانڈسٹریل پارک تیار کیا جائے، یہ پروجیکٹ پر بحث اور میٹنگ گزشتہ دو سالوں سے جاری ہیں لیکن تیاری اور بجٹ کے معاملات ابھی تک مکمل نہیں ہوئے ہیں، کراچی میں انڈسٹریل پارک کی پاکستان کے دیگر شہروں سے زیادہ اشد ضرورت ہے ،اس معاملے میں سندھ حکومت کی جانب سے عدم دلچسپی بھی اس پروجیکٹ کی سستی کا باعث بنی ہوئی ہے حکومت سندھ کو بھی کراچی میں انڈسٹریل پارک کیلئے وفاقی حکومت کو دباؤ میں لینا چاہیئے، سندھ اور بلخصوص کراچی کے تمام سرمایہ کاروں کا مطالبہ ہے کہ کراچی میں ایئرپورٹ کے احاطے میں انڈسٹریل پارک کی تعمیر کو جلد از جلد یقینی بنایا جائےتاکہ دیگر صوبوں کے ساتھ ساتھ صوبہ سندھ اور بلخصوص کراچی بھی ترقی کے اس سفر میں آگے بڑھ سکے، کراچی میںانڈسٹریل پارک کے قیام سے جہاں صنعتی اداروں کو بےشمار فائدے حاصل ہونگے وہیں روزگار کے بھرپور دروازے بھی کھلیں گے۔۔۔!!

کراچی پاکستان کا سب سے بڑا کاروباری اور صنعتی شہر بھی ہے،ایوان صنعت و کاروبار اور سائٹ انڈسٹریز کی جانب سے بھی کراچی میں انڈسٹریل پارک کی اہمیت اور ضرورت کا مطالبہ کیا ہےکہ کراچی میں فی الفور تیار کیا جائے۔ تجارتی حلقوں کے مطابق کراچی میں انڈسٹریل پارک کی تعمیر میں تاخیر سے سی پیک منصوبے کے فوائد حاصل نہیں ہوسکیں گے کیونکہ انڈسٹریل پارک میں آڈر ملنے کے بعد ترسیل کا عمل چائنا راہداری کے ذریعے ہی کیا جائیگا۔۔۔!!

معزز قائرین! بین الاقومی دفاعی نمائش آئیڈیاز جو کہ ہر سال کراچی کے گنجان علاقے حسن اسکوائر میں منعقد کیا جاتا ہے ،انڈسٹریل پارک سے یہ نمائش بھی موزوں جگہ منتقل ہوجائیگی جس سے نہ ٹریفک میں خلل پیدا ہوگا اورنہ ہی شہری پریشان ہونگے،سن دو ہزار دو سے شروع ہونے والی بین الاقوامی دفاعی نمائش آئیڈیاز نے وقت کے ساتھ ساتھ جہاں مقبولیت حاصل کی ہے وہیں اس میں نت نئے جدید پاکستانی ہتھیار وں کو بھی متعارف کرایا جارہا ہے ، قائد اعظم محمد علی جناح انٹرنیشنل ایئر پورٹ کے احاطے میں تیار ہونے والےفائیو اسٹار ہوٹل سے زرمبادلہ میں بھی اضافہ ہوگا اور بیرون ملک سے آنے والے مندوبین، وفود، سفارتکارو دیگر اہم شخصیات کیلئے سیکیورٹی کا مسلہ بھی حل ہوجائیگا اور عوام سیکیورٹی کے سبب کئی کئی گھنٹوں روڈ بلاک کے جھنجھٹ سے بھی آزاد ہوجائیگی۔ سب سے بڑھ کر ایئر پورٹ کے وسیع و عریض اراضی پر قائم انڈسٹریل پارک اور ہوٹلز سے کراچی مزید ترقی کی جانب رواں دواں ہوگا اور پاکستانی مصنوعات کی فروخت کیلئے آسان اور بہتر مواقع بھی مل سکیں گے۔

اب دیکھنا یہ ہے کہ سندھ حکومت جو سندھ کی ترقی اور عوامی حکومت کا دعویٰ کرتے تھکتی نہیں اور ذوالفقار علی بھٹو کے مشن کا رونا روتی ہیں سندھ اور بلخصوص کراچی کی عوام سندھ حکومت سے سوال کرتی ہیں کہ وہ تعمیری امور پر کام کیوں نہیں کرتے عوام کے ایک بڑے حلقے کا یہ بھی کہنا ہے کہ انہیں تقریر نہیں تقدیر چاہیئے، عوام کا یہ بھی کہنا ہے کہ تقاریر وہ ہر جمعہ کو سننتے ہیں کون ہے جو پاکستان اور بلخصوص سندھ کی تقدیر بدلے، کون ہے جو محمد بن قاسم کی طرح نظام جاری کرے، سندھ کی عوام پاکستان پیپلز پارٹی سے سوال کرتی ہے کہ وہ کئی سالوں سے سندھ حکومت کے اقتدار پر برجمان رہی ہے اور اب بھی ہے پی پی پی کی جانب سے اربوں کھربوں ٹیکس کی وصولی کے باوجود کراچی سمیت سندھ بنجر کی حالت میں ہے۔

کراچی کی عوام نے پاک آرمی سے امید رکھی ہے کہ وہ شاہراہ فیصل کی توسیع اور وسیع کیلئے دونوں جانب کی روڈ کو چوڑھا کرنے کیلئے پاکستانی عوام کی سہولت کیلئےاپنی جگہ کو بیس بیس فٹ پیچھے کرتے شکریہ کا موقع دیں گے ، کراچی کے عوام نے خواہش ظاہر کی ہے کہ شاہراہ فیسل انتہائی مصروف اور اہم ترین ہے جس کو مزید چوڑا کرنے سے روز بروز رش ہونے کا عمل بھی ختم ہوجائیگا ، پاک افواج نے ہمیشہ پاکستانی عوام کیلئے قربانیاں دیں ہیں شاہراہ فیصل کو وسیع کرنے میں بھی اپنا بڑا ظرف کا مظاہرہ پیش کریگی۔۔۔!! معزز قائرین! جو شہری کراچی سے تعلق رکھتے ہیں وہ اس شاہرہ کی افادیت کو با خوبی جانتے ہیں یہ وہ شاہراہ ہے جہاں سے قائد اعظم محمد علی جناح انٹرنیشنل ایئر پورٹ کا راستہ ہے۔

یہاں سے گورنر ہاؤس، وزیر اعلیٰ ہاؤس، فائیو اسٹار ہوٹلز،ریلوے اسٹیشن،جناح اسپتال، مرکزی بینک کے دفاتر اور پاک آرمی کے تمام اہم ترین دفاتر کے راستے ہیں ، یہ شاہراہ اگر چوڑی اور کشادہ کردی جائے تو روڈ بلاک سے جو ڈاکہ زنی کی واردات ہوتی ہیں وہ بھی ختم ہوجائیں گی، اس سلسلے میں بلدیہ عظمیٰ کراچی اور سندھ حکومت کو یکجا ہوکر پاک آرمی سے درخواست بھی کرنی چاہیئےتاکہ ان کی درخواست پر پاک آرمی تعاون کرسکے اور عوام کیلئے شاہراہ فیسل کو کشادہ کرنے کیلئے ممکن اقدامات کرنے چاہیئے،اس شاہراہ سے براہ راست انڈسٹریل پارک کو بھی فائدہ حاصل ہو سکے گا۔۔۔ ۔۔!!پاکستان زندہ باد، پاکستان پائندہ۔۔۔!!