تحریر : ڈاکٹر محبوب حسین جراح
23جنوری تلہ گنگ کی تاریخ کا وہ سیاہ دن تھا جس دن دہشت گردوں نے ببانگ دہل تلہ گنگ کے مسائل کو اجاگر کرنی والی کو آواز کو ہمیشہ کے لئے اس وقت خاموش کردیاتھا جس وقت ضلع بھر کی ہر دلعزیز شخصیت قاری سعید احمد شہید اپنے مدرسے میں طلبا کو سبق پڑھانے کے بعد گھر جارہے تھے جہاں رستے میںتاک میں بیٹھے بدبختوں نے انہیںبے دردی سے گولیاں مار کر شہید کر دیاتھا ۔یہ وہ آواز تھی جس کی للکار پر دشمنانِ اسلام بھی ڈرتا یہی وجہ تھی کہ دشمنان اسلام نے بزدلی کا مظاہرہ کرتے ہوئے گرج دار آواز کو اپنے رستے میں رکاوٹ جانتے ہوئے ختم کرنے کی سازش کی جس میں وہ کامیاب ٹھہرے لیکن شاید وہ بھول گئے تھے کہ اس ایک آواز کو تو وہ ختم کرنے میں کامیاب ہوگئے ہیں لیکن اس کے بعد سینکٹروں قاری سعید پیداہو گئے ہیں جو ان کے مشن کو جاری رکھے ہوئے ہیں ان کی شہادت کے سلسلے میںہر سال کی طرح اس سال بھی تحفظ ناموس رسالت ۖ وصحابہ سیمینار منعقد کیا گیا جس میں ہزاروں شرکاء نے شرکت کی۔
سیمینار سے مولانا قاضی شفیق الرحمن ،مولانا عبیدالرحمن انور ،مفتی آصف سیال،مفتی توقیر احمد اور دیگر مقررین نے خطاب کرتے ہوئے کہا کہ قاری سعید احمدشہید کی ناموس رسالتۖکے تحفظ کے حوالے سے خدمات ہمیشہ یاد رکھی جائیں گی قاری سعید احمد رحمتہ اللہ علیہ نے جو روشن کردار ادا کیا ہے تلہ گنگ کی عوام کبھی بھی نہیں بھولا سکی گی ۔ قاری سعید احمد شہید نے اپنی پوری زندگی، ناموس رسالتۖ دفاع ناموس صحابہ واہلبیت پر صرف کردی ۔ان کی زندگی ہمارے لیے مشعل راہ ہے۔انہوں نے ہر پلیٹ فارم پر حق اور سچ کی آواز بلند کی۔وہ ہر دلعزیزمذہبی رہنما تھے ان کی دینی’ سماجی خدمات کو ہمیشہ یاد رکھا جائے گا۔مولانا قاضی شفیق الرحمن نے کہاکہ ہمارے ہی ووٹوں سے منتخب ہوکر اسمبلی میں پہنچنے والے ناموس رسالت جیسے مقدس قانون کو چھیڑچھاڑ کا نشانہ بناتے ہیں ہم آئندہ آنے والے الیکشن میں ان کے جھانسوں میں نہیں آئیں گے اور غازی ممتاز قادری شہید کی شہادت کا بدلہ الیکشن میں جمہوری طریقے سے لیں گے۔
اس پر سیمینار کے شرکاء نے ہاتھ اٹھاکر اس عزم کا اظہار کیا کہ ان کا ووٹ آمدہ الیکشن میں دینی اقدار کے تحفظ کے لئے علماء کو دیا جائے گا ۔سیمینار کے مقررین نے مزید کہا کہ توہین رسالت کے قانون میںکوئی جزوی ترمیم کر کے اسے غیر موثر کرنے کوکوئی کوشش کسی صورت میں برداشت نہیں کی جائے گئی۔ اسلام دشمن طاغوتی قوتیں ایک مسلمان کا حضور ۖسے قلبی اور ذہنی تعلق ختم کرنا چاہتی ہیں حضورۖ سے سچی محبت اور اْن کا اتباع ہماری انفرادی اور اجتماعی نجات کا اہم ترین ذریعہ ہے۔ اْنہوں نے حکومت کو متنبہ کیا کہ اگر حکومت نے توہین رسالت کے قانون میں کسی قسم کی تبدیلی کی تو تمام اسلامی جماعتیں مل کر حکومت کے خلاف تحریک چلائیں گی۔قاری سعید شہید نے اپنی جان اسلام کی ناموس پر قربان کی یقیناًروز محشر ان کی یہ قربانی رایئگاں نہیں جائے گی۔
قارئین محترم گزشتہ روز ملک کی تیسری سب سے بڑی جماعت پی ٹی آئی کی تنظیم سازی کی گئی جس میں ضلعی صدر سردار منصور حیات ٹمن نے شرکت کی دعوت دی جس پرقاضی عبدالقادر ، چوہدری غلام ربانی اور محمد راشد کے ساتھ تقریب میں شرکت کی۔ اس تقریب کی صدارت ضلعی صدر سردار منصور حیات ٹمن نے کی اس تقریب میں پی ٹی آئی کے نئے عہدیداروںکو نامزدگی کے سرٹیفیکیٹ دیئے گئے جس کا اعلان شمالی ریجن کے صدر عامر کیانی نے کیا سٹیج پر ضلعی جنرل سیکرٹری چوہدری علی ناصر،شمالی ریجن کے نائب صدر راجہ یاسرسرفراز موجود تھے جب کہ سابق ایم پی اے پیر نثار جوجی ،سابق ایم پی اے فوزیہ بہرام اور پارٹی کے درینہ کارکن ملک شاہد اقبال کو سٹیج کے نیچے بٹھایاگیا جو سمجھ سے بالاتر ہے۔
اس تنظیم سازی کے حوالے سے درینہ کارکنوں جن میں حکیم نثار اور دیگر ان کے ساتھی جنہوں نے پارٹی کو تلہ گنگ میں زندہ رکھا ہوا تھا ان کی غیر موجودگی کی جب میں نے نشان دہی کی تواس کاخاطرخواہ جواب نہیں دیا گیا جس سے یہ ظاہر ہوتا کہ یہ پارٹی بھی اب قبضہ مافیا کے قبضے میں چلی گئی ہے ۔اس سے درینہ اور مخلص کارکنوں میں شدید بے چینی پائی جاتی ہے ایک کارکن نے اپنا دکھڑا سناتے ہوئے کہا کہ تلہ گنگ میں ہم بنیادی کارکنوں میں شمار کئے جاتے ہیں لیکن ہمیں بالکل کارنر کردیا گیا اور جو پارٹی میں بعد میں شامل ہوئے وہ پارٹی کے لیڈر بن گئے ہماری آواز سننے کو کوئی تیار ہی نہیںاور نہ تنظیم سازی میں ہم سے مشورہ کیا گیا۔یہاں بھی چوائس پر نامزدگیاں کی گئی ہیں۔
اس پر موقف توپارٹی کے اعلیٰ عہدیدار ہی بہترطورپر دے سکتے ہیں پارٹی کے مقامی لیڈروں کو سنجیدگی سے سوچنا پڑے گا کارکنوں اور پارٹی لیڈروں کے درمیان یہ دوریاں پارٹی کو نقصان پہنچا سکتی ہیں آنے والے الیکشن میں اب وقت کم رہ گیا ہے امید کی جاسکتی ہے کہ پارٹی اس اہم مسئلے کو الیکشن سے پہلے پہلے حل کرلے گی ۔اللہ ہم سب کا حامی و ناصر ہو۔
تحریر : ڈاکٹر محبوب حسین جراح
03335925253
