خیالوں کی دنیا کتنی وسیع ہے۔ یہ آپ کی اپنی دنیا ہے۔ دنیا کی منافقت، ریاکاری اور جھوٹ سے پاک۔ سیاستدان ہوں یا مختلف شعبہ ہائے زندگی کی شخصیات،سب پبلک پراپرٹی ہیں۔ان پر بات کرنا اٹھارہ کروڑ عوام کا ”جبری حق ‘ہے۔”حدادب”رہتے ہوئے آنے والے الیکشن کے بعد کی ایک خیالی جھلک پیش کی ہے ۔امید ہے ناگوار نہیں گزرے گی۔
بنام صدر پاکستان جناب آصف علی زرداری
ہم جناب آصف علی زرداری کو بھاری لیڈ سے دوبارہ صدر پاکستان منتخب ہونے پر مبارکباد پیش کرتے ہیں۔ہم جناب نواز شریف کے شکر گزار ہیں،اور ان کو بھی مبارکباد پیش کرتے ہیں جنہوں نے جناب صدرکی دوسری مدت کے انتخاب کے ان تھک محنت کی ۔ان کی ان تھک محنت اور جناب صدر سے محبت کی جتنی بھی تعریف کی جائے کم ہے۔یہی وجہ ہے کہ صدر پاکستان کے انتخاب میں اسلم رئیسانی کے علاوہ کوئی ووٹ بھی مخالفت میں نہیں پڑا۔ہماری پاکستان کی تمام سیاسی قیادت سے اپیل ہے کہ یہی موقع ہے کہ صدر پاکستان کو تاحیات پاکستان کا صدر بنا دیا جائے۔
منجانب : صدر پاکستان لورز گروپ۔
٭٭٭
بنام وزیر اعظم پاکستان بلاول بھٹو زرداری
ہم جناب بلاول بھٹو زرداری کو بھاری اکثریت سے وزیر اعظم پاکستان منتخب ہونے پر مبارکباد پیش کرتے ہیں۔اس موقع پر جناب نواز شریف بھی مبارکباد کے مستحق ہیں جنہوں نے ایک مرتبہ پھر ”میثاق” کا مظاہرہ کیا،اور جانب بلاول بھٹو زرداری کو وزیر اعظم بنوانے کے لئے آئین میں ایک نئی ترمیم کی حمایت کی۔اس ترمیم کی بدولت جناب بلاول بھٹو زرداری اتنی کم عمری میں وزیر اعظم پاکستان منتخب ہوئے اور عالمی سطح پر ایک اور اعزاز پاکستان کے حصے میں آیا۔
منجانب : وزیر اعظم پاکستان لورز گروپ
بنام محترمہ مریم نواز شریف وزیر اعلی پنجاب
ہم محترمہ مریم نواز شریف کو وزیراعلی پنجاب منتخب ہونے پر مبارکباد پیش کرتے ہیں۔اقتدار کی پر امن منتقلی پر سابق خادم اعلی پنجاب اور سابق سینئر صوبائی وزیر راجہ ریاض احمدبجا طور پر مبارکباد کے مستحق ہیں۔ہم توقع کرتے ہیںکہ خادمہ اعلی پنجاب کے دور حکومت میں اربوں(ترکی) اور پرکھوں(سابق خادم اعلی پنجاب)کے منصوبے جلیبی میٹرو بس سروس سمیت تمام سابقہ منصوبے جلد از جلد مکمل کئے جائیں گے۔اور ہم اس بات کی بھی خواہش کرتے ہیں کہ آپ اپنے دور میں زیرزمین ٹرین سروس کا منصوبہ بھی شروع کروا دیں ۔تاکہ ”ق لیگ ”کسی منصوبے کا نام لے کر سیاست نہ کر سکیں۔
منجانب : عقیدت مند سابق خادم اعلی پنجاب
٭٭٭
بنام جناب اسلم رئیسانی وزیر اعلی بلوچستان
ہم جناب وزیر اعلی بلوچستان اسلم رئیسانی کو دوبارہ وزیر اعلی بلو چستان منتخب ہونے پر دل کی اتھاہ گہرائیوں سے مبارکباد پیش کرتے ہیں۔اور امید کرتے ہیں کہ ان کی موجودہ حکومت اپنی مدت ضرور پوری کرئے گی۔اور ہم یہ بھی امید کرتے ہیں کہ ہمارے وزیراعلی کو اب کی بار ” شرط کے دس روپے”کسی کو نہیں دینے پڑیں گے۔
منجانب:وزیر اعلی بلو چستان لورز گروپ
٭٭٭
بنام جناب فیصل رضا عابدی گورنر سندھ
ہم جناب فیصل رضا عابدی کو گورنر سندھ بنائے جانے پر دل کی گہرائیوں سے ھدیہ تہنیت پیش کرتے ہیں۔انہیں یہ عہدہ بلاشبہ درازی زبان کی بنا پر عطا ہوا ہے۔ہم ان کی درازی عمر کے ساتھ درازی زبان کی بھی دعا کرتے ہیں۔تاکہ مستقبل میں وہ اس سے ذیادہ اچھے عہدوں پر فائز ہو سکیں۔
منجانب : گورنر سندھ لورز گروپ
٭٭٭
بنام ذوالفقار مرزا ترجمان /مشیر خاص گورنر سندھ
