تحریر : منظور احمد فریدی
اللہ کریم علیم و حکیم مالک و خالق جل شانہ کی بے پناہ حمد وثناء اور تاجدار عرب و عجم جناب محمد مصطفیۖ پر درودوسلام کے نذرانے پیش کرنے کے بعد اس بندہ عاجز نے آج ایک ایسے حساس موضوع پر قلم اٹھایا ہے جس میں بال برابر بھی گستاخی پر اللہ کی طرف سے اسلام سے لاتعلقی اور رسول عربیۖ کی امت سے باہر ہونے کا احتمال ہے اللہ جل شانہ اپنے کرم سے محفوظ فرمائے۔ آمین۔
فیس بک پر کل ایک مفتی صاحب کی تقریر اپ لوڈ تھی جس میں انہوں نے فرمایا کہ حضرت امیر معاویہ اور حضرت یزید جنت کے سردار ہیں سن کر روح تک تڑپ اٹھی ضمیر نام کی کوئی شئے بھی ہوتی ہے انسانیت بھی کسی شئے کا نام ہے یہ مفتی صاحب علم نہیں مسلمانوں کے کس گروہ سے تعلق رکھتے ہیں تاریخ تو یہ بتاتی ہے کہ نسل یزید ختم ہوگئی ہے مگر ایسے بیانات دینے والے لوگ تو اسی مردود کی باقیات میں سے ہی ہو سکتے ہیں مسلمان کہلانے والے رسول عربیۖ کا کلمہ پڑھنے والے اور اس ذات پر درود پڑھ کر اپنی نمازوں کو مکمل کرنے والے ایک گروہ نے پہلے بھی ایک کتاب رشید ابن رشید لکھی جس پر اپنے گروپ کے متعدد علماء کے دستخط کروا کر بازار میں رکھا جس میں انہوں نے اپنے ضمیر گروی رکھ کر یزید کو امیر المومنین لکھا اور لکھا کہ امام حسین محض اقتدار کی جنگ لڑنے گئے اور شہید ہو گئے۔
صد افسوس کہ ہم جس ملک میں رہتے ہیں وہاں جنگل کا قانون ہے سو روپے چرانے والے جیب کترے کو پھانسی اور اربوں روپے لوٹنے والوں کو شرفاء کہا جاتا ہے اسی طرح دین سے ناواقف طبقہ اسلامی ریاست کی باگ ڈور سنبھالے ہوئے ہے اور سوشل میڈیا ہر کنجر کو مفتی بن کر واعظ کرنے کی کھلی چھٹی دیدی گئی ہے جنہیں اپنی ولدیت کا بھی درست علم نہیں ہوتا وہ بھی فیس بک پر دینی مسائل سمجھا رہے ہوتے ہیں ایسے مفتیوں کے متعلق کوئی قانون ہے اور نہ کوئی گرفت کرنے والا امام حسین کی شان کون بیان کرے جو آنکھ کھولے رسول عربی ۖکے رخ انور کو دیکھے جسے مصطفی کریم اپنی زبان چساچساکر الم نشرح کے سینہ کا علم عطا فرمائیں کندھوں پر سواریاں کروائیں اللہ کی عبادت نماز کے سجدے کو طول دے دیں کہ حسین رو نہ پڑیں خطبہ بیچ میں چھوڑ کر حسین کو سنبھال لیں۔
تربیت کا یہ علم کہ ایک دفعہ زکوة کی کھجوروں کے ڈھیر سے ننھے حسین نے ایک کھجور اٹھا کر منہ میں ڈال لی تو رسول کریم ۖ نے حلق میں انگلی ڈال کر نکال لی کہ یہ زکوة کا مال ہے وہ حسین جس کی سخاوت جسکی شجاعت اور علم کی مثال پوری کائنات میں نہیں ایک غیر مسلم مورخ لکھتا ہے کہ جب واقعہ کربلا ہوا تو اللہ کی پوری زمین پر حسین جیسا انسان علم میں عقل میں حسن میں کردار میں گفتار میں عمل میں اور زہد تقویٰ میں کوئی دوسرا موجود نہ تھا تاریخ ایک ایسی حقیقت ہے جسکا کوئی مذہب ہوتا ہے نہ رشتہ داری جب زمین پر ایسے واقعات ہورہے ہوتے ہیں تو کچھ ہاتھ قلم تھامے انہیں پوری ایمانداری سے لکھ رہے ہوتے ہیں جو تاریخ بنتی ہے اور جب ایک غیر مسلم امام حسین کی مثل کوئی دوسرا شخص اللہ کی پوری زمین ماننے کو تیار نہیں تو مسلم کس خدا کو راضی کرنے کے لیے یزید کو باپ کہنے پر لگا ہوا ہے۔
