دینہ (جمیل احمد کھٹانہ سے) پولیس تھانہ دینہ نے دوران ریمانڈ ملزم سے 30 بور پسٹل اور 3 روند برآمد کر لیئے، مقدمہ درج۔ تفصیلات کے مطابق گزشتہ روز پولیس تھانہ دینہ کے اے ایس آئی محمد ریاض نے دورانِ ریمانڈ ملزم حسنین سجاد ولد سجاد محمود سکنہ محلہ معصوم شاہ دینہ سے 30بورپسٹل بمعہ 3روند برآمد کر لئے اور مقدمہ درج کر لیا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دینہ (جمیل احمد کھٹانہ سے) دینہ کے نواحی علاقہ میں نامعلوم چور گھر سے لاکھوں روپے مالیت کا ٹریکٹر لے اُڑے۔تفصیلات کے مطابق گزشتہ روز رات کی تاریکی میں نامعلوم چور ڈھوک طمہ کے رہائشی محمد ربانی کے گھر داخل ہو گئے اور گھر کے گیراج میں کھڑا لاکھوں روپے مالیت کا ٹریکٹر نمبری TSB-8468لے اُڑے ،اہل خانہ جب صبح اُٹھے اور دیکھا تو ٹریکٹر غائب تھا اور چور اپنا کام دِ کھا چکے تھے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دینہ ( جمیل احمد کھٹانہ سے) پولیس تھانہ منگلا نے دورانِ گشت ناکہ بندی کر کے منشیات فروش سے 1کلو 67گرام چرس بر آمد کر لی اور ملزم کو گرفتار کر کے مقدمہ درج کر لیا ۔تفصیلات کے مطابق گزشتہ روز پولیس تھانہ منگلا کینٹ کے اے ایس آئی اظہر اقبال نے دورانِ گشت و ناکہ بندی منشیات فروش افتخار احمد ولد فضل احمد سکنہ ڈھوک ساہی تحصیل دینہ ضلع جہلم سے 1کلو 67گرام چرس برآمد کر لی اور ملزم کو گرفتار کر کے مقدمہ درج کر لیا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دینہ (جمیل احمد کھٹانہ سے) حقیقی تصوف رسم و رواجات کو چھوڑ کر مکمل طو ر پردین اسلام پر کاربند ہونا اور اپنے ہر عمل کو اسوہ رسول ﷺ پر لے آنے کا نام ہے،ان خیالات کا اظہار شیخ سلسلہ نقشبندیہ اویسیہ امیر عبدالقدیر اعوان نے اجتما ع کے موقع پر خطاب کرتے ہوئے کیا ، انہوں نے مزید کہا کہ جب بندہ اللہ اللہ شروع کرتا ہے تو اس کے اندر اللہ کریم کے فضل سے ایسی کیفیت آ جاتی ہے گناہ کڑوا لگنا شروع ہو جاتا ہے اورنیکی پر چلنا اس کے لیے آسان ہو جاتا ہے ،لفظ اللہ سے بڑا کوئی لفظ نہیں ہے اور اللہ ہی اسم اعظم ہے،جب اسم اعظم نصیب ہوتا ہے تو پھر اپنی ذات کی نفی ہو جاتی ہے اور انسان اپنی ہر ضرورت کی تکمیل کی امید صرف اللہ سے رکھتا ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دینہ (جمیل احمد کھٹانہ سے)اسسٹنٹ کمشنر دینہ کے ناجائز تجاوزات کے خاتمے کی ڈیڈ لائن اور وارننگ بھی کام نہ آ سکی ،منگلا روڈ شہر کے وسط میں ناجائز تجاوزات کی وجہ سے ٹریفک جام کا مسئلہ شدت اختیار کرتا جا رہا ہے ،مین بازار اور جی ٹی روڈ پر چوکی کے ساتھ ناجائز تجاوزات کا سلسلہ عروج پر ،عوام کی نظریں نئے آنے والے اسسٹنٹ کمشنر کی جانب ،عوام الناس کا اسسٹنٹ کمشنر دینہ سے نوٹس کا مطالبہ۔تفصیلات کے مطابق دینہ شہر میں ناجائز تجاوزات کا سخت رحجان پایا جاتا ہے جس کی سب سے بڑی وجہ مقامی انتظامیہ کی نااہلی ہے کیونکہ مقامی انتظامیہ کی طرف سے ان کو اگر مخصوص جگہ فراہم کر دی جاتی تو یہ در بدر کی ٹھوکریں نہ کھاتے پھرتے ،اس وقت منگلا روڈ عین مین چوک میں ناجائز تجاوزات کی وجہ سے روڈ ٹریفک کے لیے گھنٹوں بند رہتی ہے جس کی وجہ سے عوام کو شدید مشکلات کا سامنا کرنا پڑتا ہے جبکہ اس کے ساتھ ساتھ مین بازار کا داخلی راستہ اور مین بازار کی اندرونی حالت اتنی ابتر ہے کہ خواتین کو شاپنگ کرنے میں شدید دشواری کا سامنا کرنا پڑتا ہے ،جگہ جگہ ناجائز تجاوزات قائم کیئے گئے ہیں ،اسسٹنٹ کمشنر دینہ نے چارج سنبھالتے ہی دوکانداروں کو وارننگ کے ساتھ ساتھ ڈیڈ لائن دی تھی جو موثر نہ ہو سکی اور ناجائز تجاوزات کا سلسلہ جوں کا توں قائم ہے ،عوام فٹ پاتھوں پر چل نہیں سکتی کیونکہ فٹ پاتھوں پر بھی ناجائز تجاوزات مافیا کا قبضہ ہے ،عوام الناس نے اسسٹنٹ کمشنر دینہ سے مطالبہ کیا ہے کہ شہر میں قائم ناجائز تجاوزات کا خاتمہ کیا جائے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دینہ ( جمیل احمد کھٹانہ سے)دینہ شہر میں بھیک مانگنے والی خوبصورت دوشیزاؤں کا راج ،بھیک کی شکل میں نوجوان نسل کو گناہ پر آمادہ کرنا اور نوجوان نسل کو تباہ کرنا وطیرہ بنا لیا ،عوام الناس کا ڈی پی او جہلم عبدالغفار قیصرانی سے ان کے خلاف آپریشن کا مطالبہ ۔تفصیلات کے مطابق دینہ شہر میں خوبصورت دوشیزائیں بھیک مانگنے کی آڑ میں نوجوان نسل کو گناہ پر آمادہ کرنے اور ان کی تباہی کا باعث بن رہی ہیں ،شہر میں جس طرف نظر دوڑائیں ہر طرف یہ نظر آئیں گی ،دوکاندار حضرات متعدد مرتبہ ان کے ہاتھوں سے لٹ چکے ہیں ،شہر میں ان کا اس وقت راج ہے اور ان کی غلط حرکتوں کی وجہ سے نوجوان نسل راہ رروی کا شکار ہو رہی ہے ،عوام الناس نے ڈی پی او جہلم عبدالغفار قیصرانی سے مطالبہ کیا ہے کہ ان کے خلاف سخت ایکشن لیا جائے تاکہ برائی کو روکا جا سکے۔
جمیل احمد کھٹانہ