ہم جناب ذوالفقار مرزا کو مشیر خاص/ترجمان گورنر سندھ مقر ر کئے جانے پر مبارکباد پیش کرتے ہیں۔اور امید کرتے ہیں کہ ان کی شعلہ بیانی گورنر سندھ کے بہت کام آئے گی۔ان دونوں اعلی شخصیات کا مل کر کام کرنا یقیناملک و قوم کے وسیع تر مفاد میں ہو گا۔
منجانب: ذوالفقار مرزا لورز گروپ
٭٭٭
بنام جناب جہانگیر بدر گورنر پنجاب
ہم جناب جہانگیر بدر کو گورنر پنجاب بنائے جانے پر دل کی گہرائیوںسے مبارکباد پیش کرتے ہیں۔ آ خر کار ان کا سب سے ذیادہ مقبول عام خواب شرمندہ تعبیر ہوا۔اور امید کرتے ہیںکہ ان کے دور حکومت میں پنجاب لاہور سے نکل کر پورے پنجاب میں جا گھسے گا۔خدا ہمارے گورنر کو نظر بد اور لیلی جیسے شر سے محفوظ رکھے۔
منجاب :گورنر پنجاب لورز گروپ
٭٭٭
بنام جناب جمشید دستی وفاقی وزیر تعلیم
ہم جناب جمشید دستی کو وفاقی وزیر تعلیم بنائے جانے پردل کی اتھاہ گہرائیوں سے مبارکباد پیش کرتے ہیں۔اور امید کرتے ہیں کہ وہ شعبہ تعلیم کے لئے خود سلیبس تشکیل دیں تاکہ ان کے ماہرانہ مشوروں کی بدولت شعبہ تعلیم دن دگنی اور رات چوگنی ترقی کرئے ۔آپ کے وزیر تعلیم ہوتے ہمارا پاکستانی طالب علم اتنی ڈگریاں حاصل کر جائے کہ خود اسے اپنی ڈگریاں مشکوک محسوس ہوں۔
منجانب:جمشید دستی لورز گروپ
٭٭٭
بنام جناب غلام احمد بلور وفاقی وزیر ریلوئے
ہم جناب غلام احمد بلور کو وفاقی وزیر ریلوئے بنائے جانے پر مبارکباد پیش کرتے ہیں۔ہم امید کرتے ہیں ۔کہ ان سے جو کمی اپنے پچھلے دور میں رہ گئی ہے اس کمی کو فوراً پورا کرنے کی کوشش کریں گے۔ہم ان کی نئی بتیسی کی مضبوطی کے لئے بھی دعا گو ہیں اور امید کرتے ہیں کہ ان کہ یہ بتیسی ان کی موجودہ دور وزارت میں ان کا ساتھ مضبوطی کے ساتھ دے گی۔تاکہ وہ یکسو ہو کر ریلوئے کی ترقی کے لئے اپنے کام کر سکیں۔
منجانب : حاجی بلور لورز گروپ
٭٭٭
بنام چوہدری پرویز الہی ناظم اعلی گجرات
ہم اپنے ہر دلعزیز لیڈر چوہدری پرویز الہی کو میئر گجرات منتخب ہونے پر ھدیہ تہنیت پیش کرتے ہیں۔ اور امید کرتے ہیں کہ سابقہ وزارت اعلی پنجاب کے دور کی طرح اس بار گجرات بہت ذیادہ ترقی کرئے گا۔اور ہمیں اپنے مئیر سے امید ہے کہ وہ منصوبے جو انہوں نے لاہور میں شروع کرنے تھے ۔اس کا شوق گجرات میں فرما لیں گے۔اس سلسلے کا پہلا منصوبہ گجرات زیر زمین ریلوئے سسٹم ہو نا چاہئے۔
منجانب : چوہدری پرویز الہی لورز گروپ
٭٭٭
بنام جناب یوسف رضا گیلانی ناظم حلقہ ملتان
ہم جناب یوسف رضا گیلانی کو اپنے حلقے کا ناظم منتخب ہونے پر مبارکباد پیش کرتے ہیں۔اور امید کرتے ہیں کہ وہ اپنے حلقے کے ترقیاتی کام بہت جلد مکمل کروا کر حلقے کے عوام کے دلوں میں گھر کر لیں گے۔ہم ٹھکیداروں کی کرپشن بے نقاب کرنے پر جناب علی قادر گیلانی اور موسی گیلانی کے بھی مشکور ہیں،کہ انہوں نے حلقہ کی عوام کی سرکاری دولت کو لٹنے سے بچایا۔
منجانب : گیلانی لورز گروپ
٭٭٭
بنام جناب حسین حقانی برانڈڈ سفیر کے ایف سی
ہم جناب حسین حقانی کو ایشیا میں کے ایف سی کا برانڈڈ سفیر مقر ر کئے جانے پر انتظامیہ کے ایف سی کے نہایت شکر گزار ہیں۔ہم امید کرتے ہیں کہ ہمارے ہر دلعزیز برانڈڈ سفیر ماضی کی تلخیوں کو بھلاتے ہوئے ایشیاکا دورہ کرتے ہوئے پاکستان میں بھی قدم رنجہ فرمائیں گے۔کیونکہ وہ اکثر پاکستان کو اپنادوسرا گھر بھی کہتے ہیں۔ہم ان کے لئے دیدہ دل فرش راہ کئے بیٹھے ہیں۔
منجانب:حسین حقانی لورز گروپ
تحریر : کے ایم خالد