حسین اور آپ کی اولاد کی شان یہ ہے کہ اللہ نے اپنی لاریب کتاب قرآن کریم میں ارشاد فرمایا کہ اے میرے محبوب تم اپنی امت سے فرمادیں کہ میں تم تک دین پہچانے اللہ کی پہچان کروانے اور تمھیں ظلمتوں سے نور میں لانے کے عوض کچھ طلب نہیں کرتا سوائے اسکے کہ میری آل سے محبت کرنا (القرآن) اور جب یہ آیات نازل ہوئیں تو رسول خداۖ نے اپنے ہاتھ بلند فرمائے دعا کے لیے اور فرمایا کہ اے اللہ میں اپنے اس بیٹے حسین سے پیار کرتا ہوں تو بھی اس سے پیار کر اور اس سء محبت رکھنے والے سے بھی محبت کر اور اس سے بغض رکھنے والے سے تو بھی ناراض ہو جا اب کسی کی کیا مجال کہ وہ اس فرمان کے بر عکس آپکی اولاد سے عداوت رکھے خطبہ الوداع میں رسول عربیۖ نے فرمایا کہ میں تم میں دو چیزیں چھوڑ کر جارہا ہوں دونوں کو تھام کر رکھنا گمراہ نہیں ہو گے اللہ کی کتاب اور اپنی آل اب ہمارے ایک گروہ نے کتاب اٹھا لی اور اسکے فرامین کے برعکس آل رسول ۖ کے خلاف اول فول بکواس شروع کردی دوسرے گروہ نے آل رسول ۖکی آڑ میں نئے گل کھلانے شروع کردیے اور اللہ کی کتاب وہ کتاب جس کے دیباچہ میں اللہ نے فرمادیا کہ لا ریب اس میں کوئی شک نہیں کتاب اللہ کو غلط کہنا شروع کر دیا۔
کوئی بکواس کرتا ہے کہ اس کے چالیس پارے تھے کوئی کہتا ہے کہ فلاں آیئت آدھی ہے دونوں طبقے گمراہی کے آخری درجہ میں چلے گئے جب رسول خدا ۖ کا حکم دونوں سے تعلق جوڑنے کا ہے تو ایک کو رد کرکے دوسرے کو سنبھالنا بھی فضول ہے کتاب تھامنے والے گروہ نے امام حسین کو بھی نہ بخشا اور یہاں تک کہہ ڈالا کہ واقعہ کربلا محض اقتدار کی جنگ تھی یزید پلید کے وہ کرتوت جو آج بھی تاریخ چیخ چیخ کر بتا رہی ہے وہ انہیں نظر نہیں آتے یزید کے کردار کے متعلق ایک ہی بات کافی ہے کہ اس نے نواسہ رسولۖ سے جنگ کرکے آپ کو شہید کردیا ورنہ تاریخ کے سینہ میں تو یہ بات بھی ہے کہ یزید نے اس کے بعد مسجد نبوی پر حملہ کرکے اس میں گھوڑے باندھے تین دن تک اذان نماز نہ ہوئی ہزاروں لوگوں کو شہید کیا ہزاروں عورتوں کو جنسی تشددکا نشانہ بنایا جو حاملہ ہوئیں اور حرم کعبہ کو بھی پامال کیا کیا کیا کرتوت لکھوں میں اس لعنتی کے دوسرے طبقہ نے ان مظالم کو یزید سے آگے ان صحابہ سے منسوب کردیا جنہیں اللہ نے فرمایا کہ میں تم سے راضی ہوں اور تم مجھ سے راضی ہوجائو اب جسے اللہ اپنی رضا کی سند عطا فرما دے جسے رسول اللہ ۖ اپنی رضا کی سند عطا کردیں تو ہمارا تھوکنا آسمان پر تھوکنے کے مترادف ہی ہے۔
دونوں طبقے ہی راہ سے ہٹ گئے ایک گروہ جس نے نہ تو کتاب اللہ کو پس پشت ڈالا اور نہ ہی آل رسول ۖ کو چھوڑا وہ گروہ ہے صوفیاء کرام کا شہنشاہ ولائت سلسلہ چشتیہ کے عظیم بزرگ خواجہ معین الدین چشتی اجمیری فرماتے ہیں شاہ است حسین پادشاہ است حسین دین است حسین دین پناہ است حسین سر داد نہ داددست در دست یزید حقا کہ بناء لا الہ است حسین مطلب یہ کہ دین بھی حسین اور دین کی پناہ بھی حسین سر کٹوا دیا مگر یزید کے ہاتھ پر بیعت نہ کی حق ہے کہ کلمہ طیبہ کی اساس ہی حسین ہیں برصغیر میں اسلام کی شمع روشن کرنے والے پہلے عظیم صوفی جب یزید اور حسین کا فرق اتنے کھلے الفاظ میں بیان کررہے ہیں تو آج کا بکائو ملاں کیا سمجھتا ہے کہ فیس بک پر ایسی بکواس سے وہ امت کے دل سے محبت حسین نکال لے گا یہ قوم بے شک بھوکی سہی روٹی کی فکر میں خدا کو بھولی ہوئی سہی مگر اس کے سینہ میں دھڑکنے والا دل محبت رسول اور آپکی پاک آل کی محبت میں دھڑکتا ہے اور انقلاب ہمیشہ بھوکے گھروں سے شروع ہوتا ہے۔ والسلام
تحریر : منظور احمد فریدی
